តុលាការជាន់ខ្ពស់កម្ពុជា បានសម្រេចរក្សាសេចក្ដីសម្រេចរបស់តុលាការជាន់ទាប ជុំវិញបណ្ដឹងជំទាស់នឹងការដាក់ភស្តុតាងថ្មីនៅក្នុងដំណើរការជម្រះក្ដីសំណុំរឿង«ក្បត់ជាតិ»ចោល ទៅលើអតីតមេដឹកនាំបក្សប្រឆាំង លោក កឹម សុខា ដែលកំពុងស្ថិតក្នុងដំណាក់កាលផ្អាកដំណើរការ។
អ្នកនាំពាក្យសាលាឧទ្ធរណ៍ លោក ទូច ថារិទ្ធ បានប្រាប់វីអូឌីនៅថ្ងៃនេះថា ប្រធានក្រុមចៅក្រមជំនុំជម្រះ លោក សេង ស៊ីវុត្ថា កាលពីថ្ងៃម្សិលមិញនេះ បានយល់ស្របទៅនឹងសេចក្ដីសម្រេចរបស់សាលាដំបូងរាជធានីភ្នំពេញកាលពីខែមីនាកន្លងមក ដែលអនុញ្ញាតឱ្យមានការដាក់បញ្ចូលនូវភស្តុតាងថ្មីបន្ថែមទៀត ដោយថា ការសម្រេចនេះស្របតាមនីតិវិធី។
លោក កឹម សុខា ប្រធានគណបក្សសង្គ្រោះជាតិដែលត្រូវបានដាក់ឱ្យខុសច្បាប់ហើយនោះ ត្រូវបាននាំយកមកជំនុំជម្រះតាំងពីខែមករាមក ជុំវិញសំណុំរឿងចោទប្រកាន់«ក្បត់ជាតិ» ឬការចោទថា មេបក្សរូបនេះបានឃុបឃិតជាមួយរដ្ឋបរទេសដើម្បីផ្ដួលរំលំរដ្ឋាភិបាល។ ការចោទប្រកាន់នេះ ត្រូវបានលោក កឹម សុខា ច្រានចោល។ ប្រសិនបើរកឃើញមានទោស លោកនឹងប្រឈមមុខនឹងការជាប់ពន្ធនាគារដល់ទៅ ៣០ឆ្នាំ។
ក្រុមមេធាវីការពារក្ដីឱ្យលោក កឹម សុខា បានជំទាស់នឹងសេចក្ដីសម្រេចរបស់តុលាការរាជធានីភ្នំពេញកាលពីចុងខែមីនាកន្លងមកនេះ ដោយបានចោទសួរពីមូលហេតុដែលក្រុមអយ្យការត្រូវដាក់បញ្ចូលភស្តុតាងថ្មីនៅដំណាក់កាលដំណើរការសវនាការជំនុំជម្រះក្ដីនេះ ក្រោយពីមេបក្សប្រឆាំងរូបនេះត្រូវបានចាប់ដាក់ឃុំអស់រយៈពេលជាង ២ឆ្នាំ ចាប់តាំងពីការចាប់ខ្លួនកាលពីឆ្នាំ២០១៧។
ដំណើរការសវនាការជម្រះក្ដីសំណុំរឿងនេះ ត្រូវបានពន្យារពេលអស់រយៈពេល ២ខែមកហើយក្រោយពីក្រុមមេធាវីការពារក្ដីលោក កឹម សុខា និងក្រុមមេធាវីរដ្ឋាភិបាល បានស្នើផ្អាកសវនាការអំឡុងពេលដែលវីរុសកូវីដ១៩ បន្តរាតត្បាត។
ភស្តុតាងថ្មីដែលស្នើឡើងដោយក្រុមអយ្យការ មានឃ្លីបវីដេអូចំនួន ៧ មានបញ្ចូលទាំងអក្សររួចស្រេច ដែលត្រូវបានដាក់បញ្ចូលកាលពីចុងខែកុម្ភៈកន្លងមក និងមានសេចក្ដីរាយការណ៍របស់វិទ្យុសំឡេងសហរដ្ឋអាមេរិក (VOA) ដែលបង្ហាញពីការបង្កើតគណបក្សសង្គ្រោះជាតិកាលពីឆ្នាំ២០១២ និងវីដេអូយកចេញពីការតវ៉ានៅផ្លូវ វេង ស្រេង នៅក្រោយការបោះឆ្នោតជាតិឆ្នាំ២០១៣។
