អគ្គស្នងការនគរបាលកម្ពុជា បានប្រកាសប្រាប់ពលរដ្ឋអំពីការចាប់ផ្ដើមអនុវត្តការផាកពិន័យថ្មីទៅលើអ្នកបើកបរល្មើសច្បាប់ចរាចរណ៍ ហើយក៏បានបញ្ជាទៅមន្ត្រីនគរបាលចរាចរណ៍ទូទាំងប្រទេស ឱ្យរឹតបន្តឹងការអនុវត្តច្បាប់ចរាចរណ៍ចាប់ពីដើមខែក្រោយ។
អគ្គស្នងការនគរបាលជាតិ លោក នេត សាវឿន បានប្រកាស និងចេញបញ្ជាបែបនេះនៅក្នុងសេចក្ដីជូនដំណឹងមួយកាលពីថ្ងៃម្សិលមិញនេះ តែ ២ថ្ងៃប៉ុណ្ណោះមុនការចាប់ផ្ដើមអនុវត្តការផាកពិន័យថ្មីទៅតាមអនុក្រឹត្យចេញដោយរដ្ឋាភិបាលកាលពីពាក់កណ្ដាលខែមីនាកន្លងមកនេះ។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន មានប្រសាសន៍ថា ការរឹតបន្តឹងក្នុងការផាកពិន័យធ្ងន់ធ្ងរ ដើម្បីឱ្យប្រជាពលរដ្ឋខ្លាច និងប្រុងប្រយ័ត្នខ្ពស់នៅពេលបើកបរ ទើបកាត់បន្ថយអត្រាអ្នកស្លាប់ និងរងរបួសបាន។
លោក ឆាយ គឹមខឿន មានប្រសាសន៍ថា៖ «ការរឹតបន្តឹងនេះ ដើម្បីកាត់បន្ថយគ្រោះថ្នាក់…គឺគាត់នាំគ្នាគោរពច្បាប់ទាំងអស់គ្នា គ្រោះថ្នាក់ចរាចរណ៍មានការថយចុះ មនុស្សស្លាប់ ឬរបួសគ្រោះថ្នាក់ចរាចរណ៍ក៏ថយចុះ ជីវភាពសង្គម និងជីវភាពគ្រួសារពលរដ្ឋក៏មានការកើនឡើង»។
បើតាមអនុក្រឹត្យថ្មី អ្នកបើកបរល្មើសគំនូសសញ្ញា ភ្លើង និងច្បាប់ចរាចរណ៍ នឹងត្រូវមន្ត្រីនគរបាលផាកពិន័យយ៉ាងទាបបំផុត ៦ម៉ឺនរៀល រហូតដល់ចំនួន ៨០ម៉ឺនរៀលសម្រាប់អ្នកបើកបរទោចក្រយានយន្ត ឬម៉ូតូ។ សម្រាប់អ្នកប្រើប្រាស់រថយន្ត ពួកគេនឹងត្រូវរងការផាកយ៉ាងទាបបំផុត ៧ម៉ឺន ៥ពាន់រៀល រហូតដល់ខ្ពស់បំផុត ២លាន ៤សែនរៀល។
នៅថ្ងៃនេះផងដែរ លោកនាយករដ្ឋមន្ត្រី ហ៊ុន សែន អំពាវនាវតាមទំព័រហ្វេសប៊ុករបស់លោកទៅប្រជាពលរដ្ឋ ជាពិសេសយុវជន មុននឹងបើកបររថយន្ត ត្រូវមានបណ្ណបើកបរពិតប្រាកដត្រឹមត្រូវ។ រីឯរថយន្តវិញ ត្រូវបង់ពន្ធ និងបង់ថ្លៃសេវាផ្សេងៗឱ្យបានត្រឹមត្រូវ មុននឹងបញ្ជាយានយន្តនៅលើដងផ្លូវសាធារណៈ។
លោក សុខ ឌីណា ពលរដ្ឋរស់នៅភ្នំពេញ អះអាងថា ការពិន័យលើអ្នកល្មើសច្បាប់ចរាចរណ៍ធ្ងន់ធ្ងរបែបនេះ ធ្វើឱ្យអ្នកដែលជួបបញ្ហាប្រឈមជាងគេគឺអ្នកដែលមានជីវភាពទាល់ក្រ។ លោកអំពាវនាវទៅរដ្ឋាភិបាល បន្ថយការផាកពិន័យធ្ងន់ធ្ងរមកត្រឹម ២ម៉ឺនទៅ ៣ម៉ឺនរៀលវិញ ទើបសមរម្យ។
