សមាគមមីក្រូហិរញ្ញវត្ថុ អះអាងថា គិតត្រឹមថ្ងៃទី១០ ខែឧសភា មានអ្នកដែលបានខ្ចីប្រាក់ពីគ្រឹះស្ថានមីក្រូហិរញ្ញវត្ថុនៅកម្ពុជា ចំនួនជាង ១៣ម៉ឺននាក់ (១៣៧,១៥៨) បានដាក់ពាក្យស្នើសុំឱ្យស្ថាប័នហិរញ្ញវត្ថុនានា ដើម្បីសម្រួលលក្ខខណ្ឌសងប្រាក់ ឬរៀបចំឥណទានឡើងវិញ ក្រោមហេតុផលបាត់បង់ចំណូលក្នុងពេលផ្ទុះជំងឺកូវីដ១៩។
សមាគមអ្នកផ្ដល់កម្ចីមួយនេះ បានអះអាងបែបនេះក្នុងសេចក្ដីប្រកាសព័ត៌មានរបស់ខ្លួនដែលត្រូវបានផ្សព្វផ្សាយកាលពីថ្ងៃម្សិលមិញនេះ។
សមាគមបន្តថា ក្នុងចំណោមអ្នកដាក់ពាក្យស្នើសុំពន្យារពេលបង់ប្រាក់ទាំងនោះគឺ មានអ្នកខ្ចីប្រាក់ចំនួន ១១៨,១៨២នាក់ ឬជិត ៩០ភាគរយ បានទទួលការរៀបចំឥណទានឡើងវិញ ដែលមានប្រាក់ខ្ចីសរុបជាង ៤៨៨លានដុល្លារ។ ដោយឡែក អ្នកខ្ចីប្រាក់ជាង ១ម៉ឺន ៨ពាន់នាក់ទៀត មិនត្រូវបានអនុញ្ញាត ឬសម្រួលលក្ខខណ្ឌសងប្រាក់ឡើយ។
អ្នកនាំពាក្យសមាគមមីក្រូហិរញ្ញវត្ថុកម្ពុជា លោក កាំង តុងងី ថ្លែងប្រាប់វីអូឌីថា គ្រឹះស្ថានហិរញ្ញវត្ថុនានា បានទទួលសំណើភាគច្រើនលើការសុំពន្យារពេលបង់ប្រាក់ដើម រយៈពេល ៦ខែ ឬពន្យារពេលបង់ប្រាក់ទាំងការប្រាក់ទាំងដើម រយៈពេល ៦ខែ។ លោកថា ក្រោយការសិក្សារួចរាល់ ស្ថាប័នមីក្រូហិរញ្ញវត្ថុ សម្រេចច្រានចោលសំណើរបស់អ្នកជំពាក់មួយចំនួន ដោយសារតែមិនត្រូវនឹងលក្ខខណ្ឌកំណត់របស់ស្ថាប័ននីមួយៗ។
លោក កាំង តុងងី៖ «ជាង ១ម៉ឺននាក់ហ្នឹង គឺមិនបានរៀបចំឥណទានជូនឡើងវិញទេ។ ឧទាហរណ៍ថា ករណីខ្លះ យើងរកឃើញថា គាត់មិនរងផលប៉ះពាល់ធ្ងន់ធ្ងរដោយសារកូវីដ១៩ទេ អ៊ីចឹងស្នើសុំឱ្យអតិថិជនបង់ជាធម្មតា ទុកលទ្ធភាពឱ្យអតិថិជនរងផលប៉ះពាល់ធ្ងន់ធ្ងរ។ ករណីខ្លះទៀត អតិថិជនហ្នឹង មានបញ្ហាតាំងពីមុនកើតកូវីដហ្នឹងទៀត ក្នុងករណីនេះគ្រឹះស្ថានមីក្រូហិរញ្ញវត្ថុ ក៏គេមិនរៀបចំឱ្យដែរ»។
