«ជំងឺកូវីដ១៩ ដើម្បីថែរក្សាខ្លួនពីជំងឺនេះ កូនត្រូវឧស្សាហ៍លាងដៃជាប្រចាំជាមួយសាប៊ូ ជែលលាងដៃ ឬអាល់កុល ។ កូនៗត្រៀមលក្ខណៈរៀនហើយឬនៅ? កូនត្រូវមានសៀវភៅសិក្សាគោលភាសាខ្មែរថ្នាក់ទី៣ ខ្មៅដៃ និងសៀភៅសរសេរដាក់ក្បែរខ្លួន»។ នេះជាប្រសាសន៍របស់អ្នកគ្រូ ចន សុទ្ធាវី គ្រូបង្រៀននៅសាលាបឋមសិក្សា ហ៊ុន សែន ទួលសុភាឃួន ស្ថិតនៅរាជធានីភ្នំពេញ។
អ្នកគ្រូ ចន សុទ្ធាវី ចាប់ផ្ដើមបង្រៀនមុខវិជ្ជាភាសាខ្មែរថ្នាក់ទី៣ នៅក្នុងកម្មវិធីការសិក្សាពីចម្ងាយ និងការសិក្សាតាមប្រព័ន្ធអេឡិចត្រូនិច ដែលបានចាក់ផ្សាយតាមបណ្ដាញសង្គមហ្វេសប៊ុក(Facebook) យូធូប (YouTube) និងទូរទស្សន៍នាថ្ងៃទី២០ ខែមេសាកន្លងទៅ។
សេចក្ដីប្រកាសព័ត៌មានរបស់ក្រសួងអប់រំចេញពីថ្ងៃម្សិលមិញ លើកឡើងថា កម្មវិធីសិក្សាពីចម្ងាយ ពីថ្ងៃទី២០ ខែមេសា រហូតតទៅដោយមិនទាន់កំណត់ថេរវេលាបញ្ចប់ឡើយ។ ការបង្រៀននេះផ្សាយតាមរយៈទូរទស្សន៍ខ្សែកាបតាមបណ្ដាខេត្តទូទាំងប្រទេស ទូរទស្សន៍ជាតិកម្ពុជាទី២ TVK2 ដែលផ្សាយសាកល្បងតាមប្រព័ន្ធផ្កាយរណប DTV ប៉ុស្តិ៍លេខ២២ ផ្សាយតាមទំព័រហ្វេសប៊ុកផ្លូវការ យូធូបផ្លូវការ និងមជ្ឈមណ្ឌលសិក្សាអេឡិចត្រូនិចរបស់ក្រសួងអប់រំ។
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន តាមរយៈបទសម្ភាសក្នុងទូរទស្សន៍ជាតិកម្ពុជាទី២ ឬ TVK2 ថ្លែងថា ការបង្រៀនតាមរយៈកម្មវិធីសិក្សាពីចម្ងាយនេះ ជាយុទ្ធសាស្ត្រមួយដើម្បីពង្រឹងសមត្ថភាពសិស្ស និងគ្រូ ក្នុងគ្រាប្រទេសកម្ពុជាប្រឈមនឹងជំងឺកូវីដ១៩នេះ។
លោក ហង់ ជួនណារ៉ុន មានប្រសាសន៍ថា៖ «ទូរទស្សន៍អប់រំនេះមានសារៈសំខាន់យ៉ាងខ្លាំង មិនត្រឹមតែជួយសិស្សទេ ក៏ជួយបណ្ដុះបណ្ដាលគ្រូបន្ត អ៊ីចឹងគ្រូនៅខេត្តឆ្ងាយៗដែលមិនសូវបានទទួលការបណ្ដុះបណ្ដាលផងនោះ ពួកគាត់អាចមើលពីវិធីសាស្ត្របង្រៀនលើការបង្រៀនលើមុខវិជ្ជាផ្សេងៗផង ហើយពង្រឹងសមត្ថភាពរបស់គាត់ឈានទៅពង្រឹងគុណភាពអប់រំនៅតាមគ្រឹះស្ថានសិក្សានានា»។
