អ្នកភូមិស្រែប្រាំង ឃុំត្រពាំងព្រីង ស្រុកតំបែរ ខេត្តត្បូងឃ្មុំ បានអះអាងថាក្រុមហ៊ុនចិនមួយបានឈូសឆាយផ្ដាច់ផ្លូវចូលទៅដីស្រែចម្ការរបស់ពួកគាត់ ខណៈវិវាទដីធ្លីនៅតំបន់នោះពុំទាន់ដោះស្រាយដាច់ស្រេចនៅឡើយ។
តំណាងសហគមន៍នៅក្នុងឃុំត្រពាំងព្រីង លោក ថា លីដា បានប្រាប់ VOD ថាក្រុមហ៊ុនចម្ការកៅស៊ូ ហាម៉ឹនី វីន អ៊ិនវេសមេន បានទៅឈូសឆាយផ្តាច់ស្រែរបស់អ្នកភូមិនៅម៉ោងប្រមាណ៣ទៀបភ្លឺ ថ្ងៃទី៤ ខែមិថុនា។ លោកបន្តថា លុះព្រលឹមឡើងប្រជាសហគមន៍ទៅមើលស្រែចម្ការរបស់គាត់ ផ្លូវដែលត្រូវទៅនោះបានកាត់ផ្ដាច់ទៅហើយ រួចពួកគាត់ក៏នាំគ្នាតវ៉ានិងបញ្ឈប់ការឈួសឆាយនោះ។
លោក លីដា ប្រាប់ថា៖«ក្រុមហ៊ុនហ្នឹងបានមកកាយផ្លូវផ្ដាច់បំផ្លាញខ្ទមអស់មួយ។ ខាងពួកខ្ញុំក៏បានរាយការទៅអាជ្ញាធរឃុំនិងស្រុកដែរ តែគាត់ថា លុះត្រាតែខាងយើងហ្នឹងសន្យាជាមួយគេ ដកដំឡូងហើយឈប់តវ៉ា បានគេមកសម្របសម្រួលលើកផ្លូវមកលុបឲ្យយើងវិញ»។
ទោះជាយ៉ាងណា តំណាងសហគមន៍រូបនេះបញ្ជាក់ថា អ្នកភូមិនៅបន្តធ្វើស្រែចម្ការលើដីសហគមន៍នោះដដែល បើទោះបីជាមានការឈូសឆាយកាត់ផ្តាច់ផ្លូវបែបនេះក្តី។
VOD មិនអាចទាក់ទងភាគីក្រុមហ៊ុនចម្ការកៅស៊ូ ហាម៉ឹនី វីន អ៊ិនវេសមេន ដើម្បីសុំព័ត៌មានពីករណីនេះបាននៅឡើយទេ។
អភិបាលរងស្រុកតំបែរ លោក រ៉េត បូរ៉ាន់ ឲ្យដឹងថា វិវាទនេះគឺដល់ថ្នាក់ក្រសួងទៅហើយ រដ្ឋបាលស្រុកបានត្រឹមត្រៀមកម្លាំង ដើម្បីអន្តរាគមន៍សម្របសម្រួលក្នុងនាមជាអាជ្ញាធរមូលដ្ឋានឲ្យភាគីទាំងពីរបានស្រុះស្រួលគ្នាប៉ុណ្ណោះ។
លោក រ៉េត បូរ៉ាន់ មានប្រសាសន៍ថា៖«ខាងខ្ញុំបានសុំខាងក្រុមហ៊ុនទៀតថា អត់អីទេដោយសារតែគាត់បានដាំដុះហើយ យើងក៏មិនចង់ឲ្យមានការខាតបង់។ យើងបានទាក់ទងនៅក្រុមហ៊ុនអី គាត់ក៏បានអនុញ្ញាតឲ្យគាត់ដកប្រមូលផលដំឡូងរួចអស់ហើយក៏បានព្រមព្រៀងគ្នាដែរ។ ប៉ុន្តែខាងប្រជាពលរដ្ឋមួយរយៈចុងក្រោយនេះ គាត់មានទាំងធ្វើប៉ារ៉ាស់ ធ្វើខ្ទមអី សម្រាប់ដូចគេថាឆ្មាំការពារអីចឹង»។
