ប្រជាពលរដ្ឋមួយចំនួននៅរាជធានីភ្នំពេញ ចាប់ផ្តើមបើកដំណើរការអាជីវកម្ម និងដើរកម្សាន្តជាប្រក្រតីឡើងវិញ បន្ទាប់ពីអ្នកឆ្លងវីរុសកូរ៉ូណាទាំងអស់ ត្រូវបានព្យាបាលជាសះស្បើយ ហើយកម្ពុជាមិនបានរកឃើញករណីឆ្លងថ្មីអស់រយៈពេលជាង ១ខែមកហើយនោះ។
កម្ពុជាបានប្រកាសពីការរកឃើញករណីឆ្លងវីរុសកូរ៉ូណាកើតឡើងលើមនុស្ស ១២២នាក់នៅទូទាំងប្រទេស ចាប់តាំងពីចុងខែមករារហូតដល់ថ្ងៃទី១២ ខែមេសា ជាពេលដែលកម្ពុជាបានប្រកាសពីករណីឆ្លងចុងក្រោយបំផុត។
នៅពេលកម្ពុជាប្រកាសពីការរកឃើញអ្នកឆ្លងវីរុសនេះកាន់តែច្រើននៅក្នុងខែមីនាកន្លងមក រដ្ឋាភិបាលបានសម្រេចហាមឃាត់ការជួបជុំនានាដែលប្រមូលផ្ដុំមនុស្សច្រើន បិទអាជីវកម្មសេវាកម្សាន្តផ្សេងៗបណ្ដោះអាសន្ន ផ្អាកការប្រារព្ធពិធីបុណ្យចូលឆ្នាំថ្មី និងដាក់បម្រាមលើការធ្វើដំណើរអស់រយៈពេលមួយសប្ដាហ៍អំឡុងពេលចូលឆ្នាំថ្មី។
ប៉ុន្តែ ក្រសួងសុខាភិបាលបានប្រកាសកាលពីថ្ងៃសៅរ៍ចុងសប្ដាហ៍កន្លងមកនេះថា កម្ពុជាគ្មានអ្នកឆ្លងវីរុសកូរ៉ូណាស្ថិតនៅក្រោមការព្យាបាលទៀតនោះឡើយ បន្ទាប់ពីស្ត្រីម្នាក់វ័យ ៣៦ឆ្នាំ ជាអ្នកជំងឺចុងក្រោយគេដែលត្រូវបានផ្ទេរមកពីមន្ទីរពេទ្យខេត្តបន្ទាយមានជ័យ មកព្យាបាលនៅមន្ទីរពេទ្យមិត្តភាពខ្មែរ-សូវៀតនោះ ត្រូវបានព្យាបាលជាសះស្បើយ។
ពលរដ្ឋមួយចំនួនក្នុងរាជធានីភ្នំពេញ បានមើលឃើញពីសកម្មភាពវិលត្រឡប់មកវិញជាបណ្ដើរៗនៃអាជីវកម្មនានា និងសកម្មភាពធ្វើដំណើររបស់ប្រជាពលរដ្ឋ។
អាជីវករម្នាក់នៅម្តុំផ្សារឃ្លាំងរំសេវ អ្នកស្រី កែវ ណៃ និយាយថា ប្រហែលជាជិតមួយសប្តាហ៍កន្លងមកនេះ នៅតាមដងផ្លូវក្នុងរាជធានីភ្នំពេញ មានប្រជាពលរដ្ឋជាច្រើនដើរកម្សាន្ត និងចូលញ៉ាំកន្លែងគាត់លក់ដូរប្រហែលជា ៧០ភាគរយ។ ករណីនេះ អ្នកស្រីថា ធ្វើឱ្យគាត់លក់ដូរធម្មតាវិញហើយ។
អ្នកស្រីនិយាយថា៖ «ខ្ញុំគិតថា វាធម្មតាវិញហើយក្មួយ! លក់ដូរមធ្យម គ្រាន់បើជាងមុន ពីមុនស្ងាត់ភ្ញៀវជំនាន់កូវីដ១៩»។
