មន្ត្រីជាន់ខ្ពស់ក្រសួងសង្គមកិច្ច លោក តូច ចាន់នី បានអះអាងថា ការដោះស្រាយបញ្ហាជនអនាថា វាមានការលំបាកប្រៀបបាននឹងការវែកចក ដោយថា ជនងាយរងគ្រោះទាំងនោះ មិនទទួលយកសេវារបស់រដ្ឋឡើយ។
ការថ្លែងរបស់មន្ត្រីជាន់ខ្ពស់នៅក្រសួងសង្គមកិច្ច អតីតយុទ្ធជន និងយុវនីតិសម្បទានេះ ធ្វើឡើងក្នុងសន្និសីទសារព័ត៌មានក្នុងរាជធានីភ្នំពេញ នៅថ្ងៃអង្គារនេះ។
លោក តូច ចាន់នី ថ្លែងថា៖ «មែនទែនទៅ បញ្ហាជនអនាថានេះ ជាបញ្ហាស្មុគស្មាញខ្លាំងណាស់ ដូចវែកចកអ៊ីចឹង ខ្ញុំសូមជម្រាប។ ក្រសួងមានវិធានការ មានចំណាត់ការគ្រប់គ្រាន់សម្រាប់ដោះស្រាយបញ្ហានេះ។ ប៉ុន្តែ ខ្ញុំសូមជម្រាបថា បញ្ហាជនអនាថានេះ យើងពិបាកដោះស្រាយបំផុត»។
មន្ត្រីរូបនេះ អះអាងថា ការលំបាកទាំងនោះ ដោយសារជនងាយរងគ្រោះទាំងនោះមិនទទួលយកសេវាដែលក្រសួងរៀបចំឱ្យដូចជា អាហារ ៣ពេលក្នុងមួយថ្ងៃ ការអប់រំ និងការបណ្តុះបណ្តាលវិជ្ជាជីវៈ ជាដើម។
ការលំបាកមួយទៀត លោកថា ជនអនាថាខ្លះ ត្រូវបានគេយកធ្វើអាជីវកម្មឱ្យដើរសុំទាន និងខ្លះមានការលូកដៃពីនយោបាយដែលមិនគាំទ្ររដ្ឋាភិបាល។
ប៉ុន្តែ មន្ត្រីរដ្ឋាភិបាលរូបនេះមិនបានបញ្ជាក់ថា មានជនងាយរងគ្រោះប៉ុន្មានភាគរយពិតប្រាកដ ដែលមិនទទួលយកសេវារបស់រដ្ឋាភិបាលនេះទេ។
លោក តូច ចាន់នី ឱ្យVODដឹងបន្ថែមថា ក្នុងឆ្នាំ២០១៩ ក្រសួងបានប្រមូលជនអនាថាជាង ១០០០នាក់ ដាក់ចូលកក្នុងមណ្ឌល ដើម្បីអប់រំ ផ្តល់សេវា និងបញ្ចូលពួកគាត់ក្នុងសហគមន៍វិញ។ ប៉ុន្តែថា ការខំប្រឹងប្រែងនោះទទួលបានជោគជ័យតិចតួចបំផុត។
លោក តូច ចាន់នី ប្រាប់ថា៖ «ខ្ញុំជម្រាបតាមត្រង់ ជោគជ័យនៃកិច្ចការនេះ វាតិចតួចណាស់ ទី១ គាត់មិនព្រមទទួលយក។ ទី២ គាត់មិនសហការជាមួយយើងទេ។ អ៊ីចឹង ដូចខ្ញុំបានបញ្ជាក់អ៊ីចឹង ការងារសង្គមកិច្ចនេះ វាត្រូវការចូលរួមគ្រប់មុខសញ្ញា បើគាត់មិនចូលរួមជាមួយយើង យើងធ្វើអីក៏មិនជោគជ័យដែរ។ នេះជាបញ្ហា»។
