អតីតបុគ្គលិកជាង ១០០នាក់ ដែលបម្រើការងារនៅសណ្ឋាគារ The Great Duke ឬអតីតសណ្ឋាគារ InterContinental បានប្រមូលផ្តុំគ្នាតវ៉ា និងបិទផ្លូវជិត ១ម៉ោង នៅមុខសណ្ឋាគារផ្ទាល់ ដើម្បីទាមទារការទូទាត់ប្រាក់សំណងពីថៅកែសណ្ឋាគារនេះ ទៅតាមសេចក្តីបង្គាប់របស់ក្រុមប្រឹក្សាអាជ្ញាកណ្តាល កាលពីខែកុម្ភៈ ឆ្នាំ២០២០។
ក្រោយពីបិទផ្លូវ អាជ្ញាធរពាក់ព័ន្ធ និងមន្ត្រីក្រសួងការងារបានចុះអន្តរាគមន៍ស្នើសុំឱ្យបើកផ្លូវវិញ និងនាំតំណាងសហជីពទៅជួបអ្នកគ្រប់គ្រងសណ្ឋាគារ ដើម្បីជជែកគ្នារកដំណោះស្រាយ។
បន្ទាប់ពីជួបជជែកគ្នាជាមួយភាគីក្រុមហ៊ុននៅព្រឹកថ្ងៃនេះ ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជាប្រចាំនៅសណ្ឋាគារ The Great Duke លោក ទូច កុសល និយាយថា ពួកគេបានព្រមព្រៀងគ្នាជាមួយភាគីសណ្ឋាគារ The Great Duke ដោយកំណត់ជួបគ្នារកដំណោះស្រាយនៅក្រសួងការងារនាម៉ោង ២រសៀលថ្ងៃស្អែក។
លោក ទូច កុសល និយាយថា៖ «មានតំណាងខាងក្រសួង ហើយមានសមត្ថកិច្ច មានប៉េអឹមមកច្រើនដែរ ហើយគាត់សំណូមពរហើយ យើងធ្វើទៅតាមសំណូមពររបស់គាត់ម្តងទៀតទៅ តើការដោះស្រាយ [នៅក្រសួងការងារនៅថ្ងៃស្អែកម៉ោង ២រសៀល] យ៉ាងម៉េចទៀត យើងតាមដានទាំងអស់គ្នា»។
អនុប្រធានផ្នែកអន្តរាគមន៍ និងដោះស្រាយបាតុកម្មកូដកម្មគ្រប់មុខសញ្ញានៃក្រសួងការងារ លោក អ៊ូ រតនា ដែលបានចុះទៅដល់កន្លែងតវ៉ានោះ បានស្នើសុំទៅកម្មករឱ្យអត់ធ្មត់ និងរង់ចាំការដោះស្រាយនៅរសៀលថ្ងៃស្អែកផងដែរ។
លោក អ៊ូ រតនា មានប្រសាសន៍ថា៖ «យើងទាំងសងខាងព្រមអនុវត្តទៅតាមក្រុមប្រឹក្សាអាជ្ញាកណ្តាល យើងឯកភាពអនុវត្តទៅតាមសេចក្តីបង្គាប់របស់អាជ្ញាកណ្តាល ហើយដល់ថ្ងៃនេះ មិនទាន់អនុវត្តតាម ខាងក្រសួងការងារក៏បានចុះដាក់កំហិតហើយ បើសិនជាស្អែក [ម៉ោង ២រសៀល] យើងហៅគាត់ទៅជួបទៀត បើសិនគាត់មិនអនុវត្តតាម គឺក្រសួងនឹងចាត់វិធានការទៅតាមផ្លូវច្បាប់»។
ក្រោយពីមានការសម្របសម្រួលគ្នានៅព្រឹកនេះ តំណាងកម្មករ លោក ជា ចាន់ម៉ន ដែលអះអាងថាធ្វើការនៅសណ្ឋាគារអស់រយៈពេលប្រហែល ២០ឆ្នាំមកហើយនោះ និយាយថា គាត់រង់ចាំភាគីទាំងសងខាងដោះស្រាយនៅក្រសួងការងារនៅថ្ងៃស្អែកនេះ។ ប៉ុន្តែ លោកថា បច្ចុប្បន្ន ពួកគាត់ជួបបញ្ហាប្រឈមច្រើនក្នុងជីវភាពគ្រួសារ បើម្ចាស់សណ្ឋាគារមិនព្រមទូទាត់ប្រាក់អតីតភាពការងារជូនអតីតបុគ្គលិកជាង ១៥០នាក់នេះទេ។
តំណាងកម្មកររូបនេះ អះអាងថា គិតត្រឹមថ្ងៃទី១១ ខែឧសភានេះ មានរយៈពេលជាង ៥ខែហើយដែលភាគីនិយោជកមិនទាន់ដោះស្រាយនៅឡើយ ហើយមិនមានភាគីណាប្តឹងជំទាស់នឹងសេចក្តីសម្រេចរបស់ក្រុមប្រឹក្សាអាជ្ញាកណ្តាលនោះទេ។