និយាយខាងក្រៅសាលាឧទ្ធរណ៍ ក្រោយចេញពីបន្ទប់សវនាការកាលពីថ្ងៃពុធ អ្នកស្រី ម៉េង សុភារី សហមេធាវីមួយរូបការពារក្ដីឱ្យលោក កឹម សុខា បានប្រាប់អ្នកយកព័ត៌មានថា សាលាឧទ្ធរណ៍សម្រេចតម្កល់សេចក្ដីសម្រេចរបស់តុលាការថ្នាក់ក្រោម ដោយចៅក្រមមួយរូបនិយាយថា ភាគីនៅក្នុងបណ្ដឹង អាចដាក់ភស្តុតាងដោយសេរី។
អ្នកស្រី សុភារី បានប្រាប់វីអូឌីនៅថ្ងៃនេះតាមទូរសព្ទថា ក្រុមមេធាវីការពារក្ដីលោក កឹម សុខា ខកចិត្តចំពោះសេចក្ដីសម្រេចរបស់សាលាឧទ្ធរណ៍ ហើយមិនទាន់សម្រេចថា នឹងត្រូវប្ដឹងជំទាស់ទៅតុលាការកំពូលទៀតឬយ៉ាងណាទេ។
អ្នកស្រី សុភារី បន្តទៀតថា អ្នកស្រីមិនគិតថា ភស្តុតាងដាក់បន្ថែមថ្មីនោះ នឹងដាក់បន្ទុកលើកូនក្ដីរបស់អ្នកស្រីឡើយ ប៉ុន្តែ ក្រុមមេធាវីមានក្ដីបារម្ភថា សេចក្ដីសម្រេចរបស់តុលាការ នឹងអនុញ្ញាតឱ្យភាគីអយ្យការដាក់បញ្ចូលភស្តុតាងបន្ថែមទៀតអំឡុងពេលសវនាការក្នុងករណីផ្សេង ដែលចំណុចទាំងនេះបញ្ជាក់ថា រយៈពេលនៃការស៊ើបអង្កេតកន្លងមក មិនសូវសំខាន់ ហើយបញ្ជាក់ថា ការស៊ើបអង្កេតកន្លងមក មិនមានភស្តុតាងគ្រប់គ្រាន់សម្រាប់យកសំណុំរឿងនេះមកកាត់ក្ដីនោះឡើយ។
អ្នកស្រី សុភារី បន្ថែមថា នៅក្នុងសំណុំរឿងលោក កឹម សុខា នេះ ក្រុមអយ្យការបានចេញបញ្ជាបិទបញ្ចប់ការស៊ើបអង្កេត ហើយបញ្ជូនសំណុំរឿងទៅជំនុំជម្រះរួចហើយ។ អ្នកស្រី សុភារី បញ្ជាក់ថា ដំណើរការជំនុំជម្រះកើតឡើងក្រោយពីមានភស្តុតាងគ្រប់គ្រាន់សម្រាប់ដាក់បន្ទុកលើជនត្រូវចោទ។
អ្នកស្រី សុភារី និយាយថា៖ «អ៊ីចឹងហើយ ខ្ញុំសូមសួរថា តើភស្តុតាងមុនៗមិនគ្រប់គ្រាន់ ឬយ៉ាងម៉េច? បើមិនគ្រប់គ្រាន់ទេ ហេតុអ្វីត្រូវបញ្ជូនសំណុំរឿងនេះទៅជំនុំជម្រះ?»
បើតាមអ្នកស្រី សុភារី លោក កឹម សុខា ពុំបានបង្ហាញខ្លួនក្នុងសវនាការនៅសាលាឧទ្ធរណ៍នោះឡើយកាលពីថ្ងៃពុធ ខណៈដែលលោកមានជំនួបពិភាក្សាជាមួយបណ្ដាទូតបរទេសនៅឯគេហដ្ឋានរបស់លោក នៅរាជធានីភ្នំពេញក្នុងសប្ដាហ៍នេះ។
យោងតាមទំព័រហ្វេសប៊ុករបស់លោក អ្នកនយោបាយកម្ពុជារូបនេះ បានជួបជាមួយអគ្គរដ្ឋទូតអាល្លឺម៉ង់ សហភាពអឺរ៉ុប បារាំង និងអូស្ត្រាលី ដែលជំនួបទាំងនេះកើតឡើងមិនដល់មួយសប្ដាហ៍ផង ក្រោយពីកម្ពុជាត្រូវបានសហភាពអឺរ៉ុបដាក់ក្នុងបញ្ជីនៃប្រទេសមាន«ហានិភ័យខ្ពស់»មានប្រព័ន្ធប្រយុទ្ធទន់ខ្សោយប្រឆាំងនឹងការលាងលុយកខ្វក់ និងការផ្ដល់ហិរញ្ញវត្ថុទៅចលនាភេរវកម្ម។
លោក កឹម សុខា និងលោក ហ៊ុន សែន បានជជែកគ្នាកាលពីសប្ដាហ៍មុន អំឡុងពិធីបុណ្យសពម្ដាយក្មេកលោកនាយករដ្ឋមន្ត្រី ដោយរូបថតនៃជំនួបអ្នកទាំងពីរ ត្រូវបានចែកចាយព្រោងព្រាតលើបណ្ដាញសង្គម៕