សិង្ហបុរី កំពុងដំណើរការសាងសង់សាលត្រៀមសម្រាប់អ្នកជំងឺកូវីដ១៩ ចំនួន ១ម៉ឺន ៥ពាន់នាក់ នៅកំពង់ផែ Tanjong Pagar Terminal ខណៈករណីឆ្លងក្នុងប្រទេសបន្តកើនឡើងខ្លាំងជាប់ៗគ្នាប្រមាណ ១ពាន់ករណីក្នុងមួយថ្ងៃ ដែលភាគច្រើនលើពលករបរទេសស្នាក់នៅជុំគ្នា។ នេះដោយយោងតាមប្រភពពីសារព័ត៌មានសិង្ហបុរីមួយចុះផ្សាយនៅថ្ងៃម្សិលមិញ។
តាមប្រភពពីកាសែត The StraitTimes ដែលបានស្រង់សម្តីអ្នកនាំពាក្យឱ្យក្រសួងអភិវឌ្ឍន៍ជាតិសិង្ហបុរី បានឱ្យដឹងថា សាលនេះរៀបចំឡើងដើម្បីការពារកង្វះខាតទីតាំង ឬគ្រែសម្រាប់ដាក់អ្នកជំងឺកូវីដ១៩ថ្មីៗនៅថ្ងៃខាងមុខ រាប់ទាំងពលករជាប់សង្ស័យឆ្លង បានឆ្លង និងបានជាសះស្បើយ។
តាមប្រភពដដែល នៅរយៈពេលប៉ុន្មានសប្តាហ៍ចុងក្រោយនេះ អាជ្ញាធរសិង្ហបុរីបានរៀបចំទីតាំងផ្សេងៗជាច្រើនកន្លែង រួមមាន បន្ទាយយោធា អាគាររដ្ឋ និងកប៉ាល់ទេសចរណ៍ណាដែលទំនេរជាដើម ដើម្បីដាក់ពលករបរទេសដែលមានសុខភាពល្អធម្មតាឱ្យនៅដាច់ដោយឡែក។
ការត្រៀមដូច្នេះ គឺដោយសារប្រទេសអាស៊ានមួយនេះកំពុងប្រឈមនឹងរលកចម្លងដំណាក់កាលទី៣ កើតលើពលករបរទេសប្រមាណ ២សែននាក់ រស់នៅផ្តុំគ្នាតាមអន្តេវាសិកដ្ឋានចំនួន ៤៣កន្លែង និងខណៈរលកទី២ ដែលបណ្តាលឱ្យមានការចម្លងជាលក្ខណៈសហគមន៍មិនទាន់សាបរលាប។
រលកថ្មីនេះ ក្រុមអ្នកជំនាញសុខភាពសាធារណៈ មើលឃើញថា គឺដោយសារអាជ្ញាធរមើលរំលងហានិភ័យនៃការឆ្លងរាតត្បាតក្នុងចំណោមពលករចំណាកស្រុក ដែលជាក្រុមមនុស្សងាយរងគ្រោះពីជំងឺឆ្លងបំផុត។
គិតត្រឹមថ្ងៃសុក្រនេះ រដ្ឋអាស៊ានដែលមានប្រជាជនជាង ៥លាន ៦សែននាក់នេះ រកឃើញករណីឆ្លងកូវីដ១៩ ជាង ១ម៉ឺនករណី (១១ ១៧៨) ក្នុងនោះ ជិត ៧ពាន់ករណី រកឃើញក្នុងរយៈពេល ១សប្តាហ៍ចុងក្រោយ ដោយភាគច្រើនជាពលករអន្តោប្រវេសន៍។ នេះបើយោងតាមរបាយការណ៍ពីក្រសួងសុខាភិបាលសិង្ហបុរី។
នាយករដ្ឋមន្រ្តីសិង្ហបុរី លោក លី ស៊ានឡុង កាលពីថ្ងៃអង្គារ បានប្រកាសតាមប្រព័ន្ធផ្សព្វផ្សាយក្នុងស្រុក ឱ្យបន្តវិធានការរឹតបន្ដឹងការធ្វើដំណើរ និងជួបជុំ រហូតដល់ថ្ងៃទី៤ ខែឧសភា ហើយនឹងបន្ថែម ៤សប្តាហ៍ទៀត បើស្ថានភាពឆ្លងរាលដាលមិនធ្លាក់ចុះ។
ក្រៅពីសិង្ហបុរី ប្រទេសអាស៊ាន ៣ទៀត រួមមាន ឥណ្ឌូនេស៊ី ម៉ាឡេស៊ី និងហ្វីលីពីន ក៏កំពុងបង្កើនវិធានការកាត់ផ្តាច់ចរន្តចម្លងរបស់មេរោគ និងពន្យារពេលដកចេញវិធានការទាំងនេះ ខណៈវៀតណាមកំពុងបន្ធូរបន្ថយ ឯថៃកំពុងគ្រោង ដើម្បីខ្យល់ដង្ហើមសេដ្ឋកិច្ចដែលកំពុងរាំងស្ទះដោយសារវិបត្តិជំងឺឆ្លងសកល។
