លោកនាយករដ្ឋមន្ត្រី ហ៊ុន សែន ក្នុងទិវាសិទ្ធិកុមារអន្តរជាតិ១មិថុនានេះ បានចេញសារ ៦ចំណុច ក្រើនរំឭកមន្ត្រីក្រោមឱវាទ ឱ្យរកលទ្ធភាពជួយកុមារក្រីក្រ និងពិការភាព ឱ្យពួកគេទទួលបានសេវាសុខភាព និងអប់រំ ដូចកុមារដទៃទៀត អំឡុងពេលប្រទេសជួបជំងឺកូវីដ១៩។
កម្ពុជាបានរកឃើញអ្នកឆ្លងជំងឺរលាកផ្លូវដង្ហើមថ្មីកូវីដ១៩ ចំនួន ១២៥នាក់ចាប់ពីខែមករាមក។ បញ្ហានេះ រដ្ឋាភិបាលប្រកាសបិទកម្មវិធីបុណ្យជាតិ ដូចជាបុណ្យចូលឆ្នាំថ្មីប្រពៃណីជាតិ និងវិស័យអប់រំជាដើម ដើម្បីទប់ស្កាត់ការឆ្លងរាលដាលនៃកូវីដ១៩។
តាមសារលិខិតបង្ហោះលើហ្វេសប៊ុកនៅថ្ងៃនេះ លោកនាយករដ្ឋមន្ត្រី បានក្រើនរំឭកមន្ត្រីពាក់ព័ន្ធ ត្រូវបន្តអនុវត្តសេចក្តីណែនាំរបស់ក្រសួងសុខាភិបាលឱ្យបានម៉ឺងម៉ាត់ ទប់ស្កាត់ការឆ្លងកូវីដ១៩។
លិខិតបន្តថា ក្រសួង និងស្ថាប័នពាក់ព័ន្ធត្រូវរកលទ្ធភាពជួយកុមារគ្រប់រូប ពិសេសកុមារមានពិការភាព កុមាររស់នៅក្នុងគ្រួសារក្រីក្រ ឱ្យពួកគេទទួលបានសេវាថែទំាំសុខភាព និងអប់រំស្មើៗគ្នា អំឡុងប្រទេសរងការរាតត្បាតជំងឺកូវីដ១៩។
លោក ហ៊ុន សែន រៀបរាប់ក្នុងលិខិតថា៖ «ក្រសួង និងស្ថាប័នពាក់ព័ន្ធត្រូវខិតខំប្រែងប្រែងរកលទ្ធភាពក្នុងការធ្វើយ៉ាងណាឱ្យកុមារគ្រប់រូបនៅគ្រប់កន្លែង ជាពិសេសកុមាររស់នៅក្នុងគ្រួសារក្រីក្រ ទទួលបានសេវាអប់រំ អនាម័យ និងទឹកស្អាតស្មើៗគ្នានៅក្នុងអំឡុងពេលមានការរាតត្បាតនៃជំងឺកូវីដ១៩»។
មេដឹកនាំរូបនេះ ក៏បានក្រើនរំឭកផងដែរ ឱ្យចាត់វិធានការការពារកុមារពីអំពើហិង្សាគ្រប់រូបភាព និងអប់រំកុមារពីរបៀបការពារខ្លួនប្រឆាំងនឹងការរំលោភបំពាន ការបៀតបៀនផ្លូវភេទ និងធ្វើឱ្យកុមារយល់ដឹង និងចេះរាយការណ៍ទៅអាជ្ញាធរ និងមនុស្សពេញវ័យ អំពីអំពើរំលោភបំពានតាមគ្រប់រូបភាព ដើម្បីបន្តចូលរួមលើកស្ទួយវិស័យសុខុមាលភាពកុមារឱ្យកាន់តែល្អប្រសើរ។
បច្ចុប្បន្ន ក្រសួងអប់រំនៅមិនទាន់ប្រកាសឱ្យសាលារៀននៅទូទាំងប្រទេសបើកដំណើរការឡើងវិញនៅឡើយទេ ក្រោយពីកម្ពុជាផ្ទុះជំងឺកូវីដ១៩ ប៉ុន្តែ ក្រសួងបានជំនួសមកវិញនូវការបង្រៀនគ្រប់កម្រិតតាមអនឡាញ។
អ្នកនាំពាក្យក្រសួងអប់រំ យុវជន និងកីឡា លោក រស់ សុវិចា ប្រាប់ VOD តាមបណ្តាញសង្គមតេឡេក្រាមថា ក្រសួងនឹងបន្តពង្រឹងប្រសិទ្ធភាពអប់រំពីចម្ងាយតាមប្រព័ន្ធអនឡាញនេះ តបតាមការណែនាំរបស់ក្រសួងសុខាភិបាល ជាអ្វីដែលលោកហៅថា ដើម្បីបង្កើនសមត្ថភាពសិស្សានុសិស្សផង និងទប់ស្កាត់ការឆ្លងរាលដាលនៃកូវីដ១៩ផង។
