ក្រសួងទេសចរណ៍ព្រមានចាត់វិធានការលើម្ចាស់អាជីវកម្មខារ៉ាអូខេ រង្គសាល ឌីស្កូតែក និងបៀរហ្កាឌិន ដែលនៅបន្តបើកអាជីវកម្មរបស់ខ្លួន ល្មើសនឹងវិធានការរបស់ប្រមុខរដ្ឋាភិបាល ក្នុងការបង្ការទប់ស្កាត់ការរីករាលដាលនៃជំងឺកូវីដ១៩។
ក្នុងសេចក្ដីជូនដំណឹងចុះថ្ងៃទី៣ ខែមិថុនា ឆ្នាំ២០២០ ក្រសួងទេសចរណ៍ ឱ្យដឹងថា បច្ចុប្បន្ន ហាងខារ៉ាអូខេ KTV ក្លឹបកម្សាន្ត រង្គសាល ឌីស្កូតែក និងបៀរហ្កាឌិន នៅតាមរាជធានី-ខេត្តមួយចំនួន នៅតែបន្តសកម្មភាពអាជីវកម្មរបស់ខ្លួន ល្មើសនឹងវិធានការរបស់រាជរដ្ឋាភិបាល ក្នុងការទប់ស្កាត់ការឆ្លងរីករាលដាលនៃជំងឺកូវីដ១៩។
ក្រសួងព្រមានចាត់វិធានការចំពោះម្ចាស់អាជីវកម្មដែលនៅតែបន្តបើកខារ៉ាអូខេ រង្គសាល ឌីស្កូតែក និងបៀរហ្កាឌិន ផ្ទុយនឹងវិធានការរបស់ប្រមុខរដ្ឋាភិបាល។
កាលពីថ្ងៃទី១៧ ខែមីនា ឆ្នាំ២០២០ រដ្ឋាភិបាលកម្ពុជា បានប្រកាសឱ្យបិទ KTV និងរោងភាពយន្តនៅទូទាំងប្រទេស ដោយថា ដើម្បីទប់ស្កាត់នៃការរីករាលដាលជំងឺកូវីដ១៩ បន្ទាប់ពីជំងឺនេះកំពុងរីករាលដាលជាសកល។
កម្ពុជាបានរកឃើញមនុស្ស ១២៥នាក់ហើយដែលឆ្លងវីរុសកូរ៉ូណាចាប់តាំងពីចុងខែមករា ប៉ុន្តែ អ្នកជំងឺ ១២៣នាក់ហើយត្រូវបានព្យាបាលជាសះស្បើយ និងត្រូវបានអនុញ្ញាតឱ្យចាកចេញពីមន្ទីរពេទ្យ ខណៈនៅសល់ ២នាក់ កំពុងស្ថិតក្រោមការព្យាបាលនៅឡើយ៕