តាមទីភ្នាក់ងារសារព័ត៌មាន Reuters ចុះផ្សាយនៅថ្ងៃម្សិលមិញ អាជ្ញាធរឥណ្ឌូនេស៊ីបានប្រកាសបិទចរាចរណ៍តាមផ្លូវអាកាស និងផ្លូវទឹក នៅទូទាំងប្រទេស ពីថ្ងៃសុក្រនេះរហូតដល់ដំណាច់ខែឧសភា ដើម្បីបញ្ចៀសការឆ្លងរាលដាលបន្ថែមទៀត និងទប់ស្កាត់ការប្រមូលផ្តុំគ្នាធ្វើពិធីស្រាយបួសរបស់ពលរដ្ឋ។
នាយករដ្ឋមន្រ្តីម៉ាឡេស៊ីថ្មី លោក Muhyiddin Yassin បានប្រកាសលើកពេលដកបម្រាមអាជីវកម្ម និងការធ្វើដំណើរ ជាលើកទី៣ ដោយត្រូវបន្តរហូតដល់ថ្ងៃទី១២ ខែឧសភា បើទោះជាករណីឆ្លងថ្មីថមថយក្តី។
តាមសម្រង់សម្តីលើទំព័រកាសែត Malaymail ចុះផ្សាយនៅថ្ងៃមិ្សលមិញ លោក Yassin បញ្ជាក់ថា វិធានការនេះនឹងបន្តរហូតដល់ការរាលដាលនៃមេរោគអាចគ្រប់គ្រងបានទាំងស្រុង ហើយលោកនឹងតាមដានស្ថានការវិវដ្តរបស់វាដើម្បីកំណត់ជំហានបន្ទាប់។
ដោយឡែក ប្រធានាធិបតីហ្វីលីពីន លោក Rodrigo Duterte បានសម្រេចបន្តការបិទរដ្ឋធានីម៉ានីល រួមទាំងកោះ Luzon ដដែល រហូតដល់ពាក់កណ្តាលខែឧសភា ប៉ុន្តែ អ្នកនាំពាក្យរបស់លោកថា អាជ្ញាធរនឹងបន្ធូរការរឹតបន្តឹងនៅតំបន់ដែលមានហានិភ័យទាប។
ថៃវិញ តាមប្រភពពីកាសែត Bangkok Post បានឱ្យដឹងថា ក្រុមប្រឹក្សាសន្តិសុខជាតិ កំពុងត្រៀមសំណើទៅនាយករដ្ឋមន្រ្តីនៅថ្ងៃចន្ទសប្តាហ៍ក្រោយ លើការគិតគូរបន្ធូរវិធានការរឹតបន្តឹងការធ្វើដំណើរ ដោយបើកឱ្យអាជីវកម្ម និងសកម្មភាពប្រចាំថ្ងៃមួយចំនួនអាចដំណើរការវិញ ខណៈករណីឆ្លងថ្មីប្រចាំថ្ងៃធ្លាក់ចុះទាបក្រោម ២០ករណីនៅប៉ុន្មានថ្ងៃចុងក្រោយ។
វៀតណាម បានចាប់ផ្តើមបន្ធូរបន្ថយការរឹតបន្តឹងការធ្វើដំណើរ និងគម្លាតសុវត្ថិភាពចាប់ពីថ្ងៃម្សិលមិញ បន្ទាប់ពីវិធានការដាក់នៅដោយឡែក និងបង្កើនការតេស្តរកអ្នកប៉ះប្រាស្រ័យអ្នកជំងឺក្នុងទ្រង់ទ្រាយធំធ្វើឡើងទាន់ពេលវេលា ដែលធ្វើឱ្យករណីឆ្លងថ្មីធ្លាក់ចុះដល់សូន្យករណី ៨ថ្ងៃជាប់ៗគ្នា។
បើតាមតួលេខពី The Asean Post នៅថ្ងៃសុក្រនេះ អាស៊ានរកឃើញករណីឆ្លងជំងឺកូវីដ១៩ សរុបជាង ៣ម៉ឺន ៥ពាន់ករណី ក្នុងនោះ សិង្ហបុរីឈរនៅលំដាប់លេខ១ មានជាង ១ម៉ឺនករណី តាមពីក្រោយដោយឥណ្ឌូនេស៊ី មានជិត ៨ពាន់ករណី (៧៧៧៥) ហ្វីលីពីន ជិត ៧ពាន់ករណី (៦៩៨១) ម៉ាឡេស៊ី មានជាង ៥ពាន់ករណី (៥៦០៣) ថៃ មានជិត ៣ពាន់ករណី (២៨៣៩) វៀតណាម មាន ២៦៨ករណី ប៊្រុយណេ កម្ពុជា និងឡាវ មានជាង ១រយករណី ឯឡាវ មាន ១៩ករណី៕