រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងថា បញ្ហាបំណុលត្រូវបានអ្នកនយោបាយមួយក្រុមទម្លាក់កំហុសដាក់រដ្ឋាភិបាល បង្កជាការគំរាមកំហែងដល់ស្ថិរភាពនយោបាយ។
លោក ស ខេង ថ្លែងក្នុងពិធីប្រកាសចូលកាន់តំណែងភិបាលខេត្តកែបនៅថ្ងៃសុក្រនេះថា កម្ពុជាមានសន្តិភាពយ៉ាងរឹងមាំ និងស្ថិរភាពនយោបាយយ៉ាងល្អប្រសើរដែរ។
ប៉ុន្តែ មេដឹកនាំរូបនេះថា នៅពេលដែលកម្ពុជាមានការរាតត្បាតដោយជំងឺកូវីដ១៩ ត្រូវបានក្រុមអ្នកនយោបាយដែលលោកហៅថា អ្នកប្រជានិយម បានយកបញ្ហាដែលពលរដ្ឋអត់ការងារធ្វើ និងបញ្ហាបំណុលជាដើម វាយប្រហារ និងទម្លាក់កំហុសទៅលើរដ្ឋាភិបាល។ លោកជំរុញឱ្យមន្ត្រីមូលដ្ឋានខិតខំពន្យល់បញ្ហានេះឱ្យពលរដ្ឋបានយល់ ដើម្បីកុំឱ្យប៉ះពាល់ដល់ស្ថិរភាពនយោបាយ។
លោក ស ខេង៖ «បំភ្លឺសាធារណមតិ ពិសេសប្រជាពលរដ្ឋ ដើម្បីឱ្យលោកយល់អំពីបញ្ហានេះពីព្រោះបើមិនដូច្នោះទេ ធ្វើឱ្យមានការយល់ច្រឡំ ហើយប៉ះពាល់ដល់ស្ថិរភាពនយោបាយ»។
លោក ស ខេង ក៏បានបញ្ជាក់ជំហរនៅក្នុងពិធីនោះដែរថា ការជំពាក់បំណុលគឺត្រូវតែសង ប៉ុន្តែក្នុងស្ថានភាពនេះ អាចមានការសម្របសម្រួល ដើម្បីផ្អាក ឬពន្យារពេលនៃការសងបាន។
អតីតមេដឹកនាំគណបក្សប្រឆាំងដែលកំពុងនិរទេសខ្លួនក្រៅប្រទេស លោក សម រង្ស៊ី បានថ្លែងតាមរយៈសារលើហ្វេសប៊ុករបស់លោក នៅថ្ងៃទី១៥ ខែឧសភា ថា ពលរដ្ឋរាប់លាននាក់ដែលជាប់បំណុល ពួកគេរកតែបាយហូបមិនបានផង គ្មានលទ្ធភាពឯណាសងបំណុលទៅគ្រឹះស្ថានធនាគារ និងមីក្រូហិរញ្ញវត្ថុជាម្ចាស់បំណុលនោះទេ ។
លោកថា៖ «អ្នកដែលជំពាក់បំណុលធនាគារ មីក្រូហិរញ្ញវត្ថុ យើងត្រូវតែស្រុះគ្នា យើងធ្វើចលនា យើងប្រាប់ធនាគារ មីក្រូហិរញ្ញវត្ថុ អង្គការទាំងអស់ហ្នឹងថា ឥលូវនេះយើងអត់បង់»។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី បង្ហាញការយល់ឃើញថា បញ្ហាបំណុលវានឹងបង្កជាវិបត្តិសង្គម បើរដ្ឋាភិបាលមិនពង្រឹងប្រសិទ្ធភាពដោះស្រាយទេនោះ ដោយថា កូវីដ១៩ វាបានគំរាមកំហែងទាំងអាយុជីវិត និងសេដ្ឋកិច្ចពលរដ្ឋ និងសង្គមទាំងមូល។
លោកថា៖ «កាលណាបញ្ហានេះវាអូសបន្លាយយូរទៅ ស្ថាប័នប្រាក់កម្ចីគ្នាក៏អត់លុយសម្រាប់ទប់ ចិញ្ចឹមបុគ្គលិកដែរ ជួនកាលវាអាចដួលទាំងអស់គ្នា បើគ្មានវិធានច្បាស់លាស់ដើម្បីជួយសង្គ្រោះរឿងហ្នឹង»។
ក្រុមអង្គការសមាគម ១៣៥ស្ថានប័ន កាលពីថ្ងៃទី២៧ ខែមេសាឆ្នាំនេះ បានចេញសេចក្តីថ្លែងការណ៍រួមមួយបង្ហាញថា ពលរដ្ឋជាង ២លាន ៦សែននាក់ បានជាប់បំណុលគ្រឹះស្ថានធនាគារ និងមីក្រូហិរញ្ញវត្ថុ ដែលថា ជាមធ្យមម្នាក់ជំពាក់ជិត ៤ពាន់ដុល្លារ (៣៨០០)។
សង្គមស៊ីវិលទាំងនោះ បង្ហាញការព្រួយបារម្ភដែរថា វិបត្តិកូវីដ១៩ នឹងធ្វើឱ្យអ្នកជាប់បំណុលប្រឈមនឹងហានិភ័យសុខភាព លំនៅដ្ឋាន ដីធ្លីរបស់ពួកគេ ដែលបានដាក់ជាទ្រព្យបញ្ចាំ បើរដ្ឋាភិបាលគ្មានលទ្ធភាពជំរុញទៅស្ថាប័នពាក់ព័ន្ធឱ្យពន្យារពេលសងទាំងការប្រាក់ ទាំងដើម យ៉ាងតិច ៣ខែ និងប្រគល់ឱ្យទ្រព្យបញ្ចាំមកកូនបំណុលវិញនោះ៕
