លោកនាយករដ្ឋមន្ត្រី ហ៊ុន សែន បានបង្ហោះសារនៅលើទំព័រហ្វេសប៊ុកផ្លូវការរបស់លោកថា ក្រដាសប្រាក់ដុល្លារអាមេរិកប្រភេទ $1, $2 និង $5 នៅតែចាយបានធម្មតាក្នុងប្រទេសកម្ពុជា គ្មានកាត់ទឹក(ភាគរយ)។
លោកថា៖ «ខ្ញុំសូមបញ្ជាក់ជូនបងប្អូនប្រជាពលរដ្ឋនៅទូទាំងប្រទេសឱ្យបានជ្រាបបន្ថែមលើការប្រកាសរបស់ធនាគារជាតិនៃកម្ពុជា នៅរសៀលថ្ងៃទី២៨ ខែឧសភា ឆ្នាំ២០២០ ម្សិលមិញនេះ គឺបានបញ្ជាក់ច្បាស់ហើយថា ក្រដាសប្រាក់ដុល្លារអាមេរិកប្រភេទ $1, $2, និង $5 គឺនៅតែចាយបានធម្មតានៅលើទីផ្សារទូទាំងប្រទេស គឺមិនមានការហាមប្រាមមិនឱ្យចាយដូចពាក្យចចាមអារ៉ាមនោះទេ»។
លោកនាយករដ្ឋមន្ត្រីបញ្ជាក់ថា ក្នុងករណីប្រសិនបើមានការបញ្ឈប់ឱ្យចរាចរចាយលុយក្រដាសប្រាក់អាមេរិកប្រភេទនេះ លុះណាតែមានសេចក្តីប្រកាសជាផ្លូវការពីធនាគារជាតិនៃកម្ពុជា។
លោកបញ្ជាក់ដែរថា ការចាយប្រាក់ដុល្លារអាមេរិកប្រភេទទាំងនេះ ($1,$2,$5) ដោយសេរី ដោយគ្មានការកាត់ទឹក ឬកាត់ផុកអ្វីទាំងអស់។
កាលពីថ្ងៃព្រហស្បតិ៍ម្សិលមិញ ធនាគារជាតិនៃកម្ពុជា បានប្រកាសទុកពេល ៣ខែ ឱ្យគ្រឹះស្ថានធនាគារ និងមីក្រូហិរញ្ញវត្ថុប្រមូលក្រដាសប្រាក់ដុល្លារប្រភេទ ១ដុល្លារ ២ដុល្លារ និង៥ដុល្លារ ដើម្បីប្រមូលដឹកទៅក្រៅប្រទេស ដោយអះអាងថា ក្រដាសប្រាក់ដុល្លារខ្នាតតូចរបស់សហរដ្ឋអាមេរិកនេះ ជាឧបសគ្គដល់ការជំរុញការចាយប្រាក់រៀលខ្មែរនៅលើទីផ្សារ។
ប៉ុន្តែ ក្រោយធនាគារជាតិប្រកាសបែបនេះមួយថ្ងៃ ពលរដ្ឋអះអាងថា ក្រដាសប្រាក់ដុល្លារខ្នាតតូចរបស់សហរដ្ឋអាមេរិកប្រភេទខាងលើនេះ មិនត្រូវបានគេទូទាត់នៅលើទីផ្សារទេ កន្លែងខ្លះទៀតទទួលយក តែកាត់ភាគរយ៕
