កម្មករ-កម្មការិនីបម្រើការងារនៅរោងចក្រផលិតស្បែកជើងមួយ ស្ថិតក្នុងខណ្ឌដង្កោ រាជធានីភ្នំពេញ បានផ្ទុះការតវ៉ា បន្ទាប់ពីថៅកែប្រកាសបិទទ្វាររោងចក្រ ដោយមិនដោះស្រាយសំណងជូនពួកគេ។
ក្នុងសេចក្តីជូនដំណឹងចុះថ្ងៃទី២៩ ខែមេសា ថៅកែរោងចក្រ គុន ដា ហ្វូតវែរ (KUN DA Footwear Co,. Ltd) នៅភូមិម័រ សង្កាត់ដង្កោ បានប្រាប់កម្មករថា រោងចក្រមួយនេះពុំមានលទ្ធភាពបន្តដំណើរការផលិតកម្មទៀតនោះទេ ដោយថៅកែសម្រេចលក់ឡាយឡុងសម្ភារទាំងអស់របស់ក្រុមហ៊ុន ដើម្បីយកលុយទូទាត់ប្រាក់អតីតភាពការងារជូនកម្មករ។
កម្មការិនីផ្នែកបិទបាតស្បែកជើង អ្នកស្រី ឈិន វណ្ណា ឱ្យដឹងថា ចាប់តាំងពីថៅកែប្រកាសលក់សម្ភាររហូតមកដល់ថ្ងៃចន្ទនេះ គឺក្រុមកម្មករមិនទាន់ទទួលបានការទូទាត់សំណងនៅឡើយទេ ខណៈដែលសម្ភារមួយចំនួនក្នុងរោងចក្រ ត្រូវគេលួចដឹកចេញជិតអស់ទៅហើយនោះ។
កម្មការិនីរូបនេះ បានដាក់ការសង្ស័យថា សម្ភារមួយចំនួនដែលបាត់ពីក្នុងរោងចក្រនោះ គឺក្រុមរដ្ឋបាល និងអ្នកបកប្រែ និងបក្ខពួក ជាអ្នកលួចលក់ដោយមិនប្រាប់កម្មករ។
អ្នកស្រីបន្ថែមថា៖ «ពួកគាត់អ្នកបកប្រែ និងរដ្ឋបាល គឺគ្នាគាត់ហ្នឹងហើយដែលលួចលក់អីវ៉ាន់មិនឱ្យកម្មករដឹង ហើយពួកគាត់អត់ចេញមុខមកដោះស្រាយឱ្យពួកខ្ញុំ ទុកឱ្យពួកខ្ញុំជួបផលលំបាកច្រើន»។
កម្មការិនីផ្នែកបិទបាតស្បែកជើងម្នាក់ទៀត អ្នកស្រី ខុន គុននេញ រៀបរាប់ថា ថៅកែរោងចក្រ គុន ដា នៅជំពាក់ប្រាក់ឈ្នួលចុងក្រោយ និងអត្ថប្រយោជន៍ផ្សេងៗរបស់កម្មករ។
កម្មការិនីរូបនេះបន្តថា ការពន្យារពេលមិនដោះស្រាយបញ្ហានេះ បានធ្វើឱ្យរូបគាត់ រួមទាំងកម្មករផ្សេងទៀតជួបការលំបាកច្រើនក្នុងការចំណាយ និងខាតពេលវេលាមិនអាចទៅរកកន្លែងការងារធ្វើផ្សេងទៀតបាន។
អ្នកស្រីបន្ថែមថា៖ «គាត់ថា [រដ្ឋបាល] រោងចក្រក្ស័យធន ហើយថា លក់របស់ក្នុងក្រុមហ៊ុនហ្នឹងដើម្បីទូទាត់លុយជូនកម្មករទាំងអស់គ្នា។ ហើយគាត់សន្យាថ្ងៃនេះថ្ងៃនោះ។ ហើយកម្មករទាំងអស់គ្នារង់ចាំលុយហ្នឹងរហូតការងារអីក៏អត់បានធ្វើដែរ។ ហើយលុយផ្ទះជួលក៏គ្នាអត់មានបង់ដែរ។ អីចឹងសំណូមពរឱ្យគាត់ចេញមុខដោះស្រាយ ដោយលក់របស់ក្នុងរោងចក្រហ្នឹងទូទាត់សំណងជូនកម្មករទៅ។ កម្មករលែងមកតវ៉ាហើយ»។
ខណៈពេលតវ៉ានៅថ្ងៃនេះ កម្មករម្នាក់សុំមិនប្រាប់ឈ្មោះ បានឈ្លោះប្រកែកគ្នាជាមួយអ្នកបកប្រែនៅរោងចក្រ គុនដា ដោយចោទថា អ្នកបកប្រែរូបនោះ និងប្រធានរដ្ឋបាល បានឃុបឃិតគ្នាលួចលក់សម្ភារក្នុងរោងចក្រ យកលុយបែងចែកតែបក្ខពួកខ្លួន ដោយមិនព្រមទូទាត់សំណងជូនកម្មករ។
