ក្រសួងវប្បធម៌ និងវិចិត្រសិល្បៈ ប្រកាសឱ្យបើកដំណើរការសារមន្ទីរទូទាំងប្រទេសជូនភ្ញៀវទេសចរបានចូលទស្សនាឡើងវិញ ចាប់ពីថ្ងៃទី១ខែមិថុនាខាងមុខ។
ក្នុងសេចក្ដីប្រកាសព័ត៌មានចុះថ្ងៃទី២១ ខែឧសភា ឆ្នាំ២០២០ ក្រសួងវប្បធម៌ និងវិចិត្រសិល្បៈឱ្យដឹងថា ក្រសួងនឹងបើកឱ្យភ្ញៀវទេសចរបានចូលទស្សនាសារមន្ទីរនានាចាប់ពីថ្ងៃទី០១ ខែមិថុនា ឆ្នាំ២០២០ តទៅ ។
ក្រសួងឱ្យដឹងថា ទោះបីជាក្រសួងអនុញ្ញាតបើកដំណើរការសារមន្ទីរឱ្យភ្ញៀវទេសចរចូលទស្សនាក៏ដោយ ប៉ុន្តែប្រធានសារមន្ទីររាជធានី-ខេត្ត ត្រូវមានអនុវត្តវិធានការដូចជា ពិនិត្យ ឬវាស់កម្ដៅភ្ញៀវមុនឱ្យចូលទស្សនា ប្រើអាកុល ឬសាប៊ូលាងដៃមុនពេលចូល និងចេញពីសារមន្ទីរ រក្សាគម្លាតសុវត្ថិភាព យ៉ាងតិច១ ម៉ែត្រ ហើយបុគ្គលិក អ្នកនាភ្ញៀវ និងភ្ញៀវត្រូវពាក់ម៉ាស់។
ក្រៅពីនោះក្រសួងថា ភ្ញៀវ ឬបុគ្គលិកណាដែលមានបញ្ហាសុខភាព ឬ សង្ស័យ មិនអនុញ្ញាតឱ្យចូលទស្សនាសារមន្ទីរឡើយ។
ក្រសួង៖«សារមន្ទីរ រាជធានី-ខេត្ត អាចទាក់ទង ដើម្បីស្នើសុំព័ត៌មានបន្ថែមតាមរយៈនាយកដ្ឋានសារមន្ទីរនៃក្រសួងវប្បធម៌ និងវិចិត្រសិល្បៈ ០១២ ២៣៣ ៣០៤ /០១២ ៧៧៣ ៨១១»។
រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា មានប្រសាសន៍ថា ចាប់ពីថ្ងៃទី០១ ខែមិថុនា ឆ្នាំ២០២ ក្រសួងនៅតែអនុញ្ញាតឱ្យបើកដំណើរការសារមន្ទីរដដែល បើទោះជាកម្ពុជារឃើញករណីឆ្លងជំងឺកូវីដ១៩ជាថ្មីក៏ដោយ។
ការប្រកាសព័ត៌មានបើកឱ្យភ្ញៀវទេសចរចូលទស្សនាសារមន្ទីរទូទាំងប្រទេសឡើងវិញ ធ្វើឡើងស្របពេលដែលក្រសួងសុខាភិបាលរកឃើញករណីឆ្លងជំងឺកូវីដ១៩ ថ្មី លើមនុស្សចំនួន ២ នាក់ទៀតនៅថ្ងៃទី២១និង២២ខែឧសភា ។
គិតមកត្រឹមថ្ងៃទី២៣ខែឧសភាឆ្នាំ២០២០នេះ កម្ពុជារកឃើញអ្នកឆ្លងជំងឺកូវីដ១៩ សរុប ១២៤នាក់ ។ ក្នុងចំណោមអ្នកដែលមានកូវីដ១៩ ១២៤ នាក់ ក្រសួងព្យាបាលជាចំនួន១២២នាក់ និងនៅសល់២នាក់ កំពុងសម្រាកព្យាបាល។
