គណៈកម្មការទន្លេមេគង្គ ហៅកាត់ថា MRC បានស្នើឱ្យប្រទេសក្នុងតំបន់ចែករំលែកទិន្នន័យ និងកិច្ចសហប្រតិបត្តិការប្រកបដោយតម្លាភាព ដើម្បីធ្វើឱ្យការគ្រប់គ្រងទន្លេមេគង្គកាន់តែល្អឡើង។
ក្នុងសេចក្តីប្រកាសព័ត៌មានចេញផ្សាយកាលពីម្សិលមិញ គណៈកម្មការទន្លេមេគង្គបានលើកឡើងថា ភាពធំទូលាយនៃការចែករំលែកទិន្នន័យ តម្លាភាព និងកិច្ចសហប្រតិបត្តិការរវាងប្រទេសជាសមាជិក និងដៃគូសន្ទនា នឹងជួយធ្វើឱ្យការគ្រប់គ្រងទន្លេមេគង្គកាន់តែប្រសើរឡើង។
ភាពប្រសើរឡើងនៃការចែករំលែកទិន្នន័យ និងព័ត៌មាន នឹងជួយពង្រឹងសមត្ថភាពរបស់ប្រទេសកម្ពុជា ឡាវ ថៃ និងវៀតណាម ក្នុងការគ្រប់គ្រងធនធានទឹក និងធនធានចែករំលែកដទៃទៀតរបស់ទន្លេមេគង្គ សម្រាប់ជាប្រយោជន៍ឱ្យគ្នាទៅវិញទៅមក និងជួយដោះស្រាយជម្លោះផ្សេងៗផងដែរ។ នេះបើតាមសេចក្តីអត្ថាធិប្បាយបច្ចេកទេសរបស់គណៈកម្មការទន្លេមេគង្គលើការសិក្សាមួយរបស់ក្រុមហ៊ុនពិគ្រោះយោបល់ Eyes on Earth ដែលសិក្សាពីផលប៉ះពាល់នៃទំនប់នានាក្នុងប្រទេសចិន លើលំហូរដោយធម្មជាតិនៃទន្លេមេគង្គ។
នាយកក្រុមហ៊ុនពិគ្រោះយោបល់ Eyes on Earth លោក Alan Basist បានលើកឡើងក្នុងបទសម្ភាសន៍ជាមួយសារព័ត៌មានរ៉យទ័រកាលពីថ្ងៃទី១៣ ខែមេសា ថាចិនបានរឹតត្បិតបរិមាណទឹកហូរចេញមកនៅរដូវវស្សា ដែលធ្វើឱ្យបណ្តាប្រទេសខ្សែទឹកខាងក្រោមទទួលនូវគ្រោះរាំងស្ងួតដ៏ធ្ងន់ធ្ងរ។ ការសិក្សារបស់ក្រុមហ៊ុន Eyes on Earth ដែលទទួលថវិកាពីក្រសួងការបរទេសសហរដ្ឋអាមេរិក តាមរយៈគម្រោងគំនិតផ្តួចផ្តើមស្តីពីតំបន់មេគង្គក្រោម បានលើកឡើងថា ទឹកទាំងនោះត្រូវចិនរក្សាទុកក្នុងទំនប់វារីអគ្គិសនីដែលសាងសង់ក្នុងទឹកដីខ្លួន។ ទោះយ៉ាងណាក៏ដោយ ក្រសួងការបរទេសចិនបានទាត់ចោលការសិក្សានេះ ដោយថា កាលពីឆ្នាំមុន ពិតជាមានការរាំងស្ងួតខ្លាំងពិតមែន។