លោកបន្ថែមថា៖ «លោកឯង [អ្នកបកប្រែ] លួចលក់សម្ភារក្នុងរោងចក្រ។ លោកឯងមិនរួចខ្លួនទេ។ លោកឯងល្មើសច្បាប់។ លោកឯងស៊ីញើសឈាមកម្មករ»។
វីអូឌីបានព្យាយាមសាកសួរបុរសម្នាក់ដែលកម្មករអះអាងថា ជាអ្នកបកប្រែដែរ ប៉ុន្តែ លោកមិនឆ្លើយ។
បើតាមកម្មករ នៅថ្ងៃនេះ ពួកគេបានហៅអ្នកទិញសម្ភារឱ្យមកមើលសម្ភារក្នុងរោងចក្រ គុនដា ដែរ ប៉ុន្តែ រដ្ឋបាល និងអ្នកបកប្រែមិនព្រមបើកទ្វារឱ្យ។
វីអូឌីមិនអាចសុំការឆ្លើយតបពីរដ្ឋបាលរោងចក្រ គុនដា អ្នកស្រី ឆាយ ឈុនអ៊ាង បានទេ ដោយទូរសព្ទរបស់គាត់មិនអាចទាក់ទងបាន។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានប្រាប់វីអូឌីតាមតេឡេក្រាមថា ក្រសួងបានដឹងដំណឹងពីវិវាទនៅរោងចក្រនេះហើយ ហើយកំពុងដោះស្រាយតាមនីតិវិធី។
ប្រធានសហភាពការងារកម្ពុជា លោក អាត់ ធន់ ធ្លាប់បញ្ជាក់ថា តាមផ្លូវច្បាប់ នៅពេលដែលរោងចក្រប្រកាសបិទទ្វារ ឬបញ្ឈប់ការងារកម្មករដោយមិនបានជូនដំណឹងមុននោះ គឺថៅកែត្រូវទូទាត់សំណងជូនកម្មករចំនួន ៥ចំណុច មានប្រាក់ខែចុងក្រោយ ប្រាក់ជូនដំណឹង ប្រាក់សំណងជំងឺចិត្ត ប្រាក់អតីតភាពការងារ និងប្រាក់ដំណាច់ឆ្នាំដែលនៅសល់។
លោក អាត់ ធន់ បន្តថា ប្រសិនបើថៅកែក្ស័យធនគ្មានលុយបើកឱ្យកម្មករទេ ត្រូវលក់ឡាយឡុងសម្ភារក្នុងរោងចក្រ ដើម្បីទូទាត់សំណងជូនកម្មករ។
ប្រធានសហព័ន្ធសហជីពស្មារតីកម្មករឯករាជ្យ លោក អ៊ុន ដារ៉ា ដែលចុះឃ្លាំមើលវិវាទការងារនៅរោងចក្រ គុនដា នេះ មានប្រសាសន៍ថា ក្រុមកម្មករពឹងឱ្យសហជីពរបស់លោកជួយរកដំណោះស្រាយ។ លោកថា សហជីពរបស់លោកកំពុងប្រមូលស្នាមមេដៃពីកម្មករ និងរៀបចំបណ្តឹងដាក់ទៅក្រសួងការងារ ដើម្បីរកអន្តរាគមន៍ពីក្រសួងឱ្យជួយដោះស្រាយបន្តទៀត។
លោក អ៊ុន ដារ៉ា បន្ថែមថា៖ «យើងនឹងដាក់បណ្តឹងទៅឯកឧត្តម អ៊ិត សំហេង ឱ្យគាត់ជួយដោះស្រាយ ពីព្រោះក្រុមហ៊ុន ថៅកែរត់ចោលហើយ មិនព្រមចេញមុខមកដោះស្រាយសំណងឱ្យកម្មករ»។
បើតាមកម្មការិនីម្នាក់ អ្នកស្រី ឈិន វណ្ណា រោងចក្រ គុន ដា មានថៅកែជាជនជាតិចិន និងកម្មករជាង ៣៧០នាក់ បម្រើការងារ។
កាលពីថ្ងៃទី១ ខែឧសភា ប្រធានសម្ព័ន្ធសហជីពស៊ីខៅឌូ លោក គង់ អាទិត្យ មានប្រសាសន៍ថា តាមរបាយការណ៍ដែលស៊ីខៅឌូទទួលបាន គឺមានរោងចក្រចំនួន ៣ បានបិទទ្វារ ក្រោមហេតុផលគ្មានអ្នកបញ្ជាទិញ និងបិទទាំងខុសនីតិវិធីច្បាប់។
លោក គង់ អាទិត្យ អះអាងថា ថៅកែរោងចក្រទាំងនោះបានគំរាមកំហែង និងបង្ខិតបង្ខំឱ្យកម្មកររួមទាំងសហជីព ឱ្យលាឈប់ពីការងារ ដោយមិនបានដោះស្រាយសំណងត្រឹមត្រូវជូនពួកគេនោះទេ៕