ប្រទេសថៃ កាលពីម្សិលមិញ បានចេញសេចក្តីប្រកាសតាមរយៈក្រសួងសុខាភិបាលរបស់ខ្លួន ដាក់ប្រទេសជាសមាជិកអាស៊ានចំនួន ៥ ក្នុងបញ្ជីប្រទេសដែលមានហានិភ័យខ្ពស់នៃការឆ្លងកូវីដ១៩ ដែលក្នុងនោះក៏មានប្រទេសកម្ពុជាផងដែរ។
ប្រទេសម៉ាឡេស៊ី កម្ពុជា ឡាវ ឥណ្ឌូនេស៊ី និងមីយ៉ាន់ម៉ា ត្រូវបានថៃចាត់ទុកថា មានអត្រាខ្ពស់នៃការឆ្លងជំងឺកូវីដ១៩ ក្នុងចំណោមបណ្តាប្រទេសអាស៊ានទាំងអស់។ សេចក្តីប្រកាសខាងលើបានឱ្យដឹងថា ស្ថានភាពនៃជំងឺកូវីដ១៩ នៅក្នុងប្រទេសទាំង ៥ ខាងលើ មានលក្ខណៈខ្លាំងឡើងៗ។
សេចក្តីប្រកាសដដែលបានឱ្យដឹងថា ប្រទេសថៃមានហានិភ័យខ្ពស់នៃការឆ្លងជំងឺកូវីដ១៩ តាមរយៈអ្នកធ្វើដំណើរមកពីបណ្តាប្រទេសដែលមានព្រំដែនជាប់ប្រទេសថៃ ឬប្រទេសដែលមានព្រំដែនជាប់ប្រទេសដែលកំពុងតែស្ថិតនៅក្នុងស្ថានការណ៍ឆ្លងជំងឺខ្ពស់ឥតឈប់ឈរ។ ក្រសួងសុខាភិបាលថៃថា សេចក្តីប្រកាសនេះធ្វើឡើងដើម្បីជាប្រយោជន៍ដល់ការការពារខ្លួន និងគ្រប់គ្រងជំងឺកូវីដ១៩ ដែលអាចចូលមកក្នុងប្រទេសថៃ និងដើម្បីឱ្យដំណើរការប្រុងប្រយ័ត្ន ការពារ និងគ្រប់គ្រងជំងឺកូវីដ១៩ ប្រកបដោយប្រសិទ្ធភាពផងដែរ។ សេចក្តីប្រកាសរបស់ក្រសួងសុខាភិបាលថៃនេះ នឹងត្រូវបានដកចេញនៅពេលដែលស្ថានភាពរបស់ជំងឺកូវីដ១៩ ក្នុងបណ្តាប្រទេសទាំងនោះមានលក្ខណៈល្អប្រសើរឡើងវិញ។
ប្រទេសថៃ កាលពីដើមខែមីនាកន្លងមក បានប្រកាសដាក់ប្រទេសចំនួន ៤ រួមមាន ប្រទេសចិន (រួមបញ្ចូលហុងកុង និងម៉ាកាវផងដែរ) កូរ៉េខាងត្បូង អ៊ីតាលី និងអ៊ីរ៉ាក់ ក្នុងបញ្ជីប្រទេសងាយនឹងឆ្លងជំងឺកូវីដ១៩ ខ្ពស់។
អ្នកនាំពាក្យក្រសួងការបរទេស លោក កុយ គួង បានបញ្ជាក់ថា លោកមិនទាន់បានទទួលព័ត៌មានអំពីការដាក់ប្រទេសកម្ពុជាក្នុងចំណោមប្រទេសដែលឆ្លងជំងឺកូវីដ១៩នៅឡើយទេ។
ទោះជាយ៉ាងណាក៏ដោយ លោកបានលើកឡើងថា កម្ពុជាមិនមែនជាប្រទេសដែលមានករណីកូវីដ១៩ ច្រើនជាងគេក្នុងតំបន់អាស៊ាននោះទេ។ លោកបានបន្តថា ករណីកន្លងមក ច្រើនតែនាំចូលមកពីបរទេស។
លោកបានបន្ថែមថា៖ «ក្នុងអាស៊ានហ្នឹង ថៃ និងកម្ពុជា អ្នកណាច្រើនជាងអ្នកណា? ហើយកម្ពុជាយើង កន្លងមក ជនជាតិយើង [ដែលឆ្លង] តិចតួចទេ ច្រើនតែភ្ញៀវ [ដែលឆ្លង]។ សរុបកន្លងមក[កម្ពុជា] មានតែ ១២២នាក់ ហើយជិតជាអស់ហើយហ្នឹង។ យើងមើលទៅសភាពការណ៍ហ្នឹងសមនឹងការប្រកាសរបស់គេ ឬអត់? យើងគ្រាន់តែគិតមើល យើងក៏ដឹងដែរ»។
សាស្ត្រាចារ្យផ្នែកសិក្សាពីអាស៊ាន នៅសកលវិទ្យាល័យ Naresuan ប្រទេសថៃ លោក Paul Chambers បានឱ្យ VOD ដឹងតាមសារអេឡិចត្រូនិចអ៊ីម៉ែលថាក្រសួងសុខាភិបាលថៃប្រហែលជាមិនជឿពីចំនួនអ្នកឆ្លងកូវីដ១៩ក្នុងចំនួនដ៏តិចដែលកម្ពុជារកឃើញកន្លងមក ទើបបានជាប្រទេសនេះដាក់កម្ពុជាក្នុងបញ្ជីប្រទេសដែលមានហានីភ័យនៃការឆ្លងជំងឺនេះខ្ពស់បែបនេះ។
ទោះយ៉ាងណាក៏ដោយ រហូតមកទល់ពេលនេះ ប្រទេសថៃមានចំនួនអ្នកឆ្លងជំងឺកូវីដ១៩ ខ្ពស់លំដាប់ទី ៥ នៃបណ្ដាប្រទេសអាស៊ានទាំង ១០ ដែលមានអ្នកឆ្លងចំនួន ២៨២៦នាក់ ជាសះស្បើយចំនួន ២៣៥២នាក់ និងអ្នកស្លាប់ចំនួន ៥០នាក់ ខណៈប្រទេសកម្ពុជាស្ថិតក្នុងលំដាប់ទី ៨ ដែលមានអ្នកឆ្លងចំនួន ១២២នាក់ ព្យាបាលជាសះស្បើយចំនួន ១១០នាក់ និងមិនមានអ្នកស្លាប់ដោយសារជំងឺនេះនោះទេ។
កម្ពុជា និងថៃ បានបិទព្រំដែនរវាងគ្នានិងគ្នាតាំងពីចុងខែមីនា ដើម្បីទប់ស្កាត់ការរីករាលដាលនៃជំងឺកូវីដ១៩។ រហូតមកដល់ពេលនេះ ប្រទេសទាំងពីរមិនទាន់បញ្ជាក់ថា នឹងបើកព្រំដែនឱ្យដំណើរការជាធម្មតាវិញនៅពេលណានោះទេ៕