បើតាមសេចក្ដីប្រកាសរបស់ក្រសួងអប់រំ កម្មវិធីនេះនឹងបង្រៀនសិស្សចាប់ពីថ្នាក់មត្តេយ្យរហូតដល់ថ្នាក់ទី១២ ដែលត្រូវបានចាក់ផ្សាយនៅទូរទស្សន៍ជាតិកម្ពុជាទី២ និងយូធូបរបស់ក្រសួង ចាប់ពីម៉ោង ៧ព្រឹក ដល់ម៉ោង ១០យប់។ នៅកម្រិតបឋមសិក្សា ក្រសួងអប់រំសម្រេចបង្រៀនមុខវិជ្ជាភាសាខ្មែរ និងគណិតវិទ្យា ខណៈដែលថ្នាក់មធ្យមសិក្សា ក្រសួងបង្រៀនមុខវិជ្ជាចម្រុះ។
ទោះជាយ៉ាងណាក្ដី កុមារមួយចំនួននៅក្រុងសិរីសោភ័ណ ខេត្តបន្ទាយមានជ័យ នៅមិនទាន់ដឹងថា ពួកគេអាចរៀនតាមអនឡាញ ឬរៀនតាមទូរទស្សន៍នេះបាននោះទេ ។
កុមារាម្នាក់អាយុ ១៣ឆ្នាំ រៀនថ្នាក់ទី៧ នៅវិទ្យាល័យអូរអំបិល ក្រុងសិរីសោភ័ណ ឈ្មោះ សាន សុភា បានប្រាប់វីអូឌីថា រូបគាត់មិនទាន់ទទួលបានដំណឹងពីគ្រូរបស់គាត់ ចំពោះការរៀនតាមទូរទស្សន៍ ឬតាមអនឡាញនេះនៅឡើយ។ សុភា បន្តថា គាត់រៀននៅផ្ទះតាមសៀវភៅសិក្សាគោល ដោយមានឪពុកជាអ្នកពន្យល់បន្ថែម។
សាន សុភា ប្រាប់ថា៖ «ខ្ញុំអត់ទាន់ដឹងរឿងហ្នឹងផង (រៀនតាមអនឡាញ និងតាមទូរទស្សន៍)។ ប៉ាខ្ញុំជួយបង្រៀនពេលខ្ញុំនៅផ្ទះ តែបង្រៀនបានតែមុខវិជ្ជាខ្មែរ និងគណិតខ្លះៗទេ ប៉ាខ្ញុំគាត់រវល់ដែរ រៀនបានពេលយប់ៗ»។
មិត្តភក្ដិរបស់ សាន សុភា ដែលកំពុងលេងបាល់ជាមួយគ្នានោះ គឺកុមារាម្នាក់ទៀតឈ្មោះ ឈុន លាង ប្រាប់ថា រូបគាត់ក៏មិនដឹងថា មានកម្មវិធីសិក្សាតាមអនឡាញ និងតាមទូរទស្សន៍នោះដែរ។ ឈុន លាង បន្តថា គាត់នឹងទៅសួរគ្រូរបស់គាត់ចំពោះការរៀនតាមមធ្យោបាយនេះ។
ឈុន លាង ប្រាប់ថា៖ «អត់ដឹងទេពូ! ចាំខ្ញុំសួរលោកគ្រូខ្ញុំសិន មិនដឹងថា គេរៀនម៉ោងណាម៉ោងណាអីផង»។
តាមរយៈវីដេអូបង្រៀនតាមយូធូបរបស់ក្រសួងអប់រំ ដែលផ្សាយផ្ទាល់ពេញមួយថ្ងៃកាលពីថ្ងៃទី២០ ខែមេសា មានអ្នកចូលមើលប្រមាណរាប់សិបនាក់ប៉ុណ្ណោះ។ នៅវេលាម៉ោង៥ និង៣០នាទីល្ងាច ថ្ងៃទី២០ ខែមេសានេះ យូធូបក្រសួងអប់រំដែលកំពុងផ្សាយកម្មវិធីសិក្សាពីចម្ងាយនេះ មានមនុស្សកំពុងទស្សនាជាង ១០នាក់។ ចំណែកឯវីដេអូបង្រៀនតាមហ្វេសប៊ុកមានអ្នកទស្សនាប្រមាណជាង ១ពាន់នាក់ ក្នុង១វីដេអូ។
