កម្មករ-កម្មការិនីរោងចក្រមួយនៅសួនឧស្សាហកម្មកាណាឌីយ៉ា ខណ្ឌពោធិ៍សែនជ័យ រាជធានីភ្នំពេញ នៅថ្ងៃនេះ បាននាំគ្នាតវ៉ាបិទផ្លូវចូលសួនមួយនេះរយៈពេល ៤ម៉ោង ដើម្បីទាមទារទៅម្ចាស់សួនឱ្យមានការអនុញ្ញាតដឹកអីវ៉ាន់ដែលលក់ឡាយឡុងចេញពីក្រុមហ៊ុន។
លោក ប៊ូ ថេត ដែលអះអាងថា ជាតំណាងកម្មករនៅរោងចក្រកាត់ដេរសម្លៀកបំពាក់ អ៊ិនធើណាស្យូណាល់ ហ្វេសស៊ិន រ៉ូយ៉ាល់ (INTERNATIONAL FASHION ROYAL CO., LTD) នៅសួនឧស្សាហកម្មកាណាឌីយ៉ា ស្ថិតក្នុងសង្កាត់ចោមចៅ បានរៀបរាប់ប្រាប់វីអូឌីកន្លែងតវ៉ាថា កាលពីពីរខែមុន ថៅកែរោងចក្រមួយនេះ បានប្រកាសបិទទ្វាររោងចក្រ ដោយពុំមានលុយបើកប្រាក់ឈ្នួល និងទូទាត់អត្ថប្រយោជន៍ផ្សេងៗជូនកម្មករឡើយ។
តំណាងកម្មកររូបនេះបន្តថា បន្ទាប់ពីគ្មានលទ្ធភាពដោះស្រាយសំណងជូនកម្មករ គឺថៅកែរោងចក្រ អ៊ិនធើណាស្យូណាល់ ហ្វេសស៊ិន រ៉ូយ៉ាល់ បានសម្រេចឱ្យក្រុមកម្មករលក់អីវ៉ាន់ និងសម្ភាររបស់ក្រុមហ៊ុន ដើម្បីយកលុយនោះ ដោះស្រាយសំណងជូនកម្មករ។
លោក ប៊ូ ថេត បន្ថែមថា ក្រោយតវ៉ា និងដេកយាមមុខរោងចក្រជាង ២ខែរួចមក គឺកាលពីសប្តាហ៍មុននេះ ក្រុមកម្មករសម្រេចលក់អីវ៉ាន់ និងសម្ភារទាំងអស់របស់ក្រុមហ៊ុន ដោយទទួលបានកម្រៃជាង ១១ម៉ឺនដុល្លារ ដើម្បីបែងចែកទៅឱ្យកម្មករ ៩៣៩នាក់ ប៉ុន្តែ លោកថា បន្ទាប់ពីក្រុមកម្មករលក់បាន គឺម្ចាស់សួនកាណាឌីយ៉ាមិនអនុញ្ញាតឱ្យអ្នកទិញដឹកអីវ៉ាន់ និងសម្ភារទាំងនោះចេញពីរោងចក្រឡើយ។
លោកបន្ថែមថា៖ «ដោយសារម្ចាស់សួនមិនអនុញ្ញាតឱ្យអ្នកទិញសម្ភារហ្នឹងដឹកអីវ៉ាន់ចេញ ដោយគាត់ឱ្យរង់ចាំថ្ងៃនេះ ថ្ងៃនោះ។ ដល់អីចឹង ធ្វើឱ្យកម្មករយើងពិបាក មិនអាចរង់ចាំបានទេ។ អីចឹងហើយបានជាពួកខ្ញុំមកទាំងអស់គ្នា ដើម្បីតវ៉ាសុំទៅអាជ្ញាធរពាក់ព័ន្ធជួយអន្តរាគមន៍ទៅខាងម្ចាស់សួនឱ្យអនុញ្ញាតឱ្យមានការដឹកអីវ៉ាន់ចេញទៅ គឺឈ្មួញអ្នកទិញហ្នឹងគេយកលុយមកដើម្បីបើកប្រាក់ខែជូនកម្មករហើយ»។
កម្មការិនីដែលអះអាងថា បម្រើការងារនៅរោងចក្រ អ៊ិនធើណាស្យូណាល់ ហ្វេសស៊ិន រ៉ូយ៉ាល់រយៈពេល ៥ឆ្នាំ អ្នកស្រី សាបាន ធារី ប្រាប់វីអូឌីកន្លែងតវ៉ាថា ការលក់អីវ៉ាន់ និងសម្ភាររបស់ក្រុមហ៊ុននោះ គឺអាចទូទាត់បានសម្រាប់តែប្រាក់ឈ្នួលចុងក្រោយរបស់កម្មករប៉ុណ្ណោះ ដោយមិនអាចទូទាត់អត្ថប្រយោជន៍ផ្សេងៗរបស់កម្មករបានឡើយ។
កម្មការិនីរូបនេះ អះអាងថា មូលហេតុដែលម្ចាស់សួនឧស្សាហកម្មកាណាឌីយ៉ាមិនអនុញ្ញាតឱ្យឈ្មួញដឹកអីវ៉ាន់ និងសម្ភាររបស់ក្រុមហ៊ុនចេញនោះ គឺដោយសារថៅកែរោងចក្រនៅជំពាក់ថ្លៃជួលអាគារប្រមាណ ១ម៉ឺន ៨ពាន់ដុល្លារទៀត។
