មន្ត្រីជាន់ខ្ពស់ក្រសួងមហាផ្ទៃទទួលបន្ទុកផ្នែកចរាចរណ៍ផ្លូវគោកបានច្រានចោលរបាយការណ៍ដែលផ្សព្វផ្សាយថា រយៈពេល១៤ថ្ងៃលុយផាកពិន័យមានចំនួន៤២ម៉ឺនដុល្លារ ហើយថា ពេលនេះលុយផាកពិន័យទាន់បានបូកសរុបទេ។
អគ្គស្នងការរងនគរបាលជាតិ លោក ហ៊ឹម យ៉ាន អះអាងថា ចំនួនលុយដែលផ្សព្វផ្សាយថា មានចំនួន៤២ម៉ឺនបានពីការផាកពិន័យរយៈពេល២សប្តាហ៍នោះគឺជាទិន្នន័យប៉ាន់ស្មានតែប៉ុណ្ណោះ។ លោកបញ្ជាក់ថា ពេលនេះលុយដែលបានពីការផាកពិន័យគឺមិនទាន់បូកសរុបនៅឡើយទេ។
លោក ហ៊ឹម យ៉ាន ថ្លែងប្រាប់គេហទំព័រនគរបាលជាតិថា៖ «តួលេខដែលបានចែកចាយនោះ គ្រាន់តែជាការប៉ាន់ស្មានតែប៉ុណ្ណោះ អគ្គស្នងការដ្ឋាននគរបាលជាតិ សូមធ្វើការច្រានចោលទាំងស្រុង។ ហើយតួលេខពិតប្រាកដប៉ុន្មាននោះ យើងមិនទាន់ដឹងច្បាស់នៅឡើយទេ ដូច្នេះមិនអាចនិយាយបានឡើយ ព្រោះអ្នកត្រូវពិន័យខ្លះ មិនទាន់មកបង់ប្រាក់នៅឡើយទេ»។
រាជរដ្ឋាភិបាលចាប់ផ្តើមបង្កើនចំនួនលុយផាកពិន័យចរាចរណ៍ពី៣ទៅ៥ដង ដែលចាប់ផ្តើមអនុវត្តន៍ពីថ្ងៃទី១ខែឧសភាឆ្នាំ២០២០។ ចំនួនលុយដែលបានពីការផាកពិន័យគឺ៧០ភាគរយប្រគល់ទៅគនរបាលដែលអនុវត្តន៍ច្បាប់ ២៥ភាគរយដាក់ទៅអង្គភាពនគរបាល និង ៥ភាគរយដាក់ចូលក្នុងថវិកាជាតិ។
របាយការណ៍នគរបាលជាតិបង្ហាញថា រយៈពេល១៤ថ្ងៃនៃការរឹតបន្តឹងច្បាប់ចរាចរណ៍ផ្លូវគោកនេះ បានផាកពិន័យយានយន្តចំនួន ២២ ៣៨១គ្រឿង ក្នុងនោះ ម៉ូតូ ១៦ ៥៧៩គ្រឿង និង រយន្តចំនួន៥ ៨០២គ្រឿង៕