នាយកប្រតិបត្តិនៃលេខាធិការដ្ឋានគណៈកម្មការទន្លេមេគង្គ លោក អាន ពេជ្រហត្ថដា បានថ្លែងក្នុងសេចក្តីប្រកាសព័ត៌មានថា តម្រូវការសម្រាប់ប្រទេសទាំងអស់នៅតាមបណ្តោយទន្លេមេគង្គ ដើម្បីសម្រេចឱ្យបាននូវតុល្យភាពមួយរវាងអត្ថប្រយោជន៍នៃការអភិវឌ្ឍ យុត្តិធម៌សង្គម និងចីរភាពបរិស្ថាន គឺសំខាន់ខ្លាំងណាស់។ ការរៀបចំចែករំលែកទិន្នន័យប្រកបដោយតម្លាភាពមួយ ស្តីពីរបៀបប្រតិបត្តិការទឹក និងហេដ្ឋារចនាសម្ព័ន្ធនានា នឹងជួយឱ្យយើងគ្រប់គ្នាគ្រប់គ្រងហានិភ័យ និងចៀសវាងការភាន់ច្រឡំបាន។
លោកបន្ថែមទៀតថា ដើម្បីសម្រេចបានគោលដៅនេះ កិច្ចសហប្រតិបត្តិការពីគ្រប់ប្រទេសតាមអាងទន្លេ ការចែករំលែកទិន្នន័យ និងព័ត៌មានរបស់ប្រទេសទាំងនោះ ឱ្យទាន់ពេលវេលា និងមានតម្លាភាពស្តីពីការប្រើប្រាស់ទឹក និងហេដ្ឋារចនាសម្ព័ន្ធ គឺមានភាពចាំបាច់ណាស់។
អគ្គលេខាធិការគណៈកម្មាធិការជាតិទន្លេមេគង្គកម្ពុជា លោក សូ សុភ័ទ្ទ បានប្រាប់វីអូឌីតាមប្រព័ន្ធតេឡេក្រាម (Telegram) នៅថ្ងៃនេះថា ការចែករំលែកទិន្នន័យ និងព័ត៌មានក្នុងចំណោមប្រទេសជាសមាជិកគណៈកម្មការទន្លេមេគង្គ ដែលក្នុងនោះមានកម្ពុជា ឡាវ ថៃ និងវៀតណាម និងរួមទាំងជាមួយប្រទេសដៃគូសន្ទនា រួមមានចិន និងមីយ៉ាន់ម៉ា គឺមានលក្ខណៈល្អប្រសើរ។
លោកបានសរសេរបន្ថែមថា ៖ «កិច្ចការនេះត្រូវធ្វើជាបន្តដោយឈរលើកិច្ចសហប្រតិបត្តិការឱ្យកាន់តែល្អប្រសើរថែមទៀត រវាងគ្នានិងគ្នា ដើម្បីបន្តរួមគ្នាពុះពារជម្នះ និងដោះស្រាយនូវបញ្ហាប្រឈមរួមក្នុងអាងទន្លេមេគង្គ ក្នុងបរិបទនៃបម្រែបម្រួលអាកាសធាតុ សម្រាប់ធានាបាននូវសន្តិសុខទឹក ស្បៀងអាហារ ថាមពល និងនិរន្តរភាពបរិស្ថាននៃអាងទន្លេមេគង្គ»។
បើតាមលោក សូ សុភ័ទ្ទ ប្រទេសជាសមាជិកគណៈកម្មការទន្លេមេគង្គបានអនុម័ត និងបាននឹងកំពុងអនុវត្តនីតិវិធីស្តីពីការចែករំលែក និងផ្លាស់ប្តូរទិន្នន័យ និងព័ត៌មាន។ នាពេលបច្ចុប្បន្ន គណៈកម្មការទន្លេមេគង្គ ក៏បាននឹងកំពុងធ្វើទំនើបកម្មប្រព័ន្ធព័ត៌មានរបស់ខ្លួន ដើម្បីរួមគ្នាជាមួយប្រទេសជាសមាជិក ទទួលបាននូវទិន្នន័យ ព័ត៌មាន ជួយគាំទ្រដល់ការរៀបចំផែនការ ការយល់ដឹងអំពីស្ថានភាពអាងទន្លេ និងការគ្រប់គ្រង និងអភិវឌ្ឍធនធានទឹក និងធនធានពាក់ព័ន្ធក្នុងអាងទន្លេមេគង្គប្រកបដោយចីរភាព ក្នុងក្របខ័ណ្ឌតំបន់ និងសម្រាប់ប្រទេសតាមដងទន្លេមេគង្គ៕
