ពលរដ្ឋខ្មែរដែលកំពុងជាប់នៅប្រទេសម៉ាឡេស៊ីមួយចំនួនមិនអាចវិលត្រលប់មកប្រទេសកំណើតវិញ ដោយសារតែបញ្ហាឆ្លងរាលដាលមេរោគកូវីដ១៩ ថ្លែងថា ពួកគាត់ប្រឈមស្លាប់ដោយសារអត់អាហារ និងមិនមានលុយចំណាយលើតម្រូវការផ្សេងៗ។
លោកនាយករដ្ឋមន្ត្រី ហ៊ុន សែន កាលពីថ្ងៃទី៧ ខែមេសា បានថ្លែងថា ការមិនអនុញ្ញាតឱ្យពលរដ្ឋខែ្មរចំនួន ១៥០នាក់ ចូលប្រទេសកម្ពុជាក្នុងអំឡុងពេលនេះ ដោយលោកបារម្ភខ្លាចអ្នកទាំងនោះ មានផ្ទុកជំងឺកូវីដ១៩។ លោក ហ៊ុន សែន អំពាវនាវទៅពលរដ្ឋខ្មែរទាំង ១៥០នាក់ បន្តស្នាក់នៅក្នុងប្រទេសម៉ាឡេស៊ីសិន ដើម្បីការពារប្រជាពលរដ្ឋនៅក្នុងប្រទេស។
ពលរដ្ឋខ្មែរចំនួន ១៥០នាក់ ដែលមានបំណងវិលមកប្រទេសកម្ពុជាវិញ តែត្រូវបានរារាំងក្រោមហេតុផលបារម្ភឆ្លងរាលដាលមេរោគកូវីដ១៩នេះ រួមមានទាំងពលករ និស្សិត និងអ្នកទេសចរផង។
ពលរដ្ឋខ្មែរម្នាក់ក្នុងចំណោមពលរដ្ឋ ១៥០នាក់ អ្នកស្រី ស៊ាង សំអូន ប្រាប់វីអូឌីនៅថ្ងៃនេះថា ពួកគាត់រង់ចាំការឆ្លើយតបពីរដ្ឋាភិបាលថានឹងអនុញ្ញាតឱ្យត្រឡប់មកប្រទេសកម្ពុជាវិញនៅពេលណា ដោយសារ បច្ចុប្បន្ន ពួកគាត់ទាំងអស់គ្នាកំពុងជួបការលំបាកខ្លាំង ដោយមិនមានប្រាក់សម្រាប់បង់ថ្លៃឈ្នួលផ្ទះ និងទិញអាហារឡើយ។
អ្នកស្រីថា៖ «ពិបាកដូចគ្នា ខ្ញុំក៏ពិបាកដែរ ខ្ញុំថ្លៃផ្ទះគេក៏ដល់ លុយហូបក៏អត់មាន ខ្ញុំរាល់ថ្ងៃបានមិត្តភក្តិគេឱ្យហូបតើ! ខ្ញុំក៏អត់មានដែរ»។
អ្នកស្រី សៀក អ្នកជាប់នៅប្រទេសម៉ាឡេស៊ីដែរ លើកឡើងថា កន្លងមក នៅពេលដែលទទួលព័ត៌មានថា រដ្ឋាភិបាលអនុញ្ញាតឱ្យត្រឡប់មកកម្ពុជាវិញនោះ ពួកគាត់សប្បាយចិត្ត ប៉ុន្តែ រហូតមកដល់ថ្ងៃនេះ បែរជាស្ងាត់ទៅវិញ។
អ្នកស្រី សៀក៖ «ខ្ញុំដេកឡើងរាប់ខែហើយ នៅម៉ាឡេស៊ីហ្នឹង។ ឥលូវ ខ្ញុំសំណូមពរឱ្យលោកពូជួយពួកខ្ញុំទៅ ធ្វើម៉េចឱ្យពួកខ្ញុំបានចេញទៅផ្ទះ»។
ពលរដ្ឋម្នាក់ទៀត អ្នកស្រី ម៉ាត់ តោសរី ដែលមានផ្ទៃពោះ ៨ខែ អះអាងថា ប្រសិនបើរដ្ឋាភិបាលនៅតែមិនអនុញ្ញាតឱ្យពួកគាត់វិលមកកម្ពុជាក្នុងពេលឆាប់ៗនេះទេ អ្នកស្រីថា ពួកគាត់នឹងដាច់បាយស្លាប់មិនខាន ។
អ្នកស្រីថា៖ «ពោះធំទៀត ពិបាកមែន អត់មានលុយ អត់មានអីទិញបាយហូប និយាយអ៊ីចឹងយ៉ាប់មែនហ្នឹង»។