អ្នកស្រី កែវ ណៃ បន្តថា ការលក់ដូររបស់គាត់ក៏បានអនុវត្តវិធានការការពារសុវត្ថិភាពខ្លួនឯង ដោយពាក់ម៉ាស់ និងអនាម័យតាមការណែនាំរបស់ក្រសួងសុខាភិបាលទៀតផង។
អ្នកប្រកបរបរលក់ដូរចល័តតាមចិញ្ចើមផ្លូវ លោក ឆៃ ស្នា និយាយថា ក្រោយពីក្រសួងសុខាភិបាលព្យាបាលអ្នកឆ្លងជំងឺកូវីដ១៩ ជាសះស្បើយ និងរកមិនឃើញអ្នកឆ្លងថ្មីនោះ លោកសង្កេតឃើញថា នៅតាមហាងម៉ាស្សា និងស្ទីមសូណាមួយចំនួនចាប់ផ្តើមដំណើរការឡើងវិញផងដែរ។
លោកមានប្រសាសន៍ថា៖ «និយាយរួមទៅ វាចេះតែបារម្ភដែរ មិនដឹងអ្នកណាចូល [ម៉ាស្សា] ខ្លះ បើសិនជាបិទភាគច្រើន វាអាចអត់ឆ្លង ព្រោះកន្លែងម៉ាស្សា គេអត់ពាក់ម៉ាស់ទេ គេចល័ត។ បើតាមកន្លែងគេរកស៊ីតិចតួច គេពាក់ម៉ាស់ តាមផ្លូវ តាមអីចឹងទៅ និយាយរួមទៅ បើក្រសួងគេណែនាំថា បិទ ក៏បិទតាមគាត់ទៅ ព្រោះបើយើងប្រឆាំង វាខុសច្បាប់»។
អ្នករត់តាក់ស៊ីនៅម្តុំផ្សារដើមគ លោក តែម សារ័ត្ន និយាយថា នៅចុងសប្តាហ៍នេះ ប្រជាពលរដ្ឋនាំគ្នាឡើងចុះភ្នំពេញ និងអ្នកខ្លះទៀតនាំគ្នាធ្វើដំណើរតាមរថយន្តឯកជន ដើម្បីដើរកម្សាន្តនៅខេត្តកំពតផងដែរ។ ករណីនេះ ធ្វើឱ្យគាត់ងាយស្រួលរកលុយទ្រទ្រង់ជីវភាពគ្រួសារ។
លោកនិយាយថា៖ «ការដើរទៅ ធ្វើដំណើរទៅ រកស៊ីទៅ យើងក៏បានជាងមុនដែរ [ជាង ២ខែមុន] មុនអត់មានអ្នកទិញ អត់មានអ្នកលក់អ្នកដូរ ឥលូវយើងមានអស់ហើយ [អ្នកដើរលេង] ទៅលេងនៅខាងកែប ខាងបូកគោ [ភ្នំបូកគោ] ខាងរមណីយដ្ឋានទឹកឈូ ខ្សែរ៉ត ដូងទេរ និយាយទៅ ខាងខេត្តកំពតមានទេសចរច្រើន បើថ្ងៃសៅរិ៍ ថ្ងៃអាទិត្យ ស្ទះនៅស្ពានថ្មី ខេត្តកំពត»។
ម្ចាស់ហាងម៉ាស្សា និងស្ទីម នៅម្តុំផ្សារឃ្លាំងរំសេវ លោក តាំង រឹត មានប្រសាសន៍ថា ហាងលោកមិនបានបើកស្ទីមសូណា ដូចការលើកឡើងរបស់មតិមួយចំនួនលើកឡើងនោះទេ ដោយគ្រាន់អនុញាតឱ្យបុគ្គលិកម៉ាស្សា ឬកោសខ្យល់ឱ្យអ្នកដែលស្គាល់គ្នាជិតខាងតែប៉ុណ្ណោះ។