នាយករងអង្គការលីកាដូទទួលបន្ទុកឃ្លាំមើលសិទ្ធិមនុស្ស លោក អំ សំអាត ផ្តល់ជាយោបល់ថា ភាពជោគជ័យនៃវិធានការនេះ វាចាំបាច់ណាស់ ហើយមណ្ឌលត្រូវធានាសិទ្ធិរស់នៅសមរម្យ និងសេរីភាពនៃការដើរហើរផងដែរ។
លោក អំ សំអាត ប្រាប់ថា៖ «ខ្ញុំជឿថា ពលរដ្ឋគ្រប់រូបគ្មាននរណាចង់ប្រកបមុខរបរហ្នឹងទេ។ ប៉ុន្តែ បើគាត់មានមុខរបរអីផ្សេងអាចទ្រទ្រង់ជីវភាពគាត់បាន គាត់នឹងជ្រើសរើសយកហើយ ពីព្រោះវាជារឿងមួយត្រឹមត្រូវសម្រាប់ពួកគាត់»។
អតីតមន្ត្រីជាន់ខ្ពស់គណបក្សប្រឆាំង លោក មាជ សុវណ្ណារ៉ា និយាយថា រដ្ឋាភិបាលមានកាតព្វកិច្ចដោះស្រាយបញ្ហាសង្គម បើការដោះស្រាយណាមួយបរាជ័យ វាជាម៉ែត្រវាស់សមត្ថភាពរដ្ឋាភិបាល មិនមែនជាការទម្លាក់កំហុសទៅលើក្រុមអ្នកនយោបាយផ្សេងនោះទេ។
លោក មាជ សុវណ្ណារ៉ា ប្រាប់ថា៖ «ក្នុងសង្គមប្រជាធិបតេយ្យ រដ្ឋាភិបាលជាខ្ញុំកញ្ជះរបស់ប្រជាពលរដ្ឋ […] ហើយបើយើងអត់ចេះថ្នមម៉ែឪយើងជាម្ចាស់ប្រទេសនោះ អាហ្នឹងជាបញ្ហា យើងកុំចោទដាក់គ្នា ដោយសារយើងអសមត្ថភាព»។
ទោះយ៉ាងណា ក្នុងសន្និសីទនោះ លោក តូច ចាន់នី បានត្អូញត្អែរពីការលំបាកបញ្ហាធនធានមនុស្ស ដែលលោកថា មិនសមាមាត្រទៅនឹងបញ្ហាសង្គមដែលបានកើតឡើងសម្រាប់ពលរដ្ឋជាង ១៥លាននាក់នោះ។
បើតាមលោក តូច ចាន់នី ដើម្បីពង្រឹងប្រសិទ្ធភាពការងារបច្ចុប្បន្ន ក្រសួងសម្រេចទុកតែ ២២៣មណ្ឌលប៉ុណ្ណោះ ក្នុងនោះមណ្ឌលថែទាំក្មេង ១២៣កន្លែង និងមានអង្គការជាដៃគូចំនួន ១៤១ ហើយថា នៅភ្នំពេញមានមណ្ឌលព្រៃស្ពឺ។
លោកនាយករដ្ឋមន្ត្រី ហ៊ុន សែន បានគំរាមពីលទ្ធភាពបិទមណ្ឌលព្រៃស្ពឺកាលពីឆ្នាំ២០១៦ បើគ្មានការកែប្រែប្រព័ន្ធគ្រប់គ្រងនោះ។
សារព្រមានរបស់នាយករដ្ឋមន្ត្រី បានកើតឡើងក្រោយពីសង្គមស៊ីវិលរកឃើញថា មណ្ឌលស្ដារកាយសម្បទាមួយនេះ ប្រៀបបាននឹងកន្លែងធ្វើទារុណកម្ម និងបង្ខាំងមនុស្សរហូតមានអ្នកស្លាប់៕