នាយកសាលាបឋមសិក្សាវត្តបូព៌ ខេត្តសៀមរាប លោក ពឹង គឹមឆេន កត់សម្គាល់ថា ការបង្រៀនតាមប្រព័ន្ធពីចម្ងាយនេះ អាចមានប្រសិទ្ធភាពទៅបាន ប្រសិនបើមានការជួយជំរុញខ្លាំងក្លាពីគ្រូបង្រៀនផ្ទាល់ ឬអាណាព្យាបាលសិស្ស។ លោកថា ក្រសួងអប់រំ ក៏គួរណាស់ពិចារណាខ្លឹមសារមេរៀន និងវិធីសាស្ត្រពិសេសជាងវិធីធម្មតា ដើម្បីឱ្យសិស្សចូលចិត្តរៀន និងរៀនឆាប់ចេះ។
លោក ពឹង គឹមឆេន មានប្រសាសន៍ថា៖ «កន្លងមក ធ្វើទៅហាក់ដូចទូលាយពេក ធ្វើដូចក្រសួង ដឹងស្រាប់ហើយ សួរថា សិស្សប៉ុន្មាននាក់មានអារម្មណ៍រៀន? ហើយក្រសួងឡាយ (Live) មកហ្នឹង មេរៀនវែងពេក ធ្វើឱ្យសិស្សហ្នឹងវាអត់រៀន វាខ្ជិល វាអត់បានសួរផងអីផង វាធុញថប់ ព្រោះការរៀនទាមទារឱ្យសប្បាយៗ មិនអ៊ីចឹង! ខ្ញុំគ្រាន់តែគិតថា ដំណាក់កាលរៀនពីចម្ងាយបែបនេះ គ្រូចាំបាច់ត្រូវសង្ខេបខ្លឹមសារឱ្យខ្លី ឱ្យងាយ និងឱ្យខ្លឹម»។
តាមរយៈកម្មវិធីសិក្សាពីចម្ងាយនេះ ក្រសួងអប់រំ ទើបចេញសេចក្ដីប្រកាសថ្មីមួយទៀត នៅថ្ងៃទី២១ ខែមេសា ដោយសម្រេចប្រើប្រាស់ស្ថានីយ៍វិទ្យុផ្សាយសម្លេងពហុភាសាជាភាសាទំពួន និងភាសាគ្រឹង សម្រាប់កុមារជនជាតិដើមភាគតិចរៀនថ្នាក់មត្តេយ្យដល់ថ្នាក់ទី៣ នៅខេត្តរតនគិរី និងមណ្ឌលគិរី ចាប់ពីខែមេសា ដល់ខែមិថុនា។
គ្រូឧទ្ទេសកម្រិតឧត្តមសិក្សានៃវិទ្យាស្ថានជាតិអប់រំ និងជាអ្នកនិពន្ធសៀវភៅវិធីសាស្ត្របង្រៀន លោក ឃិន វណ្ឌី មានប្រសាសន៍ថា លោកគាំទ្រចំពោះយុទ្ធសាស្ត្ររបស់ក្រសួងអប់រំនេះ ប៉ុន្តែលោកថា ក្រសួងចាំបាច់ត្រូវពង្រឹងការងារតាមសាលាបន្ថែមទៀត ដើម្បីឱ្យយុទ្ធសាស្ត្រដែលបានដាក់ចេញមានប្រសិទ្ធភាពខ្ពស់។
លោក ឃិន វណ្ឌី ថ្លែងថា៖ «បង្រៀនតាមទូរទស្សន៍ បានតែមើលទូរទស្សន៍ តែអត់បានឆ្លើយឆ្លងជាមួយគ្រូទេ បើកន្លែងហ្នឹងអត់យល់ សិស្សមិនដឹងទៅសួរអ្នកណាទេ? បើសួរទៅទូរទស្សន៍ សួរអត់កើត ហើយតំបន់ខ្លះក៏ពិបាកទទួលសេវាទូរទស្សន៍ដែរ មើលមិនឃើញទេ តែទោះជាយ៉ាងណា ក៏គ្រាន់ជាងអត់ធ្វើដែរ»។