ធនាគារជាតិនៃកម្ពុជា បានចេញសារាចរណែនាំមួយកាលពីថ្ងៃទី២៧ ខែមីនា ដោយបង្គាប់ឱ្យស្ថាប័នហិរញ្ញវត្ថុរៀបចំឥណទានឡើងវិញជូនអតិថិជន ដើម្បីអនុគ្រោះដល់អតិថិជនដែលជួបវិបត្តិហិរញ្ញវត្ថុបណ្ដោះអាសន្នក្នុងគ្រាកូវីដ១៩។ ធនាគារជាតិ បានផ្ដល់ជម្រើសចំនួន ៩ ឱ្យគ្រឹះស្ថានហិរញ្ញវត្ថុយកទៅអនុវត្ត រួមមាន កាត់បន្ថយប្រាក់ដើមឥណទាន ឬចំនួនដែលត្រូវសងរំលស់ បន្ថយការប្រាក់ ពន្យារពេលសងប្រាក់ដើម និងការប្រាក់ ការពន្យារឥណប្រទិទាន ឬពន្យារពេលសងប្រាក់ដើមក្នុងពេលដល់ថ្ងៃប្រមូលបន្ថែម ឬផ្លាស់ប្ដូរអ្នករួមខ្ចី ឬអ្នកធានា ផ្លាស់ប្ដូររបៀបបង់ប្រាក់ពីការបង់រំលស់ទៅជាការបង់តែការប្រាក់ លើកលែង ឬបន្ថយទ្រព្យធានា បន្ថយលក្ខខណ្ឌកិច្ចសន្យា ផ្ដល់រយៈពេលអនុគ្រោះដោយគ្មានការសងប្រាក់ត្រលប់(មិនបង់សោះ)រយៈពេល ៦ខែ។
អ្នកនាំពាក្យសមាគមមីក្រូហិរញ្ញវត្ថុ លោក កាំង តុងងី អះអាងថា ស្ថាប័នហិរញ្ញវត្ថុទាំងនោះ ផ្ដល់ការកែសម្រួលលក្ខខណ្ឌបង់ប្រាក់លើអតិថិជន ទាំងឥណទានក្រុមធានាដែលអ្នកខ្ចីចងក្រងគ្នាជាក្រុមធានាគ្នាទៅវិញទៅមក និងឥណទានបុគ្គលដែលអ្នកខ្ចីបានខ្ចីប្រាក់ម្នាក់ឯងដោយដាក់ទ្រព្យបញ្ចាំ ព្រមទាំងអ្នកខ្ចីបង់រំលស់ឧបករណ៍ប្រើប្រាស់ផង។
លោក កាំង តុងងី៖ «ការរៀបចំកម្ចីជូនអតិថិជន នឹងធ្វើឡើងសកម្មរហូតដល់ចុងឆ្នាំ២០២០។ បើអតិថិជនណាគាត់មានបញ្ហាពិតប្រាកដ គាត់អាចទាក់ទងភ្នាក់ងារឥណទាន ឬស្ថាប័នដែលគាត់ខ្ចីប្រាក់ គេ [ស្ថាប័នហិរញ្ញវត្ថុ] នឹងសិក្សាទៅលើស្ថានភាពជាក់ស្ដែង និងទំហំផលប៉ះពាល់។ គ្រឹះស្ថាន គេនឹងផ្ដល់ជម្រើសជូនអតិថិជន បើអតិថិជនទទួលយកជម្រើសណាមួយ គេនឹងផ្ដល់ជូនពួកគាត់»។
លោក កាំង តុងងី បន្ថែមថា អ្នកខ្ចីដែលមានបញ្ហាហិរញ្ញវត្ថុ គឺមកពីវិស័យសំខាន់មួយចំនួន រួមមាន វិស័យសេវាកម្មទេសចរណ៍ វិស័យពាណិជ្ជកម្ម និងវិស័យកសិកម្ម ជាដើម។ លោកថា គ្រឹះស្ថានមីក្រូហិរញ្ញវត្ថុអាចរៀបចំឥណទានឡើងវិញជូនអតិថិជនបាន លុះត្រាតែមានការស្នើសុំពីអតិថិជន។