អ្នកស្រី សាបាន ធារី លើកឡើងថា រយៈពេលកម្មករតវ៉ា និងដេកយាមមុខរោងចក្រ រង់ចាំដំណោះស្រាយនោះ គឺពួកគាត់ជួបការលំបាកច្រើនណាស់ ដោយពុំមានលុយចាយវាយប្រចាំថ្ងៃ គ្មានលុយបង់បន្ទប់ជួល ទឹកភ្លើង និងថ្លៃបង់សងធនាគារ ជាដើម។
អ្នកស្រីបន្ថែមថា៖ «ពេលថៅកែអត់បើកលុយឱ្យអីចឹង គឺពួកខ្ញុំខ្វះខាតខ្លាំងណាស់។ ចងការលុយគេយកមកចាយបណ្ដោះអាសន្នសិន យកមកបង់ថ្លៃផ្ទះ ទឹកភ្លើង។ ហើយឥលូវ ម្ចាស់សួនកាណាឌីយ៉ាហ្នឹងគាត់អត់ឱ្យឈ្មួញដឹកអីវ៉ាន់ចេញ អីចឹងវារឹតតែធ្វើឱ្យពួកខ្ញុំពិបាកកាន់តែខ្លាំង។ ម្ចាស់សួនអត់ឱ្យដឹកអីវ៉ាន់ចេញហ្នឹង ដោយសារថៅកែជំពាក់លុយគាត់ ហើយម្ចាស់សួនហ្នឹងសុំកាត់លុយពីកម្មករខ្លះចំនួន ១ម៉ឺន ៨ពាន់ដុល្លារ បើគាត់កាត់ទៀត ពួកខ្ញុំអត់បានអីសោះ»។
វីអូឌីមិនទាន់អាចរកការសុំឆ្លើយតបពីតំណាងម្ចាស់សួនឧស្សាហកម្មកាណាឌីយ៉ាបានទេ ពាក់ព័ន្ធករណីនេះ។
មន្ត្រីខណ្ឌពោធិ៍សែនជ័យដែលប្រាប់ថា ឈ្មោះ លី ដែលចុះឃ្លាំមើលការតវ៉ានេះ មានប្រសាសន៍ថា លោកបានត្រឹមតែឃ្លាំមើល និងសម្របសម្រួលកុំឱ្យកើតមានអំពើហិង្សាផ្សេងៗប៉ុណ្ណោះ។ លោកថា តួនាទីក្នុងការដោះស្រាយបញ្ហានេះ គឺថ្នាក់លើ និងក្រសួងការងារ។
អ្នកនាំពាក្យក្រសួងការងារ និងបណ្តុះបណ្ដាលវិជ្ជាជីវៈ លោក ហេង សួរ ប្រាប់វីអូឌីតាមប្រព័ន្ធ Telegram ថា មន្ត្រីអធិការការងារ និងគណៈកម្មការដោះស្រាយកូដកម្មបាតុកម្មគ្រប់មុខសញ្ញា កំពុងចុះ និងសម្របសម្រួលដោះស្រាយបញ្ហានេះហើយ។
កាលពីថ្ងៃទី៨ ខែឧសភា សមាគមរោងចក្រកាត់ដេរនៅកម្ពុជា (GMAC) បានសុំទៅម្ចាស់អគារទាំងអស់ដែលកំពុងជួលកន្លែងឱ្យរោងចក្រកាត់ដេរសម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា ចុះថ្លៃឈ្នួលយ៉ាងតិច ៣០ភាគរយ រយៈពេល ៣ខែ ទៅ ៦ខែ ដើម្បីជួយសម្រួលដល់ការចំណាយរបស់រោងចក្រ។
សមាគមមួយនេះលើកឡើងថា ឧស្សាហកម្មកាត់ដេរសម្លៀកបំពាក់ ផលិតស្បែកជើង និងផលិតផលផ្សេងទៀតធ្វើនៅកម្ពុជា កំពុងរងផលប៉ះពាល់យ៉ាងធ្ងន់ធ្ងរដោយសារជំងឺកូវីដ១៩ ដោយថា ការចំណាយរបស់រោងចក្រទៅលើថ្លៃជួលអគារ និងទីតាំង ក៏ជាបន្ទុកចំណាយដ៏ធ្ងន់ធ្ងរមួយដែរ ខណៈដែលសមាជិករបស់ខ្លួនកំពុងរងគ្រោះដោយសារការលុបចោលនៃការបញ្ជាទិញជាច្រើន និងគ្មានការបញ្ជាទិញថ្មីទៀតនោះ។
GMAC អះអាងថា ការចុះថ្លៃឈ្នួលរបស់ម្ចាស់អគារ និងម្ចាស់ទីតាំង នឹងអាចជួយសម្រាលបន្ទុកនៃការចំណាយរបស់រោងចក្រ និងចូលរួមចំណែកស្តារសេដ្ឋកិច្ចនៅកម្ពុជា ដើម្បីទ្រទ្រង់វិស័យមួយនេះ៕