លោក រស់ សុវិចា ប្រាប់ថា៖ «គ្រួសារដែលមិនទាន់មានទូរទស្សន៍ អាចរៀនតាមទូរទស្សន៍ជាមួយអ្នកជិតខាង មិនឱ្យលើស ១០នាក់ ដោយត្រូវរក្សាគម្លាតសុវត្ថិភាព និងអនុវត្តគោលការណ៍វេជ្ជសាស្ត្រតាមការណែនាំរបស់ក្រសួងសុខាភិបាល»។
ប្រធានមជ្ឈមណ្ឌលទស្សនវិទ្យាអនុវត្តន៍ និងសង្គម លោកបណ្ឌិត ប៉ា ច័ន្ទរឿន និយាយថា សិទ្ធិទទួលបានការអប់រំ និងការព្យាបាលជាសិទ្ធិមូលដ្ឋានរបស់កុមារ ហើយថា បញ្ហាកូវីដ១៩ ធ្វើឱ្យកុមារប្រឈមកង្វះអាហារូបត្ថម្ភ ដោយសារឪពុកម្តាយបាត់បង់ចំណូល។
អ្នកឃ្លាំមើលរូបនេះ ហៅការជួយកុមារក្រីក្រនៅតាមជនបទ អំឡុងកម្ពុជារងផលប៉ះពាល់កូវីដ១៩នេះ នឹងមិនអាចទៅរួចទេ បើរដ្ឋាភិបាលគ្មានកញ្ចប់ថវិកាដោះស្រាយទំហំនៃផលប៉ះពាល់ជីវភាពឱពុកម្តាយពួកគេទេនោះ។
លោក ប៉ា ច័ន្ទរឿន ប្រាប់ថា៖ «កុមារនៅជនបទភាគច្រើនមិនបានទទួលសេវាសិក្សាទេ ដោយសារតែទី១ ទាំងសិស្សានុសិស្ស និងឱពុកម្តាយគ្មានលទ្ធភាពទិញឧបករណ៍អេឡិចត្រូនិច ដូចជា ទូរសព្ទដៃវ័យឆ្លាត អាយផេដ ឬក៏ឡេបថបអីហ្នឹងឱ្យក្មេងប្រើប្រាស់បាន និងចំណុចមួយទៀត ទោះបីមានឧបករណ៍វ័យឆ្លាតហ្នឹងក៏ដោយ ប៉ុន្តែ អ៊ីនធឺណិតនៅស្រុកស្រែ វាយឺត ហើយតម្លៃវាថ្លៃទៀត»។
លោក ប៉ា ច័ន្ទរឿន ផ្តល់ជាយោបល់ថា ប្រសិទ្ធភាពមួយក្នុងចំណោមបញ្ហាជាច្រើន ខណៈក្រសួងមិនទាន់អាចបើកសាលានៅឡើយនោះ រដ្ឋគួរបង្វែរថវិកាសម្រាប់សាលា មកបង្កើត WiFi នៅតាមឃុំ ឬភូមិ ដើម្បីឱ្យកុមារក្រីក្រមានឱកាសប្រើប្រាស់អ៊ីនធឺណិតដោយឥតគិតថ្លៃ អំឡុងក្រសួងបន្តបង្រៀនតាមអនឡាញនេះ។
របាយការណ៍ស្រាវជ្រាវមួយរបស់មូលនិធិហិរញ្ញប្បទានសកល (GFF) ដែលជាស្ថាប័នផ្តោតលើសុខភាព បានព្យាករថា ឥទ្ធិពលនៃជំងឺកូវីដ១៩ វានឹងធ្វើឱ្យអត្រាមរណភាពរបស់កុមារ និងមាតាកម្ពុជា កើនឡើងនៅឆ្នាំ២០២១ខាងមុខ។
របាយការណ៍ចេញផ្សាយកាលពីខែឧសភាឆ្នាំនេះ អះអាងទៀតថា អត្រាស្លាប់របស់កុមារកម្ពុជានឹងកើន ៣៥ភាគរយ ចំណែកមរណភាពរបស់មាតាវិញ នឹងកើនឡើង ៥០ភាគរយ។
របាយការណ៍បញ្ជាក់ថា កំណើននៃអត្រាមរណៈនេះ ដោយសារតែខ្វះបច្ចេកទេស និងថ្នាំមួយចំនួន ខណៈពិភពលោកមិនទាន់រកឃើញវ៉ាក់សាំងការពារពីមេរោគឆ្លងកូវីដ១៩នៅឡើយ៕