រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ អះអាងថា រយៈពេល ៤ខែដើមឆ្នាំ២០២០នេះ កម្ពុជាបាននាំអង្ករចេញទៅទីផ្សារអន្តរជាតិកើនឡើងជាង ៨ម៉ឺនតោន ខណៈជំងឺកូវីដ១៩ រីករាលដាលជាសកលនោះ។
រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ប្រាប់វីអូឌីនៅថ្ងៃនេះថា អំឡុងពេលជំងឺកូវីដ១៩ រាតត្បាតនៅលើពិភពលោកនោះ កម្ពុជាបាននាំចេញអង្ករទៅកាន់ទីផ្សារពិភពលោក កើនឡើង ៨៦ ៤៨៩តោន ស្មើនឹង ៤០,៤៦% បើធៀបទៅនឹងរយៈពេលដូចគ្នាកាលពីឆ្នាំ២០១៩។
លោកថា៖ «៤ខែដើមឆ្នាំនេះ វាកើនឡើងជាង ៤០ភាគរយ ដែលខ្ញុំបញ្ជាក់នៅក្នុងហ្វេសប៊ុកខ្ញុំហ្នឹង កើនឡើង ៤០,៤៦% បើបៀបធៀប ៤ខែដើមឆ្នាំ២០១៩ វាកើន ៨៦ ៤៨៩តោន ប៉ុន្តែយើងមិនដឹងថា ទៅមុខទៀតយ៉ាងម៉េចទេ»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ប្រសិនបើការនាំចេញអង្កររបស់កម្ពុជាទៅកាន់ទីផ្សារអន្តរជាតិកើនឡើងរហូតនោះ លោកថា វាជាសញ្ញាល្អមួយសម្រាប់កសិករក្នុងការលក់កសិផលរបស់ពួកគាត់នៅពេលខាងមុខ។
លោកថា៖ «បើសិនជាទីផ្សារនៅតែល្អក្នុងការនាំចេញ សម្រាប់ទៅខែៗខាងមុខៗទៀត ធ្វើឱ្យផលិតកម្មស្រូវអង្កររបស់ប្រជាពលរដ្ឋ អាចមានភាពល្អប្រសើរ»។
របាយការណ៍ក្រសួងកសិកម្ម រុក្ខាប្រមាញ់ និងនេសាទ ឱ្យដឹងថា នៅក្នុងរយៈពេលនេះ កម្ពុជាបាននាំចេញអង្ករទៅកាន់ប្រទេសចិនជិត ៤១ភាគរយ ទៅអឺរ៉ុបជាង ៣២ភាគរយ អាស៊ាន ប្រមាណជាជាង ១២ភាគរយ នៃការនាំចេញសរុប ។
បើតាមប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា លោក ហ៊ុន ឡាក់ ប្រាប់វីអូឌីកាលពីថ្ងៃទី៣០ ខែមីនា ឆ្នាំ២០២០ ថា ក្នុងឆ្នាំ២០១៩ កម្ពុជាបាននាំចេញស្រូវទៅលក់ក្រៅប្រទេសជាង ៩លានតោន ហើយលោកថា សម្រាប់តម្រូវការប្រើប្រាស់ ឬហូបចុកក្នុងស្រុកវិញ ក្នុងមួយឆ្នាំមានតម្រូវការប្រមាណជាង ២លានតោន៕