លោកមានប្រសាសន៍ថា៖ «កូនចៅយើងមកបណ្តើរៗ ព្រោះឮថាដាច់ខែនេះ គេឱ្យបើក [ហាងម៉ាស្សា ស្ទីមសូណា] ដែរ បើនិយាយឱ្យយើងបើកស្ទីម …អត់ទាន់បើកទេ ហើយមុននឹងខ្ញុំទទួលពីរទៅបីនាក់ដែលអ្នកជិតខាង ខ្ញុំមើលគេបើកច្រើនណាស់ គ្រប់កន្លែង [ហាងម៉ាស្សា និងស្ទីមសូណាផ្សេង] គេបើកអស់ហើយ ភោជនីយដ្ឋានអី ដល់ចឹងយើងដាក់តែម្នាក់ពីរនាក់ដែលថាម៉ូយជិតៗហ្នឹង បើឱ្យចំហ យើងអត់បើកទេ»។
ក្នុងសេចក្តីប្រកាសព័ត៌មានរបស់សាលារាជធានីភ្នំពេញ ចុះផ្សាយកាលពីម្សិលមិញថា ក្រោយពីក្រសួងសុខាភិបាលរកមិនឃើញអ្នកឆ្លងកូវីដ១៩ និងព្យាបាលជាសះស្បើយទាំងអស់នៅកម្ពុជា ធ្វើឱ្យប្រជាពលរដ្ឋ និងម្ចាស់ភោជនីយដ្ឋាន និងអាហារដ្ឋានមួយចំនួនភ្លេចខ្លួន ខ្វះការប្រុងប្រយ័ត្ន រួមទាំងភ្ញៀងផងដែរ។ ករណីនេះ សាលារាជធានីអំពាវនាវទៅម្ចាស់ភោជនីយដ្ឋាន និងអាហារដ្ឋានទាំងអស់ ត្រូវគោរពតាមការណែនាំរបស់ក្រសួងសុខាភិបាលស្តីពីការទប់ស្កាត់ជំងឺកូវីដ១៩ តាមរយៈដាក់អាល់កុល ឬជែលសម្រាប់លាងដៃនៅមុខច្រកចេញ-ចូល និងត្រូវចាត់តាំងបុគ្គលិកធ្វើការវាស់កម្តៅភ្ញៀវមុននឹងអនុញ្ញាតឱ្យចូលក្នុងទីតាំងរបស់ខ្លួន ហើយត្រូវរក្សាគម្លាតសង្គមឱ្យបានត្រឹមត្រូវជាដើម។
សាលារាជធានីព្រមានថា បើម្ចាស់ភោជនីយដ្ឋាន និងអាហារដ្ឋានណាមិនអនុវត្តតាមការណែនាំនេះទេ រដ្ឋបាលរាជធានីនឹងបិទអាជីវកម្មនោះជាបណ្តោះអាសន្ន។
យ៉ាងណា ក្នុងសេចក្តីជូនដំណឹងនោះ មិនឃើញសរសេរហាមដល់ម្ចាស់ហាងម៉ាស្សា និងស្ទីមសូណា មិនឱ្យបើកអាជីវកម្មរបស់ខ្លួននោះទេ។
វីអូឌី មិនអាចសុំការបំភ្លឺបន្ថែមពីអ្នកនាំពាក្យសាលារាជធានីភ្នំពេញ លោក ម៉េត មាសភក្តី បានទេនៅល្ងាចម្សិលមិញនេះ។
អ្នកនាំពាក្យក្រសួងសុខាភិបាល លោក លី សូវ៉ាន់ មានប្រសាសន៍ថា កន្លែងហាងមួយចំនួនដែលក្រសួងបានចេញសេចក្តីប្រកាសព័ត៌មានឱ្យផ្អាកដំណើរការបណ្តោះអាសន្ននោះ លោកថា បើមិនគោរពតាមការណែនាំរបស់ក្រសួងទេ អាជ្ញាធរដែនដីមានសិទ្ធិចាប់បង្ខំឱ្យអនុវត្តតាមនីតិវិធីច្បាប់។
