ក្រុមហ៊ុនជប៉ុនមួយនៅប្រទេសថៃដែលផលិតម៉ាស៊ីនត្រជាក់ និងគ្រឿងបរិក្ខារម៉ាស៊ីនត្រជាក់ ផ្តល់សំណងជាទឹកប្រាក់ចំនួនជាង ១លាន ២សែនដុល្លារ ដល់បុគ្គលិករបស់ខ្លួនចំនួន ១១១៩នាក់ដែលត្រូវក្រុមហ៊ុនបញ្ឈប់។
តាមការចុះផ្សាយរបស់សារព័ត៌មានថៃមតិឈុន ក្រុមហ៊ុន Mitsubishi Electric Consumer Products (Thailand) Co.,LTD បានបញ្ឈប់ការងារបុគ្គលិកចំនួន ១១១៩នាក់ ចាប់ពីថ្ងៃទី១៦ ខែមេសានេះតទៅ។ ប្រភពដដែលឱ្យដឹងថា ភាគីក្រុមហ៊ុនបានយល់ព្រមចេញប្រាក់សំណង និងប្រាក់ជួសការជូនដំណឹងជាមុនតាមច្បាប់ការពារកម្លាំងពលកម្ម គិតជាទឹកប្រាក់សរុបជាង ៤១លានបាត (១២៦១៧៧១ដុល្លារ) ដោយបានផ្ញើជូនតាមបញ្ជីធនាគាររបស់និយោជិតរួចរាល់ហើយ ហើយនឹងផ្ញើប្រាក់ឈ្នួលឱ្យនៅក្នុងថ្ងៃនេះផងដែ។
ក្រុមហ៊ុន Mitsubishi Electric Consumer Products (Thailand) Co.,LTD មានស្នាក់ការកណ្តាលនៅក្នុងខេត្តឈុនបុរី ប្រទេសថៃ ជាក្រុមហ៊ុនផលិតឧបករណ៍ម៉ាស៊ីនត្រជាក់ និងគ្រឿងបន្លាស់ម៉ាស៊ីនត្រជាក់ ដែលមាននិយោជិតប្រចាំចំនួន ២៥០០នាក់ និងនិយោជិតម៉ៅការ ២៦០០នាក់ ដោយការបញ្ឈប់ការងារលើកនេះ គឺជាការបញ្ឈប់ការងារនិយោជិតម៉ៅការពីក្រុមហ៊ុនទទួលម៉ៅការចំនួន ៧ក្រុមហ៊ុន។
លោក ធុសាភុន ក្រីតវង់វិម៉ាន (Todsaphon Kritwongwiman) លេខាធិការការិយាល័យសន្តិសុខសង្គម បានបញ្ជាឱ្យមន្ត្រីការិយាល័យសន្តិសុខសង្គមប្រចាំខេត្តឈុនបុរី លោកស្រី សុផាផន យូវឌ្ឍណា ចុះទៅពិភាក្សាជាមួយនិយោជករបស់ក្រុមហ៊ុន។
តាមសារព័ត៌មានមតិឈុន លោកស្រី សុផាផន យូវឌ្ឍណា បានមានប្រសាសន៍ថា ក្រុមហ៊ុនបានគោរពតាមច្បាប់ការពារកម្លាំងពលកម្មយ៉ាងត្រឹមត្រូវ ដោយបានចេញប្រាក់ជួសការជូនដំណឹងជាមុន គិតជាទឹកប្រាក់សរុបជាង ១១លានបាត ឬប្រហែលជាង ៣០ម៉ឺនដុល្លារ និងប្រាក់សំណងចំនួនជាង ៣០លានបាត ឬប្រមាណជាង ៩០ម៉ឺនដុល្លារបន្ថែមទៀត។
លោកស្រីបានបន្ថែមថា ការសងជំងឺចិត្តដោយការបញ្ឈប់ការងារលើកនេះ និយោជិតទទួលបានអត្ថប្រយោជន៍ច្រើនជាងមុន ដោយនិយោជិតនឹងទទួលបានប្រាក់ខែ ៧០ភាគរយនៃប្រាក់ខែគោលរយៈពេលមិនលើសពី ២០០ថ្ងៃ៕
