មន្ត្រីជាន់ខ្ពស់ក្រសួងសាធារណការ និងដឹកជញ្ជូន អំពាវនាវឱ្យប្រជាពលរដ្ឋអាណិតអាសូរដល់នគរបាលចរាចរណ៍ផង ហើយបញ្ជាក់ថា ការចាប់ផាកពិន័យមិនមែនដើម្បីចង់បានលុយនោះទេគឺចង់ឱ្យប្រជាពលរដ្ឋមានសុវត្ថិភាព។
រដ្ឋលេខាធិការក្រសួងសាធារណការ និងដឹកជញ្ជូន លោកស្រី មឹន មាណវី ថ្លែងនៅក្នុងសន្និសីទសារព័ត៌មាននៅថ្ងៃនេះថា លុយដែលបានពីការផាកពិន័យមិនមែនយកទៅផ្គត់ផ្គង់សេដ្ឋកិច្ចជាតិ ឬយកទៅឱ្យបុគ្គលណាមួយនោះទេ គឺគ្រាន់តែយកទៅចំណាយលើផ្នែកពាក់ព័ន្ធខ្លះៗ ដើម្បីពង្រឹងសុវត្ថិភាពចរាចរណ៍តែប៉ុណ្ណោះ។
លោកស្រី មឹន មាណវី៖ «កងកម្លាំងប៉ូលិសរបស់យើងធ្វើនេះមិនមែនចង់បានលុយយកមកធ្វើអីទេ។ មិនមែនយកមកដាក់ថវិកាជាតិ ឬក៏ដាក់ក្នុងហោប៉ៅផ្ទាល់របស់មន្ត្រីប៉ូលិសរបស់យើងទេ។ គ្រាន់តែភាគរយខ្លះ យើងកាត់ទុកដើម្បីលើកទឹកចិត្ត។»
លោកស្រីក៏បានអំពាវនាវឱ្យសាធារណជនអាណិតអាសូរដល់មន្ត្រីនគរបាលចរាចរណ៍ ព្រោះពួកគាត់ធ្វើការទាំងលំបាក និងប្រឈមគ្រោះថ្នាក់។
លោកស្រី មឹន មាណវី៖ «សូមមេត្តាអាណិតអាសូរដល់ប៉ូលិសចរាចរណ៍របស់យើង ដោយយើងគិតថា បើសិនជាមានបុណ្យទាន បើសិនជាអត់មានជំងឺដង្កាត់អីឆ្លងកូវីដ១៩ហ្នឹងទេ បើស្ទះចរាចរណ៍ សួរថា ប៉ូលិសទៅណា ប៉ូលិសចរាចរណ៍ទៅណា ម៉េចមិនជួយ ហើយគាត់ធ្វើទាំងយប់ទាំងថ្ងៃ។»
រដ្ឋាភិបាលចាប់ផ្តើមបង្កើនការផាកពិន័យចរាចរណ៍ពី៣ ទៅ៥ដង ដែលចាប់ផ្តើមពីថ្ងៃទី១ ខែឧសភា ឆ្នាំ២០២០។ ចំនួនលុយដែលផាកបានគឺ ៧០ភាគរយផ្តល់ឱ្យកម្លាំងនគរបាល ២៥ភាគរយប្រគល់ឱ្យអង្គភាពនគរបាល និង ៥ភាគរយដាក់ចូលក្នុងថវិកាជាតិ។
នៅក្នុងសន្និសីទសារព័ត៌មាននៅថ្ងៃនេះ ក្រសួងមិនបានបង្ហាញថា ចាប់ពីថ្ងៃទី១ ដល់ថ្ងៃទី១២ ខែឧសភានេះ លុយដែលបានពីការផាកពិន័យលើអ្នកបើកបរមានចំនួនប៉ុន្មាននោះទេ៕
