វិធានការបន្ធូរបន្ថយការយកពន្ធលើប្រាក់ចំណូល និងផ្តល់កម្ចីការប្រាក់ទាបដល់អាជីវកម្មខ្នាតតូច និងមធ្យម ឬហៅកាត់ថា SME របស់រដ្ឋាភិបាលថៃ ត្រូវបានរំពឹងថា នឹងសង្គ្រោះការងារពលរដ្ឋជាង ៨លានកន្លែងមិនឱ្យបាត់បង់ នៅចំពោះមុខវិបត្តិកូវីដ១៩ ដែលកំពុងបន្តអូសបន្លាយ។
តាមការសិក្សារបស់ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃ ការងារ ៨លាន ៤សែនកន្លែង ក្នុងចំណោម ១៤លាន ៤សែនកន្លែង កំពុងប្រឈមនឹងការបាត់បង់នៅត្រីមាសទី២ និងទី៣ ដោយសារវិធានការបិទខ្ទប់ប្រទេស ដើម្បីបង្ការ និងទប់ស្កាត់ជំងឺកូវីដ១៩របស់អាជ្ញាធរ។
កាសែតរដ្ឋចិន Xinhuanet ចុះផ្សាយនៅថ្ងៃមិ្សលមិញថា ការងារដែលរងហានិភ័យពីការបាត់បង់ទាំងនោះ រួមមាន ក្នុងវិស័យទេសចរណ៍ ២លាន ៥សែន វិស័យឧស្សាហកម្ម ១លាន ៥សែន និងវិស័យសេវាកម្ម ៤លាន ៤សែន ខណៈមានការងារ ៣៧ម៉ឺនកន្លែងហើយបានបាត់បង់ក្នុងរយៈពេលថ្មីៗនេះ។
តាមប្រភពពីកាសែត ThaiPBSWorld អគ្គលេខាធិការក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃ លោក Thosaporn Sirisamphand ថ្លែងថា ការងារជាង ៨លានកន្លែងនោះនឹងរក្សាបាន ក្រោមកញ្ចប់មូលនិធិរដ្ឋចំនួន ៤រយពាន់លានបាត ឬស្មើជាង ១២ពាន់លានដុល្លារ ដែលបានទម្លាក់កាលពីខែមីនា ដើម្បីកាត់បន្ថយផលប៉ះពាល់សេដ្ឋកិច្ច និងជួយដល់វិស័យ SME។
កញ្ចប់ថវិកាសង្គ្រោះនេះត្រូវបានប្រគល់ឱ្យធនាគារកណ្តាលថៃ ដើម្បីឱ្យស្ថាប័នជាតិមួយនេះ អាចជួយគ្រឹះស្ថានហិរញ្ញវត្ថុក្នុងស្រុកទម្លាក់អត្រាការប្រាក់កម្ចី ពន្យារពេលសងត្រឡប់ និងផ្តល់កម្ចីការប្រាក់ទាបដល់ក្រុមហ៊ុន និងម្ចាស់អាជីវកម្មក្នុងវិស័យ SME និងកាត់បន្ថយពន្ធលើប្រាក់ខែបុគ្គលិកធ្វើការក្នុងវិស័យនេះ។
ប្រភពពីនាយកដ្ឋានពន្ធដារថៃ អត្រាការប្រាក់កម្ចីសម្រាប់វិស័យនេះ ត្រូវបានបញ្ចុះ ១ដងកន្លះ គិតធៀបទៅនឹងពន្ធលើប្រាក់ចំណូលរបស់ក្រុមហ៊ុនក្នុងរយៈពេល ១២ខែចុងក្រោយ (មុនដំណាច់ឆ្នាំ២០១៩) ហើយពន្ធលើប្រាក់ខែបុគ្គលិកត្រូវបានបន្ធូរ ៣ដង។
