អ្នកវិទ្យាសាស្រ្តបារាំងម្នាក់ដែលទទួលបានរង្វាន់ណូប៊ែលសម្រាប់ការរកឃើញវីរុសអេដស៍នៅឆ្នាំ២០០៨ អះអាងថា មេរោគកូរ៉ូណាថ្មី ឬហៅ កូវីដ១៩ ដែលមានប្រភពចម្លងចេញពីប្រទេសចិន មិនមែនកកើតឡើងតាមលក្ខណៈធម្មជាតិនោះទេ ប៉ុន្តែ វាកើតចេញពីមន្ទីរពិសោធ។
អ្នកវិទ្យាសាស្រ្តបារាំង លោក Luc Montagnier បានថ្លែងនៅក្នុងកិច្ចសម្ភាស៍មួយជាមួយទូរទស្សន៍បារាំង CNews កាលពីដើមសប្តាហ៍មុននេះថា ក្រុមអ្នកឯកទេសខាងផ្នែកជីវសាស្រ្តម៉ូលេគុល គឺជាអ្នកបង្កើតវីរុសនោះ។
យ៉ាងណា លោកថា លោកមិនដឹងពីប្រភពអ្នកបង្កើត និងគោលបំណងក្នុងការបង្កើតនោះទេ ដោយថា តួនាទីរបស់លោក គឺលាតត្រដាងការពិត។
ជ័យលាភីរង្វាន់ណូប៊ែលផ្នែកវេជ្ជសាស្រ្ត និងសរីរវិទ្យារូបនេះ អះអាងថា វីរុសកូវីដ១៩ ផ្សំឡើងដោយធាតុហ្សែនរបស់វីរុសអេដស៍ ឬហ៊ីវ (HIV/AIDs) រួមជាមួយវីរុសកូរ៉ូណាក្នុងសត្វប្រចៀវ ហើយថា បុគ្គលិកលក្ខណៈរបស់វាមិនមែនកើតឡើងតាមលក្ខណៈធម្មជាតិ។
លោកអះអាងបន្ថែមថា វីរុសនេះកើតឡើងក្រោមការអភិវឌ្ឍសម្ងាត់កម្រិតខ្ពស់ ប្រកបដោយវិជ្ជាជីវៈ និងយ៉ាងល្អិតល្អន់បំផុត ហើយថា បណ្តុំDNA ឬហ្សែនរបស់វីរុសមានលក្ខណៈដូចជាលំដាប់កងរណារក្នុងម៉ាស៊ីននាឡិកាមួយអីចឹង ដោយហ្សែនវីរុសហ៊ីវជាអ្នកបំពេញបន្ថែមលំដាប់កងនោះ។
នៅក្នុងវីដេអូសម្ភាស៍រយៈពេល ៤នាទីកន្លះ ដែលត្រូវបានអង្គការមូលនិធិសុខភាព Dr.Rath យកមកចុះផ្សាយនៅថ្ងៃទី២៧ ខែមេសា លោកសាស្រ្តាចារ្យ Montagnier បញ្ជាក់ថា លោកមិនបានធ្វើពិសោធដោយផ្ទាល់នោះទេ តែលោកថា ការសន្មតនេះ ធ្វើឡើងដោយផ្អែកតាមការសិក្សាលើទិន្នន័យប្រមូលបានពីវីរុសផ្ទាល់ និងលទ្ធផលពិសោធលើអ្នកជំងឺនៅតាមមន្ទីរពិសោធផ្សេងៗ។
លោក Montagnier លើកឡើងទៀតថា លោកមិនមែនជាមនុស្សដំបូងដែលអះអាងបែបនេះនោះទេ។ លោកថា កន្លងមក ក៏មានក្រុមអ្នកស្រាវជ្រាវឥណ្ឌាល្បីល្បាញមួយក្រុមបានអះអាងដូច្នេះដែរ ប៉ុន្តែ ក្រោយមក ពួកគេត្រូវបានបង្ខំឱ្យបិទរឿងនោះចោល។
សាស្រ្តាចារ្យរូបនេះបន្តថា សម្រាប់លោក គ្មានសម្ពាធណាមួយអាចបង្ខំលោកឱ្យធ្វើរឿងអ្វីមួយផ្ទុយពីឆន្ទៈរបស់លោកបាននោះទេ ព្រោះលោកគឺជាម្ចាស់រង្វាន់ណូប៊ែលផ្នែកវេជ្ជសាស្រ្តម្នាក់ដែលធ្វើការដោយឯករាជ្យ និងមិនស្ថិតក្រោមស្ថាប័នណាមួយឡើយ។
កន្លងមក មានការអះអាងជាច្រើនថា មេរោគកូវីដ១៩ គឺមានប្រភពចេញពីមន្ទីរពិសោធនៅក្រុងវូហានរបស់ចិន ប៉ុន្តែ អំណះអំណាងទាំងនោះ ត្រូវបានប្រធានមន្ទីរពិសោធចេញមុខបដិសេធ ដោយថា ការចោទប្រកាន់ទាំងនោះធ្វើឡើងមិនផ្អែកលើការពិត។
នាយកមន្ទីរពិសោធជីវសុវត្ថិភាព នៅវិទ្យាស្ថានមេរោគវិទ្យាក្រុងវ៉ូហាន លោកសាស្រ្តាចារ្យ Yuan Zhiming លើកឡើងប្រាប់សារព័ត៌មាន Reuters របស់អង់គ្លេសនៅថ្ងៃអង្គារថា វិទ្យាស្ថានមិនមានការប៉ុនប៉ង ហើយក៏គ្មានសមត្ថភាពអាចរចនា ឬបង្កើតមេរោគកូរ៉ូណាណាមួយឡើយ។
លោក Yuan បញ្ជាក់បន្ថែមថា មកទល់ពេលនេះ គ្មានព័ត៌មានណាមួយនៅក្នុងបណ្តុំហ្សែនរបស់មេរោគកូវីដ១៩ ដែលចង្អុលបង្ហាញថា វាជាស្នាដៃមនុស្សបង្កើតឡើយ។
គិតត្រឹមថ្ងៃព្រហស្បតិ៍នេះ ជំងឺកូវីដ១៩ បានសម្លាប់មនុស្សអស់ជាង ២សែន ២ម៉ឺននាក់ហើយ ក្នុងចំណោមអ្នកជំងឺឆ្លងជាង ៣លាន ២សែននាក់ នៅជុំវិញសកលលោក។ អាមេរិកជាប្រទេសរងគ្រោះធ្ងន់ធ្ងរជាងគេ ជាមួយតួលេខស្លាប់ជាង ៥ម៉ឺន ៦ពាន់ករណី ក្នុងចំណោមករណីឆ្លងជាង ១លានករណី និងកំពុងកើនឡើងរៀងរាល់ថ្ងៃរាប់ម៉ឺនករណី។
ទាក់ទិនជំងឺនេះ ប្រធានាធិបតីអាមេរិក លោក ដូណាល់ ត្រាំ បានប្រកាសកាលពីថ្ងៃទី១៥ ខែមេសា ថារដ្ឋបាលរបស់លោកកំពុងបើកការស៊ើបអង្កេតឱ្យដឹងច្បាស់ថា តើមេរោគនោះពិតជាមានដើមកំណើតចេញពីមន្ទីរពិសោធក្រុងវូហានមែន ឬយ៉ាងណា។
លោកព្រមានថា ចិននឹងមានរឿងធំ បើអាមេរិករកឃើញភស្តុតាងបញ្ជាក់ថា មេរោគនោះពិតជាមានប្រភពពីមន្ទីរពិសោធក្រុងវូហាន៕