លោក សុខ ឌីណា និយាយថា៖ «ខ្ញុំសំណូមពរឱ្យគោរពច្បាប់ទាំងអស់គ្នា ហើយធ្វើឱ្យសុក្រឹតទាំងអស់គ្នា កុំឱ្យលម្អៀងទៅម្ខាង មានបក្ខពួក មានខ្សែ រួចពីសំណាញ់ច្បាប់ រីឯអ្នកតូចតាចដូចជាតាក់ស៊ី ឬម៉ូតូឌុប កង់បី កៀបសង្កត់គ្នា។ ខ្ញុំសំណូមពរប៉ុណ្ណឹង ឱ្យផាកពិន័យត្រឹមតែ ២ម៉ឺនទៅ ៣ម៉ឺនរៀលទៅបានហើយ កុំឱ្យវាលើសច្រើនណាស់»។
អ្នករត់កង់បីនៅម្តុំផ្សារដើមគ លោក កែវ ធារី និយាយថា មិនគាំទ្ររដ្ឋាភិបាលផាកពិន័យធ្ងន់ធ្ងរលើអ្នកល្មើសច្បាប់ចរាចរណ៍នោះទេ។ ប៉ុន្តែ លោកថា ការផាកពិន័យធ្ងន់ធ្ងរ អាចធ្វើឱ្យរូបគាត់ និងអ្នកផ្សេងទៀត បើកបរមានការប្រុងប្រយ័ត្នជាងមុនផងដែរ។
លោក កែវ ធារី និយាយថា៖ «ដំឡើង [ផាកពិន័យ] ច្រើន ដូចជាខ្ញុំអ្នកបើកបរប្រុងប្រយ័ត្នជាងមុន ច្បាស់លាស់ជាងមុន ដោយសារគេផាកពិន័យច្រើន ដ៏អញ្ចឹងយើងប្រយ័ត្នប្រយែងខ្លួនឯងដែរ ណាមួយយើងការពារសុវត្ថិភាពទាំងអស់គ្នាផង ទោះជាយ៉ាងណា ព្យាយាមធ្វើឱ្យបានល្អដែរ»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា កងកម្លាំងនគរបាលត្រូវអនុវត្តច្បាប់ និងអនុក្រឹត្យឱ្យស្មើភាព និងតម្លាភាព បើពុំដូច្នេះទេ បទល្មើសចរាចរណ៍នៅតែបន្តកើតមានដដែល។
លោកមានប្រសាសន៍ថា៖ «សមត្ថកិច្ចចរាចរណ៍ត្រូវតែអនុវត្តច្បាប់ដោយមិនរើសមុខ អាចធ្វើឱ្យប្រសើរបានហើយ បើសិនជានៅតែមានការលើកលែង ករណីយោគយល់ទេ អត់អាចកែប្រែស្ថានភាពចរាចរណ៍នៅស្រុកយើងបានទេ ទោះបីដំឡើងការផាកពិន័យប៉ុន្មានទៀត ក៏នៅតែអត់ធ្វើឱ្យប្រសើរជឿនលឿនខ្លាំងបានដែរ»។
របាយការណ៍គណៈកម្មាធិការជាតិសុវត្ថិភាពចរាចរណ៍ផ្លូវគោករបស់រដ្ឋាភិបាល បង្ហាញថា ឆ្នាំ២០១៩ គ្រោះថ្នាក់ចរាចរណ៍បានកើតឡើងជាង ៤ពាន់លើក (៤១២១) កើនឡើង ៨៥៤លើក ឬនឹងស្មើ ២១ភាគរយ ក្នុងនោះ អ្នករងគ្រោះ ៧៨ភាគរយជាអ្នកបើកបរម៉ូតូ។
របាយការណ៍ដដែល ឱ្យដឹងទៀតថា គ្រោះថ្នាក់នេះបានសម្លាប់មនុស្សអស់ជិត ២ពាន់នាក់(១៩៨១) កើនឡើង ២២០នាក់ ស្មើ ១២ភាគរយ ខណៈឆ្នាំ២០១៨ មានតែ ១៧៦១នាក់។ អ្នករបួសជាង ៦ពាន់នាក់ (៦១៤១) កើនឡើងជាង ១៣០០នាក់ (១៣៧១) ស្មើ ២៩ភាគរយ ខណៈឆ្នាំ២០១៨ មានតែ ៤៧៧០នាក់។
ស្ថាប័នជំនាញមួយនេះ អះអាងថា ចំនួនអ្នករងគ្រោះសរុបពេលមួយឆ្នាំនេះ គិតជាមធ្យម អ្នកស្លាប់ក្នុង ១ថ្ងៃ ជាង ៥នាក់ (៥,៤) អ្នករបួសក្នុង ១ថ្ងៃ ជិត ១៧នាក់ (១៦,៨)៕
