អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ បានឱ្យដឹងថា មន្ត្រីជំនាញកំពុងស្រាវជ្រាវរកអ្នកផ្តើមគំនិត និងអ្នកសមគំនិត លួចរត់ចេញពីពន្ធនាគារនៅខេត្តកំពង់ស្ពឺ ដើម្បីបញ្ជូនទៅតុលាការចោទប្រកាន់បន្ថែម។
អ្នកនាំពាក្យអគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ លោក នុត សាវនា មានប្រសាសន៍ប្រាប់វីអូឌីនៅថ្ងៃនេះថា នៅម៉ោងប្រហែល ៧យប់ម្សិលមិញ មានជនជាប់ចោទម្នាក់ដែលមន្ត្រីពន្ធនាគារដាក់ឱ្យនៅដាច់ដោយឡែក ១៤ថ្ងៃ ទើបតែបញ្ជូនចូលឃុំជាមួយពិរុទ្ធជន ជនជាប់ចោទ និងជនត្រូវចោទជាង ៣០នាក់ទៀត បានប្រាប់មន្ត្រីពន្ធនាគារថា ឈឺពោះ សុំទៅពេទ្យ។ លោកបន្ថែមថា នៅពេលនោះ មន្ត្រីពន្ធនាគារយកសម្ភារត្រៀមយកទៅពេទ្យ ស្រាប់តែពិរុទ្ធជន ជនជាប់ចោទ និងជនត្រូវចោទ ប្រមាណជា ៣២នាក់ វាយមន្ត្រីពន្ធនាគារពីរនាក់ បណ្តាលឱ្យរងរបួសក្បាល ចិញ្ចើម និងពោះ បម្រុងរត់គេច។ ប៉ុន្តែ លោកថា ភ្លាមៗត្រូវបានសមត្ថកិច្ចចាប់ខ្លួនបានទាំងអស់នៅកន្លែងកើតហេតុ។
មន្ត្រីអគ្គនាយកដ្ឋានពន្ធនាគាររូបនោះបញ្ជាក់ថា ក្រុមការងារជំនាញកំពុងស្រាវជ្រាវរកអ្នកផ្តើមគំនិត និងអ្នកសមគំនិត ដែលនាំគ្នារត់ចេញពីពន្ធនាគារ ដើម្បីបញ្ជូនទៅតុលាការចាត់វិធានការច្បាប់បន្ថែមទៀត។
លោកមានប្រសាសន៍ថា៖ «ការជំនាញពីក្រសួង [មហាផ្ទៃ] ចុះទៅធ្វើការស៊ើបអង្កេត ដល់ពេលរកឃើញចម្លើយយ៉ាងម៉េចៗ យើងនឹងមានវិធានការតាមក្រោយ ព្រោះនេះមិនមែនជារឿងតូចតាចទេ។ វាសុទ្ធតែបទល្មើសមួយដែលមានចរិតប្រឆាំងជាមួយមន្ត្រីរាជការ ក៏ដូចជាប្រឆាំងនឹងបញ្ជារបស់តុលាការ ហើយវាអាចបង្កវិនាសកម្មធ្ងន់ធ្ងរណាស់ បើយើងទប់ស្កាត់មិនទាន់»។
មាត្រា ៥៦១ នៅក្នុងក្រមព្រហ្មទណ្ឌ ចែងថា ការលួចរត់ចេញពីការឃុំខ្លួន ត្រូវផ្តន្ទាទោសដាក់ពន្ធនាគារពី ១ឆ្នាំ ទៅ ៣ឆ្នាំ ពិន័យជាប្រាក់ ២លានរៀល ទៅ ៦លានរៀល។ ចំណែកមាត្រា ៥៦៣ នៃក្រមដដែលនេះ ចែងថា អំពើលួចរត់ ត្រូវផ្តន្ទាទោសដាក់ពន្ធនាគារពី ២ឆ្នាំ ទៅ ៥ឆ្នាំ ពិន័យជាប្រាក់ ៤លានរៀល ទៅ ១០លានរៀល នៅក្នុងក្របខ័ណ្ឌព្រមព្រៀងគ្នា នៃសកម្មភាពព្រមព្រៀងគ្នារវាងជនជាប់ឃុំច្រើននាក់។
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត គាំទ្រនឹងចំណាត់ការរបស់មន្ត្រីជំនាញ ដែលស្រាវជ្រាវរកអ្នកផ្តើមគំនិត និងអ្នកសមគំនិត មកផ្តន្ទាទោសបន្ថែម។ ប៉ុន្តែ លោកអំពាវនាវទៅមន្ត្រីជំនាញស្រាវជ្រាវឱ្យមានតម្លាភាព ដើម្បីជាគំរូកុំឱ្យអ្នកក្រោយៗប្រព្រឹត្តអំពើបែបនេះបន្តទៀត។
លោកមានប្រសាសន៍ថា៖ «ត្រូវធ្វើការស៊ើបអង្កេតឱ្យមានតម្លាភាព ដើម្បីរកបាតុហេតុដែលកើតឡើង ជាវិធានការមួយក្នុងការទប់ស្កាត់ បង្ការទៅថ្ងៃក្រោយទៀត ក៏ដូចជាការអនុវត្ត កុំឱ្យអ្នកផ្សេងទៀតយកគំរូតាម នៅតាមពន្ធនាគារ»។
អ្នកនាំពាក្យអគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ លោក នុត សាវនា បានបញ្ជាក់ថា ទណ្ឌិត និងពិរុទ្ធជន ជនជាប់ចោទ និងជនត្រូវចោទ ដែលកំពុងជាប់ឃុំនៅពន្ធនាគារខេត្តកំពង់ស្ពឺ មានចំនួនសរុប ១៣០០នាក់៕