នាយករងអង្គការលីកាដូ លោក អំ សំអាត ថ្លែងស្វាគមន៍ចំពោះចំណាត់ការរបស់គ្រឹះស្ថានមីក្រូហិរញ្ញវត្ថុនេះ ប៉ុន្តែ លោកលើកទឹកចិត្តឱ្យពង្រីកការងារនេះបន្ថែមទៀត ដោយលោកស្នើឱ្យស្ថាប័នហិរញ្ញវត្ថុត្រូវផ្ដល់ព័ត៌មានទូលំទូលាយពីសំណើសុំសម្រួលរបៀបសងប្រាក់នេះ។ លោកបញ្ជាក់ថា ប្រជាពលរដ្ឋជាច្រើនមិនទាន់ដឹងថា ពួកគាត់អាចសុំពន្យារពេលសងប្រាក់ ឬស្នើសុំកែប្រែលក្ខខណ្ឌបង់ប្រាក់ទៅស្ថាប័នហិរញ្ញវត្ថុបាននោះឡើយ។
លោក អំ សំអាត៖ «បើសិនជាគាត់ [ពលរដ្ឋ] គ្មានលទ្ធភាពសង ហើយមានមន្ត្រីឥណទានចុះឡើងផ្ទះគាត់ញឹកញាប់ទៀតនោះ គាត់អាចរត់ចោលផ្ទះ ឬធ្វើចំណាកស្រុកដែលមានហានិភ័យខ្ពស់។ មួយទៀត បើដាក់សម្ពាធខ្លាំង ទំនងជាគាត់ [ពលរដ្ឋ] អាចបង្ខំចិត្តលក់ផ្ទះលក់ដីសងទៅទៀត អាហ្នឹងជាបញ្ហា។ មីក្រូហិរញ្ញវត្ថុថាចង់សម្របសម្រួលជាមួយពួកគាត់ [អតិថិជន] តែធ្វើយ៉ាងណាផ្សាយឱ្យទូលាយ កុំដាក់សម្ពាធខ្លាំងពេកលើប្រជាពលរដ្ឋ នោះជាការល្អ»។
សង្គមស៊ីវិលចំនួន ១៣៥អង្គភាព និងសហគមន៍ កាលពីខែមេសាកន្លងទៅ បានអំពាវនាវទៅរដ្ឋាភិបាល និងធនាគារជាតិ ឱ្យបញ្ជាទៅកាន់គ្រឹះស្ថានមីក្រូហិរញ្ញវត្ថុ (MFIs) ឱ្យពន្យាររាល់ការសងប្រាក់កម្ចី និងការប្រាក់យ៉ាងហោចណាស់ ៣ខែ និងប្រគល់ប័ណ្ណកម្មសិទ្ធិដីធ្លីជាទ្រព្យបញ្ចាំដល់កូនបំណុលវិញ ដើម្បីចៀសវាងការគំរាមកំហែងដល់សិទ្ធិកាន់កាប់ដីធ្លី និងអាចនាំឱ្យមានការរំលោភសិទ្ធិមនុស្ស។ ប៉ុន្តែ មន្ត្រីរដ្ឋាភិបាលមិនឆ្លើយតប ខណៈដែលតំណាងគ្រឹះស្ថានមីក្រូហិរញ្ញវត្ថុ រិះគន់ថា ជាសំណើខ្វះវិជ្ជាជីវៈដែលនាំឱ្យអន្តរាយដល់វិស័យហិរញ្ញវត្ថុ។
អ្នកបើករថយន្តឈ្នួលទៅមក បន្ទាយមានជ័យ- ភ្នំពេញ លោក សែម សឿន ថ្លែងប្រាប់វីអូឌីថា លោកបានខ្ចីប្រាក់មីក្រូហិរញ្ញវត្ថុជាង ១ម៉ឺនដុល្លារកាលពីឆ្នាំ២០១៩ ដើម្បីបង្គ្រប់ទិញឡានរត់ឈ្នួល (តាក់ស៊ី)។ លោកថា លោកត្រូវបង់ប្រាក់ជាង ៥០០ដុល្លារក្នុង ១ខែ ប៉ុន្តែ ៣ខែចុងក្រោយនេះ លោករកចំណូលមិនបាន ព្រោះមិនសូវមានអ្នកជិះឡានដោយសារកូវីដ១៩។ លោកថា លោកបានសុំម្ចាស់បំណុលពន្យារពេលសងប្រាក់ទម្រាំស្ថានភាពកូវីដស្ងប់ស្ងាត់វិញ ប៉ុន្តែ មិនទទួលបានការយល់ព្រមនោះឡើយ។
