លោកនាយករដ្ឋមន្ត្រី ហ៊ុន សែន ប្រាប់ទៅប្រជាពលរដ្ឋបើកបរត្រូវគោរពច្បាប់ចរាចរណ៍ ដោយថា ការរឹតបន្តឹងច្បាប់ចរាចរណ៍នេះ គឺដើម្បីធានាសុវត្ថិភាពអាយុជីវិតប្រជាពលរដ្ឋនៅទូទាំងប្រទេស។
លោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសប៊ុករបស់លោកនៅព្រឹកនេះថា នៅពេលនេះ ការរឹតបន្តឹងច្បាប់ចរាចរណ៍ គឺកំពុងដំណើរការនៅទូទាំងប្រទេស ករណីនេះ ប្រជាពលរដ្ឋ ជាពិសេសយុវជន មុននឹងបើកបររថយន្តត្រូវមានបណ្ណបើកបរពិតប្រាកដត្រឹមត្រូវ។
លោកបន្តថា ការរឹតបន្តឹងច្បាប់ចរាចរណ៍នេះ ដើម្បីធានាសុវត្ថិភាពអាយុជីវិតរបស់ប្រជាពលរដ្ឋនៅទូទាំងប្រទេស និងចៀសវាងគ្រោះថ្នាក់ផ្សេងៗ ដែលអាចបង្ករបួសស្នាមធ្ងន់ស្រាលរហូតដល់មានការបាត់បង់អាយុជីវិតទៀតផង។
តាមទំព័រហ្វេសប៊ុកលោកនាយករដ្ឋមន្ត្រី ហ៊ុន សែន៖ «យើងមិនចង់ឃើញករណីគ្រោះថ្នាក់ចរាចរណ៍កើតមាននៅក្នុងក្រុមគ្រួសាររបស់បងប្អូនណាម្នាក់ឡើយ។ សូមបងប្អូនប្រជាពលរដ្ឋ និងក្មួយៗយុវជន បើកបរដោយមានការប្រុងប្រយ័ត្នខ្ពស់ ជាមួយនឹងការយោគយល់ដល់គ្នាទៅវិញទៅមក ដើម្បីសុខសុវត្ថិភាពទាំងអស់គ្នានៅទូទាំងប្រទេស»។
ក្រៅពីប្រាប់ទៅប្រជាពលរដ្ឋឱ្យប្រុងប្រយ័ត្ននោះ លោក ហ៊ុន សែន ថា ចំពោះរថយន្តវិញត្រូវបង់ពន្ធ និងបង់ថ្លៃសេវាផ្សេងៗឱ្យបានត្រឹមត្រូវមុននឹងបញ្ជាយានយន្តនៅលើដងផ្លូវសាធារណៈផងដែរ។
កាលពីថ្ងៃទី១៧ ខែមីនាកន្លងទៅ រដ្ឋាភិបាលបានចេញនូវអនុក្រឹត្យមួយស្ដីពីការតំឡើងការផាកពិន័យចរាចរណ៍ថ្មី ដែលមានការដំឡើងពី ៣ ដល់ ៥ដង នៃប្រាក់ពិន័យបច្ចុប្បន្ន ដែលតម្លៃនៃការផាកពិន័យចំពោះការប្រព្រឹត្តបទល្មើសចរាចរណ៍ទាបបំផុត ក៏មានតម្លៃ ៦ម៉ឺនរៀលដែរ។ វិធានការផាកពិន័យនៃច្បាប់ចរាចរណ៍ថ្មី នឹងអនុវត្តចាប់ថ្ងៃទី១ ខែឧសភាខាងមុខនេះតទៅ៕