ក្រសួងសេដ្ឋកិច្ច និងហិរញ្ញវត្ថុ អំពាវនាវឱ្យម្ចាស់មធ្យោបាយដឹកជញ្ជូន និងយានជំនិះគ្រប់ប្រភេទបង់ពន្ធឱ្យបានទាន់ពេលចាប់ពីខែមិថុនាដល់ខែវិច្ឆិកាឆ្នាំនេះ ហើយនឹងចាប់ផ្តើមផាកពិន័យបើខកខានបង់ពន្ធ ចាប់ពីដើមឆ្នាំ២០២១។
សេចក្ដីជូនដំណឹងរបស់អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ ចុះថ្ងៃទី២៥ ខែឧសភា បានបញ្ជាក់ថា ការបង់ពន្ធសម្រាប់ឆ្នាំ២០២០ នឹងត្រូវអនុវត្តនៅថ្ងៃទី០១ ខែមិថុនា ដល់ថ្ងៃទី៣០ ខែវិច្ឆិកាខាងមុខនេះ។
សេចក្ដីជូនដំណឹងបានបញ្ជាក់ថា ម្ចាស់យានយន្តគ្រប់ប្រភេទត្រូវដាក់លិខិតប្រកាស និងបង់ពន្ធ នៅសាខាពន្ធដារខេត្ត-ខណ្ឌ ឬនៅធនាគារកាណាឌីយ៉ា ធនាគារអេស៊ីលីដា ធនាគារវឌ្ឍនៈ ឬនៅធនាគារកម្ពុជាសាធារណៈ ឬនៅតាមធនាគារណាដែលបានចុះអនុស្សរណៈនៃការយោគយល់គ្នាជាមួយក្រសួងសេដ្ឋកិច្ច និងហរិញវត្ថុ។
សម្រាប់ការផាកពិន័យចំពោះម្ចាស់យានយន្តណាដែលមិនទាន់បានប្រកាសបង់ពន្ធ នឹងត្រូវធ្វើឡើងនៅថ្ងៃទី០១ ខែមករា ឆ្នាំ២០២១ តាមច្បាប់ស្ដីពីសារពើពន្ធជាធរមាន៕