អ្នកឃ្លាំមើលមួយចំនួនបង្ហាញការព្រួយបារម្ភថា ការផ្ទេរប្រាក់ក្នុងវិស័យធនាគារនៅកម្ពុជា អាចនឹងជួបការលំបាក ឬហានិភ័យ ហើយប៉ះពាល់ដល់ការវិនិយោគ និងសេដ្ឋកិច្ចជាតិថែមមួយកម្រិតទៀត បើកម្ពុជាត្រូវសភានៃសហភាពអឺរ៉ុបដាក់បញ្ចូលក្នុងបញ្ជីខ្មៅនៃការលាងលុយកខ្វក់មែននោះ។
តាមសេចក្តីថ្លែងការណ៍ចុះថ្ងៃទី៧ ខែឧសភានេះ គណៈកម្មាធិការអឺរ៉ុប បានស្នើសភារបស់ខ្លួនដាក់ប្រទេសកម្ពុជាក្នុងបញ្ជីជាមួយបណ្ដាប្រទេស ១១ផ្សេងទៀត ដែលរងការចោទថា លាងលុយកខ្វក់ និងលុយបម្រើឱ្យក្រុមភេរវកម្ម។
គណៈកម្មាធិការអឺរ៉ុប អះអាងថា ការស្នើសុំនេះដោយសារប្រទេសទាំងនោះ «បានបរាជ័យក្នុងការប្រយុទ្ធប្រឆាំងការលាងលុយកខ្វក់ និងហិរញ្ញប្បទានភេរវកម្ម បង្កការគំរាមកំហែងខ្លាំងដល់ប្រព័ន្ធហិរញ្ញវត្ថុរបស់ខ្លួន»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី និយាយថា ដំណឹងនេះ ជាហានិភ័យសម្រាប់ការទាក់ទាញអ្នកវិនិយោគ និងការលូតលាស់សេដ្ឋកិច្ច ។
លោកថា៖ «ប្រទេសមួយដែលមានហានិភ័យលាងលុយហ្នឹងខ្ពស់ ក្រុមហ៊ុនធំៗដែលគេរកស៊ីច្បាស់លាស់នឹងមិនហ៊ានវិនិយោគទុន នឹងមិនមកទេ អ៊ីចឹងធ្វើឱ្យលំហូរសេដ្ឋកិច្ចខ្សោយ ហើយធ្វើឱ្យការលូតលាស់សេដ្ឋកិច្ចយឺតយ៉ាវ»។
លោក ប៉ិច ពិសី និយាយទៀតថា បើកម្ពុជាជាប់ក្នុងបញ្ជីខ្មៅនៃការលាងលុយពិតមែន ប្រព័ន្ធផ្ទេរលុយពីកម្ពុជាទៅក្រៅប្រទេស និងពីក្រៅប្រទេសមកវិញ ត្រូវបានត្រួតពិនិត្យយ៉ាងរឹតត្បិតនៃប្រព័ន្ធហិរញ្ញវត្ថុអន្តរជាតិ។
លោកថា៖ «ប្រព័ន្ធហិរញ្ញវត្ថុអន្តរជាតិ គេមានជំហាននៃការទទួលលុយហ្នឹងច្បាស់លាស់។ អ៊ីចឹងប្រហែលជាមានឧបសគ្គសម្រាប់វិនិយោគិន ក្នុងការវេរលុយចេញចូលស្រុកយើង»។
បើតាមលោក ប៉ិច ពិសី ដំណឹងនេះ នឹងជាបន្ទុកបន្ថែម ខណៈកម្ពុជាកំពុងជួបវិបត្តិកូវីដ១៩ និងបាត់បង់ប្រព័ន្ធអនុគ្រោះពន្ធ ២០ភាគរយ របស់សហភាពអឺរ៉ុប។
អ្នកឯកទេសនយោបាយផ្នែកទំនាក់ទំនងកិច្ចការបរទេស លោក ឯម សុវណ្ណរ៉ា និយាយដែរថា បើកម្ពុជាមិនអាចដកខ្លួនចេញពីបញ្ជីខ្មៅរបស់សហភាពអឺរ៉ុបនេះបានទេ ប្រព័ន្ធតាមដានវានឹងរាលដាលដល់ឥស្សរជននយោបាយមួយចំនួន អ្នកជំនួញក្នុងប្រទេស និងមុខមាត់កម្ពុជាលើឆាកអន្តរជាតិ ។
លោកថា៖ «វាជាយន្តការមួយអាចប្រឈមនឹងតម្លៃស្មើមុខស្មើមាត់ជារដ្ឋអធិបតេយ្យ វាមានលក្ខណៈបាត់បង់ពុំស្មើភាពគ្នាច្រើនណាស់ ហើយការទាក់ទាញវិនិយោគិនហ្នឹងខាតបង់មែនទែន កម្ពុជាគួរតែរៀបចំយន្តការ ឬក៏ចំណាត់ការបែបណា ដើម្បីបញ្ចៀសបញ្ហាហ្នឹងទើបល្អ»។