ស្ត្រីរូបនេះរៀបរាប់ថា គាត់ និងស្វាមីបានមកធ្វើការនៅប្រទេសម៉ាឡេស៊ីរយៈពេលបីឆ្នាំហើយ ប៉ុន្តែ ស្វាមីគាត់បានធ្លាក់ខ្លួនឈឺ និងស្លាប់កាលពីខែមេសា ឆ្នាំ២០២០ នៅប្រទេសនេះ បន្ទាប់ពីដែកធ្លាក់ត្រូវលើ ក្នុងអំឡុងពេលកំពុងធ្វើការសំណង់នៅម៉ាឡេស៊ី។ អ្នកស្រីស្នើទៅរដ្ឋាភិបាលជួយអន្តរាគមន៍ចំពោះរឿងនេះ ដោយគាត់ទ្រាំរស់នៅទីនោះទាំងទឹកភ្នែក។
អ្នកស្រីបន្តថា៖ «ល្ងាចយំរាល់យប់ យំអស់ទឹកភ្នែករលីង រាល់ថ្ងៃចាំមើលគេបើកផ្លូវឱ្យមកខ្មែរ។ នៅអត់ស្រួលទៀត ពោះហ្នឹងវាចេះតែឈឺ ពោះធំនៅអត់ស្រួល ដេកអត់លក់រាល់យប់។ អ៊ីចឹងបានទៅស្រុកខ្មែរជួបជុំកូន វាស្រួលក្នុងចិត្ត នៅនេះហត់មែន ពិបាក»។
អ្នកនាំពាក្យក្រសួងការបរទេស លោក កុយ គួង មានប្រសាសន៍ថា ពលរដ្ឋខែ្មរដែលជាប់នៅប្រទេសម៉ាឡេស៊ី នឹងបានត្រឡប់មកប្រទេសកម្ពុជាវិញ បន្ទាប់ពីអាជ្ញាធរនៅប្រទេសម៉ាឡេស៊ីបញ្ជាក់ពីសុខភាពរបស់ពួកគេទាំងអស់គ្នារួច។
លោកថា៖ «ទូតយើងកំពុងធ្វើការយ៉ាងស្វិតស្វាញជាមួយអាជ្ញាធរម៉ាឡេស៊ីហើយ ដែលយើងសុំធ្វើម៉េចឱ្យគាត់មានការពិនិត្យសុខភាពជាមុនសិន។ កន្លងមក ស្ថានទូតយើងក៏បានធ្វើការជាមួយសប្បុរសជន ក៏ដូចជាអង្គការមិនមែនរដ្ឋាភិបាលមួយចំនួន ហើយនិងយកថវិកាពីស្ថានទូតប៉ុន្មានច្រកហ្នឹងទៅជួយដល់គាត់ផ្ទាល់ដែរ ទិញសម្ភារទៅជូនគាត់ផ្ទាល់ៗ។ យើងកំពុងជំរុញឱ្យអាជ្ញាធរម៉ាឡេស៊ីជួយពិនិត្យសុខភាពឱ្យគាត់ ឱ្យបានលឿន ដើម្បីអាចគាត់ត្រឡប់មកវិញ»។
មន្ត្រីគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ (Central) លោក ឃុន ថារ៉ូ ចាត់ទុកការត្រួតពិនិត្យរបស់ពួកគាត់ជារឿងល្អ ប៉ុន្តែ លោកជំរុញឱ្យរដ្ឋាភិបាលផ្ដល់ស្បៀងអាហារ ថវិកាជាដើម ដើម្បីជួយពួកគាត់។
លោកថា៖ «រឿងដែលសំខាន់ រដ្ឋធ្វើយ៉ាងណា ត្រូវផ្ដល់ការគាំពារទៅដល់ពួកគាត់ ឧទាហរណ៍ផ្ដល់ការគាំពារផ្នែកស្បៀងអាហារ ការហូបចុក ការរស់នៅ ព្រោះពួកគាត់ខ្លះ គាត់ត្រូវជួលផ្ទះ គាត់ត្រូវទិញអាហារអីហូបចុក ហើយពួកគាត់ត្រូវចំណាយជាមូលដ្ឋានប្រចាំថ្ងៃក្នុងនាមជាមនុស្ស។ អ៊ីចឹង សិទ្ធិរស់រានមានជីវិត រដ្ឋាភិបាលត្រូវផ្ដល់ការគាំពារដល់ពួកគាត់ ទោះបីជាពួកគាត់ជាពលករចំណាកស្រុកក៏ដោយ ក៏ពួកគាត់ចូលរួមនៅក្នុងការបង់ពន្ធជូនរដ្ឋដែរ»។
គិតមកត្រឹមថ្ងៃទី១១ ខែឧសភានេះ កម្ពុជារកឃើញអ្នកឆ្លងជំងឺកូវីដ១៩ ចំនួន ១២២នាក់ ក្នុងនោះ អ្នកជំងឺ ១២១នាក់ ត្រូវបានព្យាបាលជាសះស្បើយ ហើយនៅសល់ម្នាក់ទៀត កំពុងសម្រាកព្យាបាលនៅមន្ទីរពេទ្យ៕