ពាក់ព័ន្ធនឹងជំលោះដីធ្លីនេះដែរ សាលាដំបូងខេត្តត្បូងឃ្មុំ កាលពីថ្ងៃទី០៣ ខែមិថុនា ម្សិលមិញ បានសម្រេចផ្តន្ទាទោសតំណាងសហគមន៍ភូមិស្រែប្រាំង លោក សែម សាង ឱ្យជាប់ពន្ធនាគារ៧ឆ្នាំពីបទកំហែងយកដោយមានអាវុធ។ លោក សែម សាង ត្រូវបានសមត្ថកិច្ចស្ទាក់ចាប់នៅភូមិស្រែប្រាំងកាលពីថ្ងៃទី១៧ ខែតុលា ក្រោមបទចោទកំហែងដោយមានស្ថានទម្ងន់ទោស ដោយសារការប្រើប្រាស់អាវុធ ដែលបានប្រព្រឹត្តនៅភូមិស្រែប្រាំង ឃុំត្រពាំងព្រីង កាលពីថ្ងៃទី១៨ ខែកុម្ភៈ ឆ្នាំ២០១៦។
មេធាវីរបស់អង្គការលីកាដូ ដែលការពារក្តីឲ្យលោក សែម សាង លោកស្រី សាម សុគន្ធា បានឲ្យដឹងថា ក្នុងនាមជាមេធាវីការពារក្តីឲ្យលោក សែម សាង គឺមិនអាចទទួលយកសាលក្រមនេះឡើយ ព្រោះមានភាពអយុត្តិធម៌ពេកសម្រាប់កូនក្តីលោកស្រី។ លោកស្រីបន្តថា នៅក្នុងសវនាការដេញដោលគឺកូនក្តីរបស់លោកស្រីបានឆ្លើយយ៉ាងច្បាស់អំពីមូលហេតុ ដែលគាត់និងប្រជាសហគមន៍ដទៃទៀតបានដកហូតម៉ាស៊ីនកាត់ឈើពីដើមបណ្ដឹង គឺដើម្បីការពារព្រៃឈើពីការកាប់បំផ្លាញ។
លោកស្រី សាម សុគន្ធា និយាយថា៖«គាត់មានចរិកស្លូតត្រង់ គឺគាត់បានបង្ហាញការពិតក្នុងអង្គសវនាការ គឺគាត់បានបង្ហាញយ៉ាងច្បាស់អំពីមូលហេតុថា ហេតុអីគាត់និងប្រជាពលរដ្ឋផ្សេងទៀតទៅសុំដកត្រង់ស៊ីន័រ ( ម៉ាស៊ីនអាឈើ) ពីដើមបណ្ដឹងនៅថ្ងៃកើតហេតុនោះ ដោយសារតែគាត់ហើយនិងប្រជាពលរដ្ឋផ្សេងទៀតបានដឹងថាដីហ្នឹងគឺជាដីដែលកំពុងតែមានទំនាស់ជាមួយសហគម៍ ហើយជាដីដែលធ្លាប់អាស្រ័យផលទាំងអស់គ្នា»។
វិវាទដីធ្លីទំហំ៧៨៥ហិតតារវាងក្រុមហ៊ុនចម្ការកៅស៊ូ ហាម៉ឹនី វីន អ៊ិនវេសមេន និងប្រជាសហគមន៍ស្រែប្រាំង ឃុំត្រពាំងព្រីង ស្រុកតំបែរ បានកើតឡើងតាំងពីឆ្នាំ២០១២ ហើយមានការប៉ះទង្គិចគ្នាជាបន្តបន្ទាប់ផងដែររវាងភាគីក្រុមហ៊ុន និងអ្នកភូមិ៕
