ក្រសួងធនធានទឹក និងឧតុនិយម បានអំពាវនាវឱ្យសាធារណជនទូទៅនៅតាមបណ្តាខេត្តនានាក្នុងតំបន់វាលទំនាបកណ្ដាល និងជួរភ្នំដងរែក បង្កើនការប្រុងប្រយ័ត្នខ្ពស់ចំពោះបាតុភូតធម្មជាតិដូចជាផ្គរ រន្ទះ និងខ្យល់កន្ត្រាក់។
សេចក្តីជូនដំណឹងរបស់ក្រសួងធនធានទឹក និងឧតុនិយម ចេញនៅថ្ងៃនេះ ឱ្យដឹងថា បាតុភូតធម្មជាតិទាំងនោះអាចកើតមានឡើងចាប់ពីថ្ងៃទី២៣ ដល់ថ្ងៃទី២៥ ខែមេសានេះ។
ប្រភពដដែល ក៏បានឱ្យដឹងផងដែរថា នៅចន្លោះថ្ងៃទី២៣ ដល់ថ្ងៃទី២៨ ខែមេសា អាស្រ័យដោយការរងសម្ពាធទាបជាមួយខ្យល់ដែលបក់ពីសមុទ្រចិនខាងត្បូង អាចធ្វើឱ្យមានភ្លៀងធ្លាក់រាយប៉ាយជាលំដាប់ នៅក្នុងក្របខណ្ឌលើផ្ទៃប្រទេស។ សម្ពាធទាបនេះក៏នឹងធ្វើឱ្យធាតុអាកាសក្តៅអាចនឹងចុះថមថយមួយកម្រិត ដោយនៅក្នុងតំបន់វាលទំនាបកណ្ដាល សីតុណ្ហភាពអតិបរមាអាចមានពី ៣២ ទៅ ៣៥°C និងនៅតំបន់ជួរភ្នំដងរែក និងខ្ពង់រាបឦសាន សីតុណ្ហភាពអតិបរមាអាចមានពី ៣១ ទៅ ៣៤°C ។ ដោយឡែក នៅតំបន់មាត់សមុទ្រ សីតុណ្ហភាពអតិបរមាអាចមានពី ៣២ ទៅ ៣៣°C ហើយនឹងអាចមានភ្លៀងធ្លាក់រាយប៉ាយក្នុងកម្រិតពីតិចទៅច្រើនផងដែរ៕
