មេធាវីការពារក្ដីឱ្យសកម្មជនអតីតបក្សប្រឆាំង អះអាងថា សវនាការជំនុំជម្រះសំណុំរឿង«រួមគំនិតក្បត់»ដែលចោទប្រកាន់ទៅលើសកម្មជន ៥នាក់ដែលគាំទ្រអតីតគណបក្សសង្គ្រោះជាតិនៅខេត្តត្បូងឃ្មុំ ត្រូវបានតុលាការសម្រេចលើកពេលហើយ។
សាលាដំបូងខេត្តត្បូងឃ្មុំ កាលពីថ្ងៃទី៣០ ខែមេសា ឆ្នាំ២០២០ បានចេញដីកាដាច់ដោយឡែកពីគ្នា កោះហៅសកម្មជន ៥នាក់ដែលគាំទ្រគណបក្សសង្គ្រោះជាតិដែលត្រូវបានរំលាយចោលទៅហើយនោះ ឱ្យចូលបំភ្លឺនៅថ្ងៃទី២០ ខែឧសភា ជុំវិញបទចោទប្រកាន់«រួមគំនិតក្បត់» ដែលតុលាការថា ប្រព្រឹត្តនៅតាមបណ្ដាញសង្គមហ្វេសប៊ុកកាលពីអំឡុងចុងឆ្នាំ២០១៨ រហូតដល់ខែតុលា ឆ្នាំ២០១៩។
លោក សំ សុគង់ មេធាវីការពារក្ដីឱ្យសកម្មជនទាំង ៥រូបនោះ ប្រាប់វីអូឌីនៅថ្ងៃនេះថា ចៅក្រមសាលាដំបូងខេត្តត្បូងឃ្មុំ បានយល់ព្រមលើកពេលសវនាការទៅថ្ងៃក្រោយតាមសំណើរបស់លោក។ លោកបន្តថា មូលហេតុដែលលោកសុំពន្យារពេលសវនាការ ដោយសារកូនក្ដីរបស់លោកទាំង ៥នាក់នោះ ទើបទទួលបានដីកាកោះពីតុលាការ។
លោក សំ សុខគង់ ប្រាប់ថា៖ «នៅពេលដែលខ្ញុំទៅជួបចៅក្រមនោះ ចៅក្រមគាត់ថា ឱ្យតែមានមូលហេតុសមរម្យ គាត់នឹងពន្យារឱ្យ។ ទាក់ទងនឹងរយៈពេលទទួលដីកាកោះហ្នឹង គឺមានរយៈពេលខ្លី អ៊ីចឹងយើងតាមនីតិវិធីក្រមព្រហ្មទណ្ឌហ្នឹង អ៊ីចឹងការទទួលបានដីការបស់តុលាការ ពេលខ្លះជនជាប់ចោទមានសិទ្ធិក្នុងការសុំពន្យារពេលសវនាការ ដើម្បីទុកពេលវេលាឱ្យបានវែងត្រៀមខ្លួន និងរកភស្តុតាងដោះបន្ទុក»។
លោក សំ សុគង់ បន្តថា គិតចាប់ពីដើមឆ្នាំ២០២០មក មានអតីតសកម្មជនគណបក្សប្រឆាំងចំនួន ១២នាក់ ត្រូវតុលាការចោទប្រកាន់ពីបទល្មើសដាច់ដោយឡែកពីគ្នា ដោយអ្នកខ្លះត្រូវបានចោទពីបទ«ញុះញង់ឱ្យប្រព្រឹត្តបទឧក្រិដ្ឋជាអាទិ៍» ខ្លះទៀតត្រូវបានតុលាការចោទពីបទ «ញុះញង់មិនឱ្យយោធាស្ដាប់បង្គាប់» និង បទ«រួមគំនិតក្បត់»។
លោកបន្តថា ក្នុងចំណោមអ្នកទាំង ១២នាក់ គឺមាន ១១នាក់ ត្រូវបានតុលាការឃុំខ្លួននៅពន្ធនាគារ និងម្នាក់ទៅនៅក្រៅឃុំ ដោយសារគាត់មានជំងឺរហូតដល់ពិការមួយចំហៀងខ្លួន៕