កាលពីខែកុម្ភៈ ឆ្នាំ២០១៩ កម្ពុជាត្រូវបានដាក់ក្នុងបញ្ជីប្រផេះសារជាថ្មី ដោយក្រុមការងារប្រតិបត្តិការហិរញ្ញប្បទានអន្តរជាតិ (Financial Action Task Force – FATF) ។
អ្នកនាំពាក្យ និងជាអគ្គលេខាធិការនៃក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន សុំមិនប្រតិកម្មទៅនឹងសំណើរបស់សហភាពអឺរ៉ុបនេះទេ ដោយបង្វែរឱ្យទៅសួរខាងធនាគារជាតិនៃកម្ពុជាវិញ តែវីអូឌីមិនអាចរកការអត្ថាធិប្បាយបាន ដោយអគ្គនាយិកានៃធនាគារជាតិ លោកស្រី ជា សិរី មិនលើកទូរសព្ទ។
ប៉ុន្តែ រដ្ឋលេខាក្រសួងមហាផ្ទៃ លោក ងឺ ចន្ទ្រ័ផល អះអាងថា មិនភ្ញាក់ផ្អើលទៅវិធានការរបស់សហភាពអឺរ៉ុបនេះទេ ដោយលោកចាត់ទុកថា វិធានការរបស់សហភាពអឺរ៉ុប វាមិនឆ្លុះបញ្ចាំងពីការខំប្រឹងប្រែងរបស់កម្ពុជា ។
មន្ត្រីរដ្ឋាភិបាលរូបនេះអះអាងទៀតថា វិធានការរបស់សហភាពអឺរ៉ុប នឹងមិនប៉ះពាល់ដល់កម្ពុជា ដោយថា ដរាបណាកម្ពុជាបន្តអនុវត្តតាមអនុសាសន៍របស់ហិរញ្ញប្បទានអន្តរជាតិ ដែលបានដាក់កម្ពុជាក្នុងបញ្ជីប្រផេះ (FATF) នោះ។
លោកថា៖ «កម្ពុជាយើង! យើងអនុវត្តទៅតាមគោលការណ៍ដែលយើងមានក្នុងឋានៈប្រទេសដែលមានទំនាក់ទំនងជាមួយអន្តរជាតិ យើងនៅតែបន្តធ្វើការធម្មតា ខ្ញុំថា ដូចជាមិនមានអីគួរឱ្យភ្ញាក់ផ្អើលទេអាហ្នឹង»។
វិធានការថ្មីនេះ សហភាពអឺរ៉ុបនឹងចាប់ផ្ដើមអនុវត្តចាប់ពីខែតុលាខាងមុខនេះ ដោយសារបញ្ហាដែលបណ្ដាលមកពីការរីករាលដាលនៃវីរុសកូរ៉ូណានាពេលបច្ចុប្បន្ននេះ។
បើតាមសហភាពអឺរ៉ុប នៅពេលសំណើនេះត្រូវបានអនុម័ត ធនាគារ ក្រុមហ៊ុនហិរញ្ញវត្ថុ និងក្រុមហ៊ុនសវនាកម្មផ្សេងៗ នឹងជាប់កាតព្វកិច្ចដែលតម្រូវឱ្យពិនិត្យមើលឱ្យបានខ្លាំងថែមទៀត ទៅលើអតិថិជនរបស់ពួកគេ ដែលមានទំនាក់ទំនងនឹងបណ្ដាប្រទេសស្ថិតក្នុងសំណើនេះ។ ក្រុមហ៊ុននានានៅតាមបណ្ដាប្រទេសស្ថិតក្នុងបញ្ជីនេះ ក៏នឹងត្រូវហាមឃាត់ទទួលយកមូលនិធិពីសហភាពអឺរ៉ុបផងដែរ។
ក្នុងសេចក្តីថ្លែងការណ៍របស់គណៈកម្មាធិការសហភាពអឺរ៉ុប ក៏បានបញ្ជាក់ពីគោលការណ៍ចំនួន ៦ រួមមានទាំងការបង្កើតក្រុមការងារត្រួតពិនិត្យលើដំណើរការធនាគារ ក្រុមការងារត្រួតពិនិត្យដោយផ្អែកលើខ្លឹមសារច្បាប់របស់អឺរ៉ុប និង ច្បាប់អន្តរជាតិ ជាដើម។
ប្រទេសដែលជាប់ក្នុងបញ្ជីខ្មៅរបស់សហភាពអឺរ៉ុបរួចហើយនោះ មានដូចជា អាហ្វហ្គានីស្ថាន អ៊ីរ៉ាក់ អ៊ីរ៉ង់ ប៉ាគីស្ថាន ស៊ីរី យេម៉ែន កូរ៉េខាងជើង អ៊ូហ្គាន់ដា វ៉ានូទូ ដែនដីទ្រីនីដាត និងតូបាហ្កូ។ សំណើវិធានការនេះ នឹងចូលជាធរមាននៅខែតុលាខាងមុខ។ ចំណែកស្ថាប័នត្រួតពិនិត្យថ្មី នឹងត្រូវ EU រៀបចំឡើងនៅឆ្នាំ២០២៣៕
