រដ្ឋមន្ត្រីក្រសួងមហាផ្ទៃ លោក ស ខេង អះអាងថា ការរឹតបន្តឹងច្បាប់ចរាចរណ៍ផ្លូវគោកដោយបង្កើនការផាកពិន័យនោះ ធ្វើឡើងដើម្បីប្រយោជន៍ពលរដ្ឋ មិនមែនជាការដាក់បន្ទុកបន្ថែមក្នុងពេលកំពុងបាត់បង់ចំណូលដោយសារតែមេរោគកូវីដ១៩នោះទេ។
លោក ស ខេង ក្នុងពិធីប្រកាសចូលកាន់តំណែងអភិបាលខេត្តកែបនៅថ្ងៃសុក្រនេះ បានថ្លែងថា បញ្ហាទាំងពីរនេះ វាមិនជាប់ពាក់ព័ន្ធគ្នាទេ។
លោកថា៖ «ប្រជាពលរដ្ឋកំពុងតែប្រុងប្រយ័ត្នការពារជំងឺកូវីដ១៩ ឬក៏អ្នកខ្លះអត់ការងារដោយសារតែរោងចក្រគេបិទ វាមានអីមកទាក់ទងជាមួយអ្នកធ្វើដំណើរ វាអត់ទាក់ទងគ្នាទេ។យើងសុំថា ឱ្យគាត់គោរពច្បាប់ ដើម្បីជីវិតគាត់តើ!»។
កន្លងទៅ អ្នកឃ្លាំមើលមួយចំនួន បានបង្ហាញការយល់ឃើញថា ការរឹតបន្តឹងច្បាប់ចរាចរណ៍ដែលចាប់អនុវត្តចាប់ពីថ្ងៃទី១ ខែឧសភាមកនោះ ជាការដាក់បន្ទុកបន្ថែមដល់ប្រជាពលរដ្ឋដែលកំពុងរងផលប៉ះពាល់ពីកូវីដ១៩។
ការសម្រេចរបស់រដ្ឋាភិបាលក្នុងការផាកពិន័យក្នុងច្បាប់ចរាចរណ៍ផ្លូវគោក គឺបង្កើនទំហំផាកពិន័យពី ៣ ទៅ ៥ដងនៃចំនួនផាកពិន័យចាស់។
យ៉ាងណា លោក ស ខេង អះអាងថា គ្រោះថ្នាក់ចរាចរណ៍បានថយចុះរយៈពេលជិត ១ខែមកនេះ បើធៀបទៅនឹងរយៈពេលដូចគ្នាកាលពីឆ្នាំមុន៕