លោកមានប្រសាសន៍ថា៖ «នីតិវិធី [បំរាម] របស់ក្រសួងនៅតែដដែល យើងអត់ទាន់បានផ្លាស់ប្តូរទេ ហើយសុំអាជ្ញាធរដែលជាគណៈកម្មការទប់ស្កាត់ជំងឺកូវីដ១៩ គាត់មានសិទ្ធិគ្រប់គ្រាន់ក្នុងការធ្វើការការពារ គ្រប់គ្រងតាមការណែនាំរបស់ក្រសួងសុខាភិបាល។ ធម្មតា អាជ្ញាធរដែនដី គាត់មានច្បាប់ហើយ អ្នកណាមិនគោរពច្បាប់ ត្រូវធ្វើយ៉ាងម៉េច»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ប្រជាពលរដ្ឋខ្មែរមួយចំនួនភ្លេចខ្លួនការពារសុខភាព ដោយចាប់ផ្តើមដើរកម្សាន្តនៅតាមរមណីយដ្ឋាននានា បន្ទាប់ពីកម្ពុជាព្យាបាលអ្នកឆ្លងកូវីដជាសះស្បើយអស់ និងមិនមានករណីឆ្លងថ្មី។
ដោយឡែក ការបើកហាងម៉ាស្សា និងស្ទីមសូណា ក្រសួងសុខាភិបាលត្រូវហៅម្ចាស់ហាងទាំងនោះទៅពិភាក្សាគ្នារកវិធីបង្ការ ឬទប់ស្កាត់កុំឱ្យឆ្លងរាលដាលជំងឺកូវីដ១៩។
លោកផ្តល់ជាអនុសាសន៍ថា៖ «មន្ទីរសុខាភិបាលឃើញហេតុការណ៍ហើយ គួរតែមានការណែនាំ ឬក៏ហៅម្ចាស់អាជីវកម្ម [ម្ចាស់ហាងម៉ាស្សា] ឬក៏រកវិធានការបង្ការ បើសិនជាពួកគេមិនជាប់ ឬក៏មិនមានលក្ខខណ្ឌគ្រប់គ្រាន់នៅក្នុងបំរាមរបស់រដ្ឋាភិបាលទេ ធ្វើបែបនេះវាជាប្រយោជន៍សម្រាប់អាជីវកម្មផង ហើយវាប្រយោជន៍នៅក្នុងការបង្ការផង ដើម្បីការពារកុំឱ្យមានការឆ្លង [កូវីដ១៩]»។
កម្ពុជាមានករណីកូវីដ១៩ សរុបចំនួន ១២២នាក់ (ស្រី ៣៨នាក់ និងបុរស ៨៤នាក់) ដោយក្នុងនោះ ករណីកើតដំបូងបង្អស់ ត្រូវបានរកឃើញនៅថ្ងៃទី២៧ ខែមករា ឆ្នាំ២០២០ លើបុរសជនជាតិចិនដែលធ្វើដំណើរពីទីក្រុងវូហានមកកាន់ខេត្តព្រះសីហនុ រហូតមកការឆ្លងរាលដាលបន្តបន្ទាប់សរុប ១២២នាក់នៅកម្ពុជា។
ទោះជាបែបនេះក្តី គិតត្រឹមថ្ងៃទី១៦ ខែឧសភានេះ ក្រសួងសុខាភិបាល បានព្យាបាលអ្នកឆ្លងជំងឺកូវីដ១៩ ជាសះស្បើយទាំងអស់សរុបចំនួន ១២២នាក់នោះវិញហើយ។ បើគិតត្រឹមថ្ងៃទី១៨ ខែឧសភានេះ ក្រសួងក៏មិនទាន់រកឃើញករណីឆ្លងថ្មីនៅឡើយ។ ប៉ុន្តែ ក្រសួងសុខាភិបាលនៅតែបន្តអំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់លើបញ្ហាសុខភាពនេះផងដែរ៕