លោក សែម សឿន ប្រាប់ថា៖ «កាលខ្ចី ខ្ញុំយកប្លង់ដីម៉ែខ្ញុំដាក់ ដោយសារតែដីខ្ញុំតូចពេក គេអត់ឱ្យលុយច្រើនគ្រប់ទិញឡាន។ តែដល់ពេលរត់ឡានមិនបាន យើងអត់មានអីបង់ឱ្យគេទេ ទៅសុំពន្យារដែរ តែគេថា យើងខុសលក្ខខណ្ឌគេ ព្រោះកាលខ្ចីដាក់ថា លក់ចាប់ហួយ។ យើងដាក់ឱ្យតែបានលុយទិញឡានរកស៊ីទៅ ដល់អីចឹងមានតែបង់យឺតបង់អីខ្វះខ្លះអីទៅ គេពិន័យហូរហែ តែមិនដឹងធ្វើម៉េច បើយើងអត់ ចេះតែទ្រាំទៅ»។
មន្ត្រីសង្គមស៊ីវិល លើកឡើងថា ពលរដ្ឋដែលមានប្រភពចំណូលមកពីការធ្វើការរោងចក្រ អ្នកធ្វើការងារសេវាកម្សាន្ត ពលករចំណាកស្រុកនៅក្រៅប្រទេសជាដើម អាចនឹងមិនមានលទ្ធភាពសងបំណុលគ្រឹះស្ថានហិរញ្ញវត្ថុនោះឡើយ។
អ្នកផ្ដល់ប្រឹក្សាផ្នែកហិរញ្ញវត្ថុ លោក ង៉ែត ជូ មានប្រសាសន៍ថា ស្ថាប័នហិរញ្ញវត្ថុត្រូវសិក្សាពីលទ្ធភាពរៀបចំឥណទានឡើងវិញជូនអតិថិជន ដោយមានភាពបត់បែនទៅតាមស្ថានភាពជាក់ស្ដែង។ លោកថា ធនាគារជាតិក៏គួរតែណែនាំឱ្យគ្រឹះស្ថានហិរញ្ញវត្ថុពង្រីកការផ្ដល់ការអនុគ្រោះលើឥណទានវិស័យផ្សេងៗទៀតលើចំណាត់ការដែលមានស្រាប់។
លោក ង៉ែត ជូ ប្រាប់ថា៖ «គ្រឹះស្ថានទាំងអស់ហ្នឹងអាចយកការបកស្រាយទៅលើទិដ្ឋភាពជាក់ស្ដែង ហើយដាក់សំណើទៅធនាគារជាតិទៅ ឧទាហរណ៍ថា គាត់ខ្ចីយកមកធ្វើកសិកម្ម តែប្រភពចំណូលសងពីរោងចក្រ ខាងស្ថាប័នហិរញ្ញវត្ថុគួរអនុគ្រោះដែរ។ បើពន្យារបាន គួរពន្យារថែមទៀតទៅ»។
សេចក្ដីប្រកាសរបស់សមាគមគ្រឹះស្ថានមីក្រូហិរញ្ញវត្ថុ បង្ហាញថា គិតត្រឹមដំណាច់ត្រីមាសទីមួយឆ្នាំ២០២០ អ្នកខ្ចីប្រាក់ពីគ្រឹះស្ថានមីក្រូហិរញ្ញវត្ថុនៅកម្ពុជា មានចំនួនជាង ២លាន ២សែននាក់ សរុបទឹកប្រាក់ជាង ៣០ម៉ឺនលានរៀល ឬស្មើនឹងជាង ៧,៤០០លានដុល្លារ។ អតិថិជនផ្ញើប្រាក់សរុបមានចំនួនជាង ២.៨លាននាក់ និងមានទំហំទឹកប្រាក់សរុបជាង ១៤ម៉ឺនលានរៀល ឬស្មើនឹងង ៣,៦០០លានដុល្លារ។ ផ្អែកតាមតួលេខនេះ អតិថិជនម្នាក់ជាប់បំណុលមីក្រូហិរញ្ញវត្ថុប្រមាណ ៣៥០០ដុល្លារ៕