លោកបន្តថា ក្រសួងអប់រំចាំបាច់ត្រូវផ្សព្វផ្សាយឱ្យបានទូលំទូលាយជាងនេះ ដើម្បីឱ្យអាណាព្យាបាលសិស្សជួយជំរុញសិស្សឱ្យចូលរៀនកម្មវិធីនេះ។ ចំណែកឯនាយកសាលា ត្រូវចាត់ចែងបន្តទៅគ្រូ ដើម្បីផ្សព្វផ្សាយព័ត៌មាន និងចំណេះដឹងទៅសិស្សតាមដែលអាចធ្វើទៅបាន។
រដ្ឋមន្ត្រីក្រសួងអប់រំ លោក ហង់ ជួនណារ៉ុន ថ្លែងក្នុងកិច្ចសម្ភាសន៍របស់ TVK2 ថា ក្រសួងអប់រំនឹងយកឱកាសនៃការអនុវត្តកម្មវិធីសិក្សាពីចម្ងាយនេះ ដើម្បីរៀបចំគោលនយោបាយអប់រំជាក់លាក់សម្រាប់បង្រៀនពីចម្ងាយ ដើម្បីឱ្យការបង្រៀន និងរៀនមានប្រសិទ្ធភាពខ្ពស់។
លោក ហង់ ជួន ណារ៉ុន៖ «យើងនឹងយកបទពិសោធន៍ក្នុងពេលដ៏លំបាកនេះ ដើម្បីរៀបចំគោលនយោបាយអប់រំពីចម្ងាយ អប់រំតាមអេឡិចត្រូនិចទៅថ្ងៃមុខ។»
ទិន្នន័យស្ថិតិចងក្រងដោយក្រសួងអប់រំឆ្នាំសិក្សា២០១៩ បង្ហាញថា កម្ពុជាមានគ្រឹះស្ថានអប់រំចំណេះទូទៅ និងមត្តេយ្យសាធារណៈចំនួនជាង ១៣៣០០ ក្នុងនោះ សាលារៀននៅតំបន់ទីប្រជុំជនមាន ១៤២២ និងសាលារៀននៅទីជនបទមាន ១១ ៨៧៨។
សាលារៀនជួបការលំបាកមានចំនួន ២៤៨កន្លែង ដែលភាគច្រើនជាសាលាបឋមសិក្សា។ សិស្សដែលរៀនក្នុងឆ្នាំសិក្សា២០១៨ -២០១៩ មានចំនួន ជាង ៣លាន ១សែន ៨ម៉ឺននាក់ (៣ ១៨៩ ១៧២នាក់) និងមានបុគ្គលិកបង្រៀនជាង ៩ម៉ឺននាក់ (៩៣ ៧០៣នាក់) និងបុគ្គលិកមិនបង្រៀនជាង ១ម៉ឺន ៩ពាន់នាក់ (១៩ ០៦៦នាក់)។
សាលារៀនទាំងអស់បានចាប់ផ្ដើមបិទទ្វារតាំងពីថ្ងៃទី១៦ ខែមីនា ដើម្បីទប់ស្កាត់ការឆ្លងរីករាលដាលនៃមេរោគកូវីដ១៩។ ជាងមួយខែក្រោយមក គឺនៅថ្ងៃទី១៧ ខែមេសា ក្រសួងអប់រំបានប្រកាសពន្យារពេលចូលរៀនឡើងវិញ ដោយមិនទាន់កំណត់កាលបរិច្ឆេទចូលរៀននៅឡើយទេ។
កម្ពុជារកឃើញអ្នកឆ្លងជំងឺកូវីដ១៩ ចំនួន ១២២ករណី ខណៈដែលមនុស្សចំនួន ១១០នាក់ បានជាសះស្បើយរួចទៅហើយ។ ទោះជាយ៉ាងណាក្ដី ក្រសួងសុខាភិបាលបានព្រមានថា ប្រជាពលរដ្ឋកម្ពុជាមិនត្រូវធ្វេសប្រហែសនោះឡើយ៕