តាមប្រភពដដែល វិធានការទាំងនេះត្រូវបានភ្ជាប់ជាមួយលក្ខខណ្ឌមួយចំនួន ក្នុងនោះមានលក្ខខណ្ឌមួយគឺ តម្រូវឱ្យម្ចាស់ក្រុមហ៊ុន និងអាជីវកម្មទាំងអស់ត្រូវតែរក្សាបុគ្គលិករបស់ខ្លួនក្នុងចំនួនមិនឱ្យទាបជាងចំនួនបុគ្គលិកដែលបានចុះបញ្ជីក្នុងប្រព័ន្ធរបបសន្តិសុខសង្គម។
ការបន្ធូរបន្ថយនេះដែរ គិតចាប់ពីខែមេសាដល់ដំណាច់ឆ្នាំ២០២០ សម្រាប់កម្ចី SME ហើយសម្រាប់បុគ្គលិក គិតចាប់ពីខែមេសា ដល់ខែកក្កដា ហើយក្រុមហ៊ុន និងអាជីវកម្មនីមួយៗត្រូវមានបុគ្គលិកមិនលើសពី ២រយនាក់ និងចំណូលប្រចាំឆ្នាំក្រោម ៥រយលានបាត។
តាមរបាយការណ៍ស្ថិតិពីធនាគារកណ្តាលថៃ ប្រភេទអាជីវកម្មក្នុងវិស័យ SME ដែលមានបុគ្គលិកក្រោម ២រយនាក់ និងទ្រព្យសម្បតិ្តក្រោម ២លានបាតនេះ គឺមានប្រមាណ ៣លានមុខ និងផ្តល់ការងារជូនពលរដ្ឋថៃជាង ១០លានកន្លែង គិតត្រឹមឆ្នាំ២០១៨ ហើយបានចូលរួមចំណែក ៣៦ភាគរយនៃទំហំផលិតផលក្នុងស្រុកសរុប GDP។
នាយករងធនាគារជាតិថៃ លោក Ronadol Numnonda បានឱ្យដឹងនៅថ្ងៃពុធថា មានម្ចាស់SME ដែលរងផលប៉ះពាលពីជំងឺកូវីដ១៩ ប្រមាណ ៣ម៉ឺន ៥ពាន់នាក់ ហើយបានដាក់ពាក្យស្នើកម្ចីការប្រាក់ទាប ១ភាគរយក្នុង១ឆ្នាំ ពីធនាគារ ដែលមានទឹកប្រាក់សរុបចំនួន ៥៨ពាន់លានបាត។
ថៃគឺជាប្រទេសអាស៊ានដែលបានបញ្ចេញកញ្ចប់ថវិកាសង្គ្រោះច្រើនជាងគេលំដាប់ទី២ក្នុងតំបន់ ដែលស្មើប្រមាណ ៨៤ពាន់លានដុល្លារ ដើម្បីជួយដោះស្រាយបញ្ហាសេដ្ឋកិច្ច និងសង្គម ដែលរងការប៉ះទង្គិចពីមេរោគដែលមានប្រភពឆ្លងរាតត្បាតដំបូងបង្អស់ចេញមកពីក្រុងវូហាន ខេត្តហឺប៉ី ប្រទេសចិន។
អាជ្ញាធរប្រទេសនេះ បានសម្រេចបន្តវិធានការបិទប្រទេស ១ខែទៀត រហូតដល់ដំណាច់ខែមិថុនា ខណៈស្ថានភាពរាតត្បាតរបស់មេរោគនៅជុំវិញពិភពលោក ពុំទាន់ថមថយ ជាមួយករណីស្លាប់កើនដល់ជាង ៣៦ម៉ឺនករណី ក្នុងចំណោមករណីឆ្លងសរុបជិត ៦លានករណី។
យ៉ាងណា អាជីវកម្ម សេវាកម្ម និងសកម្មភាពជាច្រើន ដែលប្រឈមការចម្លងទាប ត្រូវបានអនុញ្ញាតឱ្យបើកឡើងវិញជាបណ្តើរៗ ខណៈករណីឆ្លងក្នុងសហគមន៍បានធ្លាក់ចុះដល់សូន្យករណីចាប់ពីដើមខែឧសភា ដោយមិនរាប់ករណីនាំចូលដែលរកឃើញលើអ្នកដំណើរមកពីក្រៅប្រទេសដែលត្រូវបានបង្ខាំងទុកដោយឡែក ១៤ថ្ងៃ៕