លោក ជា ចាន់ម៉ន និយាយថា៖ «ខ្ញុំធ្វើការនៅទីហ្នឹងរយៈពេល ២០ឆ្នាំហើយ ឧទាហរណ៍បើសិនជាយើងចង់ទៅរកការងារខាងក្រៅ ក៏អត់បានដែរ បើខ្ញុំវ័យកាន់តែចាស់ ភ្នែកក៏អន់ដែរ ហើយខ្ញុំដាក់ CV វាបីបួនកន្លែងដែរ ប៉ុន្តែ គេមិនទាន់ហៅ ការងារខ្ញុំទៅថ្ងៃមុខដូចសឹងមិនមានតែម្តង។ ឧទាហរណ៍បានលុយមកមួយកញ្ចប់ ខ្ញុំអាចទៅទិញម៉ូតូកង់បីរត់ឌុប ដើម្បីចិញ្ចឹមប្រពន្ធកូនដែលមានបន្ទុកតូច»។
កម្មករផ្នែកចុងភៅនៅសណ្ឋាគារ The Great Duke អ្នកនាង ឆោម សម្ផស្ស ព្រមានថា បើម្ចាស់សណ្ឋាគារនៅតែមិនដោះស្រាយតាមការស្នើសុំរបស់កម្មករទេ ពួកគេនឹងនាំគ្នាបាតុកម្មនៅមុខសណ្ឋាគាររហូតមានដំណោះស្រាយ។
អ្នកនាងនិយាយ៖ «បើសិនជាគាត់អត់មានដំណោះស្រាយ បងប្អូនទាំងអស់គ្នាគឺគាត់បន្តនូវការបិទផ្លូវ ឬក៏គាត់អាចបោះតង់សម្រាកនៅទីហ្នឹង គឺគាត់ធ្វើរហូតមានដំណោះស្រាយ»។
ប្រធានផ្នែកកម្មវិធីចងក្រង នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) អ្នកស្រី ឆន សុខា ប្រាប់ថា រដ្ឋាភិបាលត្រូវជំរុញឱ្យម្ចាស់សណ្ឋាគារគោរព និងអនុវត្តតាមច្បាប់ ដើម្បីកុំឱ្យមានបញ្ហាតវ៉ាកើតឡើងបន្តទៀត ធ្វើឱ្យខាតប្រយោជន៍ទាំងភាគីនិយោជក និងនិយោជិត។
អ្នកស្រីមានប្រសាសន៍ថា៖ «យើងចង់ឱ្យនិយោជកអនុវត្តតាមនីតិវិធីនៃច្បាប់ទៅ ព្រោះច្បាប់គឺជាកម្រិតអប្បបរមាហើយ ហើយអ្វីដែលពួកគាត់ទាមទារ គឺគ្រាន់តែទាមទារនូវការបិទសណ្ឋាគារហ្នឹង គឺត្រូវទូទាត់ប្រាក់អត្ថប្រយោជន៍ដែលត្រូវមាននៅក្នុងច្បាប់ ហើយបើតាមផ្លូវច្បាប់ កាលណាបញ្ចប់កិច្ចសន្យាកម្មករ ត្រូវទូទាត់រយៈពេល ៤៨ម៉ោង។»
សណ្ឋាគារ The Great Duke ឬអតីតសណ្ឋាគារអាំងទែកុងទីណង់តាល់ (InterContinental) បានប្រកាសបិទប្រតិបត្តិការអាជីវកម្មរបស់ខ្លួន កាលពីថ្ងៃទី៣១ ខែធ្នូ កាលពីឆ្នាំមុន បន្ទាប់ពីប្រតិបត្តិការអាជីវកម្មរបស់ខ្លួនអស់រយៈពេល ២៣ឆ្នាំ។
ក្រោយពីបិទទ្វារ មិនទាន់ទូទាត់ប្រាក់អតីតភាពការងារ ធ្វើឱ្យអតីតបុគ្គលិកនៅសណ្ឋាគារនេះ នាំគ្នាធ្វើញត្តិដាក់ទៅស្ថាប័នរដ្ឋ ដូចជា ក្រសួងការងារ ខុទ្ទកាល័យរដ្ឋាភិបាល និងដាក់ទៅក្រុមប្រឹក្សាអាជ្ញាកណ្តាល ដើម្បីជួយអន្តរាគមន៍ផងដែរ។
រហូតដល់ថ្ងៃទី២០ ខែកុម្ភៈ ឆ្នាំ២០២០ ប្រធានលេខាធិការដ្ឋានក្រុមប្រឹក្សាកណ្តាល បានចេញសេចក្តីសម្រេចជូនដំណឹងទៅភាគីកម្មករនិយោជិត និងភាគីនិយោជក ដើម្បីឱ្យនិយោជកផ្តល់សំណងដល់កម្មករនូវប្រាក់ដំណាច់ទូទាត់ជួសការជូនដំណឹងមុន និងប្រាក់រំលឹកអតីតភាពការងារមុនឆ្នាំ២០១៩ ដោយយកប្រាក់ឈ្នួលគោល និងប្រាក់បន្ទាប់បន្សំមកគណនាផងដែរ៕
