ឪពុកម្តាយ និងអាណាព្យាបាលសិស្សរៀននៅសាលាឯកជនលំដាប់អន្តរជាតិចំនួន៣ នៅក្នុងរាជធានីភ្នំពេញ បានតវ៉ាទាមទារឱ្យមានការបញ្ចុះតម្លៃ ដោយសារ ពួកគាត់បាត់បង់ចំណូល ព្រោះមេរោគកូវីដ១៩ ឆ្លងរាលដាល។
សាលាឯកជនលំដាប់អន្តរជាតិទាំង៣នេះ រួមមាន សាលាស៊ីអាយអេ សាលាហ្វូតព្រីន និងសាលាផារ៉ាហ្គន បង្រៀនសិស្សនៅថ្នាក់ចំណេះដឹងទូទៅពីថ្នាក់មត្តេយ្យដល់ថ្នាក់ទី១២ ដែលតម្រូវឱ្យសិស្សម្នាក់ត្រូវបង់ថ្លៃពីរាប់ពាន់ទៅក្បែរម៉ឺនដុល្លារក្នុង១ឆ្នាំ។ នៅក្នុងសប្តាហ៍នេះ ឪពុកម្តាយសិស្សនៅតាមសាលាខ្លះផ្ទុះការតវ៉ាម្តង ខ្លះ២ដង ហើយបើមិនទាន់មានដំណោះស្រាយ ពួកគេនឹងតវ៉ាបន្តទៀតនៅដើមសប្តាហ៍ក្រោយ។
កាលពីថ្ងៃទី២២ ខែមេសា ឪពុកម្តាយសិស្សនៅសាលាស៊ីអាយអេ បានតវ៉ាទាមទារឱ្យបញ្ចុះថ្លៃបង់សាលា ៥០% ចំពោះការបង្រៀនសិស្សតាមអនឡាញ។ ដោយសារការតវ៉ានោះមិនបានផល នៅថ្ងៃសៅរ៍ ទី២៥នេះ ឪពុកម្តាយសិស្សតវ៉ាម្តងទៀត ទាមទារឱ្យបញ្ចុះតម្លៃត្រឹម ៤៥% វិញ ប៉ុន្តែ នៅមិនទាន់មានការឯកភាពគ្នា ទើបឪពុកម្តាយសិស្សសម្រេចដាក់សំណើទៅក្រសួងអប់រំនៅដើមសប្តាហ៍ក្រោយ។
កាលពីថ្ងៃសុក្រ ទី២៤ ខែមេសា ម្សិលមិញ ឪពុកម្តាយនៅសាលាហ្វូតព្រីន និង នៅសាលាផារ៉ាហ្គន បានផ្ទុះការតវ៉ានៅសាលាដែលកូនពួកគាត់រៀនដូចគ្នា ប៉ុន្តែ មិនទាន់ទទួលលទ្ធផលទេ។
ក្រោយការតវ៉ា សាលាហ្វូតព្រីនអន្តរជាតិ បានចេញសេចក្តីថ្លែងការណ៍ ដោយសម្តែងការសោកស្តាយចំពោះហេតុការណ៍តវ៉ានេះ។ សាលាបញ្ជាក់ថា ពួកគេបានខិតខំប្រឹងប្រែងបណ្តុះបណ្តាលកូនសិស្ស ហើយសូមឱ្យឪពុកម្តាយដែលជួបបញ្ហាស្នើសុំជួបសាលាផ្ទាល់ ដើម្បីដោះស្រាយ ដូចយនុ្តការដែលធ្លាប់ប្រើកន្លងមក។
ឪពុកម្តាយដែលតវ៉ាបានថ្លែងប្រាប់វីអូឌីថា ការងារ និងមុខរបររបស់ពួកគាត់បានប៉ះពាល់ដោយសារតែមេរោគកូវីដ១៩ ឆ្លងរាលដាល ដូច្នេះ ពួកគាត់សុំឱ្យខាងសាលាមានការយោគយល់ ហើយបញ្ចុះតម្លៃ។
លោក ប៉ា ចន្ទរឿន មានកូនរៀននៅសាលស៊ីអាយអេ ថ្លែងថា ការរៀនអនឡាញគុណភាពមិនដូចរៀនផ្ទាល់ទេ ដូច្នេះ លោកស្នើឱ្យមានការបញ្ចុះតម្លៃខ្លះ ដើម្បីជួយសម្រួលដល់ឪពុកម្តាយ ឬអាណាព្យាបាលដែលកំពុងជួបការលំបាក។
លោក ប៉ា ចន្ទរឿន៖ «នេះជាការជួបជុំគ្នាទាមទារឱ្យសាលាបញ្ចុះតម្លៃ ដោយសារការសិក្សាអនឡាញដែលបានធ្វើកន្លងមក ដោយសារបញ្ហាកូវីដ មួយទៀតដោយសារការសិក្សាអនឡាញនេះ គុណភាពមិនដូចការសិក្សាផ្ទាល់ទេ»។
សាលាអន្តរជាតិស៊ីអាយអេ ថ្លៃបង់ពី ៤០០០ ទៅ ៧៨០០ដុល្លារ សាលាអន្តរជាតិហ្វូតព្រីន ថ្លៃបង់ចាប់ពីប្រមាណ ៣ ០០០ ទៅជិត ៧០០០ដុល្លារ ចំណែក សាលាផារ៉ាហ្គន តម្លៃចន្លោះពី ៥ ០០០ ទៅ ៧៧៨០ដុល្លារ៕