រដ្ឋមន្ត្រីក្រសួងមហាផ្ទៃ លោក ស ខេង ហៅការឹតបន្តឹងច្បាប់ចរាចរណ៍ពេលនេះថា ជាវិធានការឆ្លើយតបទៅនឹងគ្រោះអាសន្ន ដែលបានសម្លាប់មនុស្សយ៉ាងគំហុកនៅប៉ុន្មានឆ្នាំចុងក្រោយមកនេះ។
ការថ្លែងរបស់លោក ស ខេង នេះ ធ្វើឡើងក្នុងពិធីមួយនៅក្រសួងមហាផ្ទៃនាថ្ងៃព្រហស្បតិ៍នេះ។
លោក ស ខេង បញ្ជាក់ដូចនេះថា៖ «វិធានការរឹតបន្តឹងច្បាប់ចរាចរណ៍ផ្លូវគោកនេះ គឺដាក់ចេញដើម្បីឆ្លើយតបនឹងភាពអាសន្ននៃគ្រោះថ្នាក់ចរាចរណ៍ដែលមានកំណើនយ៉ាងគំហុកកាលពីឆ្នាំកន្លងទៅ បានបណ្ដាលឱ្យមានអ្នកស្លាប់ របួស ពិការ បង្កឱ្យមានកុមារកំព្រា និងការវិនាសព្រាត់ប្រាសក្នុងគ្រួសារ ទាំងនៅក្នុងស្ថានភាពដែលប្រទេសជាតិបានចាកផុតពីភ្លើងសង្គ្រាម មានសន្តិភាព និងការអភិវឌ្ឍទៅហើយនោះ»។
ការរឹតបន្តឹងច្បាប់ចរាចរណ៍ផ្លូវគោកនេះ សមត្ថកិច្ចនឹងចាប់ផ្តើមអនុវត្តពីថ្ងៃទី១ ខែឧសភាស្អែកនេះទៅ គឺចំពេលដែលពលរដ្ឋកំពុងរងផលប៉ះពាល់ពីការគំរាមកំហែងនៃជំងឺកូវីដ១៩។
ច្បាប់នោះ រដ្ឋាភិបាលបានបង្កើនការផាកពិន័យ និងទោសទណ្ឌដល់អ្នកដែលបានប្រព្រឹត្តកំហុស។
បើតាមអនុក្រឹត្យថ្មី អ្នកបើកបរល្មើសគំនូសសញ្ញា ភ្លើង និងច្បាប់ចរាចរណ៍ នឹងត្រូវមន្ត្រីនគរបាលផាកពិន័យយ៉ាងទាបបំផុត ៦ម៉ឺនរៀល រហូតដល់ចំនួន ៨០ម៉ឺនរៀល សម្រាប់អ្នកបើកបរទោចក្រយានយន្ត ឬម៉ូតូ។ សម្រាប់អ្នកប្រើប្រាស់រថយន្ត ពួកគេនឹងត្រូវរងការផាកយ៉ាងទាបបំផុត ៧ម៉ឺន ៥ពាន់រៀល រហូតដល់ខ្ពស់បំផុត ២លាន ៤សែនរៀល។
លោក ស ខេង អំឡុងដើមឆ្នាំនេះ បានអះអាងថា សមត្ថកិច្ចបានបរាជ័យក្នុងការអនុវត្តច្បាប់នេះ ដោយថា កំណើនគ្រោះថ្នាក់ចរាចរណ៍ឆ្នាំ២០១៨ និង២០១៩ វាឆ្លុះបញ្ចាំងថា ដល់ចំនុចត្រូវប្រកាសអាសន្ន ។
របាយការណ៍គណៈកម្មាធិការជាតិសុវត្ថិភាពចរាចរណ៍ផ្លូវគោករបស់រដ្ឋាភិបាលបង្ហាញថា ឆ្នាំ២០១៩ គ្រោះថ្នាក់ចរាចរណ៍បានកើតឡើងជាង ៤ពាន់ករណី (៤១២១) អ្នកស្លាប់ និងរបួសជាង ៨ពាន់នាក់ (៨១២២) កើន ១២% បើធៀបនឹងឆ្នាំ២០១៨ ។
ស្ថាប័នជំនាញមួយនេះ អះអាងថា គិតជាមធ្យម អ្នកស្លាប់ក្នុង ១ថ្ងៃ ជាង ៥នាក់ (៥,៤) អ្នករបួសជិត ១៧នាក់ ក្នុង១ថ្ងៃ។
ប៉ុន្តែ អ្នកជំនាញសុវត្ថិភាពចរាចរណ៍ក្រៅរដ្ឋាភិបាល អះអាងថា ការបរាជ័យនៃការទប់ស្កាត់គ្រោះថ្នាក់ចរាចរណ៍ ដោយសារតែរដ្ឋាភិបាលលុបចោល មិនចាំបាច់ឱ្យមានប័ណ្ណបើកបរសម្រាប់អ្នកបើកបរម៉ូតូ១២៥CCចុះ បញ្ហាគ្រឿងញៀន និងគ្រឿងស្រវឹង៕
