អង្គការសិទ្ធិមនុស្សអន្តរជាតិ (HRW) អះអាងថា សកម្មជនបក្សប្រឆាំងថៃមួយរូបដែលបានភៀសខ្លួនមកកម្ពុជា ត្រូវបានជនមួយក្រុមចាប់ពង្រាត់នៅខុនដូមួយកន្លែងក្នុងក្រុងភ្នំពេញកាលពីថ្ងៃម្សិលមិញ ហើយអង្គការអន្តរជាតិមួយនេះ ទាមទារឱ្យអាជ្ញាធរបើកការស៊ើបអង្កេត។
HRW លើកឡើងក្នុងសេចក្តីប្រកាសនៅថ្ងៃនេះថា សកម្មជនគាំទ្រប្រជាធិបតេយ្យឈ្មោះ Wanchalearm Satsaksit ដែលកំពុងរស់នៅនិរទេសខ្លួននៅទីក្រុងភ្នំពេញ ត្រូវជនប្រដាប់អាវុធមួយក្រុមចាប់ពង្រាត់តាមរថយន្តពណ៌ខ្មៅមួយគ្រឿង នៅម៉ោងជិត ៦ល្ងាច ថ្ងៃទី៤ ខែមិថុនា ខណៈលោកដើរតាមផ្លូវទិញអាហារមុខអាគារខុនដូរបស់លោក។
ប្រភពដដែលលើកឡើងដោយយោងលើសាក្សីមួយចំនួន និងកាមេរ៉ាសុវត្ថិភាពនៅអាគារខុនដូ បន្ថែមថា សកម្មជនរូបនោះ កំពុងនិយាយទូរសព្ទជាមួយសហការីគេម្នាក់ មុនពេលលោកត្រូវបានចាប់ពង្រាត់។ លោកថា សហការីរូបនោះលឺរូបគេស្រែកថា «អ្ហាក! ខ្ញុំដកដង្ហើមមិនបានទេ» មុនពេលខ្សែទូរសព្ទដាច់។
នាយក HRW ប្រចាំតំបន់អាស៊ី លោក Brad Adams លើកឡើងក្នុងសេចក្តីប្រកាសថា អាជ្ញាធរកម្ពុជា គួរបើកការស៊ើបអង្កេតជាបន្ទាន់មួយទៅលើករណីនេះ ហើយត្រូវលាតត្រដាងការរកឃើញរបស់ខ្លួនជាសាធារណៈ។
លោក Adams បន្តថា រដ្ឋាភិបាលកម្ពុជាមានកាតព្វកិច្ចស្វែងរកអ្វីដែលបានកើតឡើងលើលោក Wanchalearm ហើយនិងត្រូវធានាសុវត្ថិភាពរបស់គេ។
លោកថា រដ្ឋាភិបាលបរទេស និងម្ចាស់ជំនួយ គួរតែដាក់សម្ពាធលើរដ្ឋាភិបាលកម្ពុជាឱ្យចាត់វិធានការចាំបាច់គ្រប់យ៉ាង ដើម្បីស្វែងរកលោក Wanchalearm បើមិនដូច្នោះទេ រូបគេនឹងប្រឈមហានិភ័យលើសុខសុវត្ថិភាពខ្ពស់ជាមិនខាន។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ប្រាប់វីអូឌីនៅព្រឹកថ្ងៃនេះថា លោកមិនទទួលបានព័ត៌មានពីការចាប់ពង្រាត់នេះនោះទេ។
លោកមានប្រសាសន៍ថា៖ «អត់មានរឿងហ្នឹងកើតឡើងទេ តែបើគាត់បានមកពីណា សួរតែប្រភពព័ត៌មានហ្នឹងទៅ…សម្រាប់សមត្ថកិច្ចអត់ដឹងទេរឿងនេះ»។
អ្នកនាំពាក្យក្រសួងមហាផ្ទៃកម្ពុជា លោក ខៀវ សុភ័គ ឱ្យដឹងថា ព័ត៌មាននេះ ខាងក្រសួងចាំបាច់ត្រូវពិនិត្យមើលពិត ឬក្លែងក្លាយសិន។
នៅពេលសួរថា តើខាងក្រសួងនឹងធ្វើការស៊ើបអង្កេតលើករណីចាប់ខ្លួននោះដែរឬទេ? លោក សុភ័គ មានប្រសាសន៍ថា៖ «បើថៃគេប្តឹងថា មានគេចាប់ជនជាតិថៃ អាហ្នុងយើងនឹងធ្វើ [ការស៊ើបអង្កេត]»។
លោកបន្តថា៖ «បើស្ថានទូតថៃអត់ប្តឹងថាបាត់ជនជាតិថៃនៅទីនេះផង ធ្វើធើអី?»
Wanchanlearm Satsaksit គឺជាសកម្មជនគាំទ្រប្រជាធិបតេយ្យសំខាន់ម្នាក់ ដែលជាប់ពាក់ព័ន្ធក្រុមប្រឆាំងរបបផ្តាច់ការ UDD ដែលគេស្គាល់ថា ជាក្រុមអាវក្រហមក្នុងប្រទេសថៃ។ លោកបានភៀសខ្លួនមករស់នៅកម្ពុជា ក្រោយរដ្ឋប្រហារយោធាក្នុងឆ្នាំ២០១៤ រួចបន្តសកម្មភាពនយោបាយរិះគន់រដ្ឋាភិបាលថៃថ្មីតាមបណ្តាញសង្គម។
មុនពេលចាប់ខ្លួន រូបគេបានបង្ហោះវីដេអូឃ្លីបមួយលើបណ្តាញ Facebook នៅថ្ងៃទី៣ ខែមិថុនា រិះគន់នាយករដ្ឋមន្រ្តីថៃ លោក ប្រាយុទ្ធ ចាន់អូចារ លើការដែលលោកបានអំពាវនាវដល់ពលរដ្ឋថៃកុំឱ្យស្អប់ប្រទេស ស្អប់ត្រឹមរូបលោកបានហើយ។
ក្នុងវីដេអូជិត ១នាទី លោក Wanchalearm និយាយជាភាសាថៃ ក្នុងន័យប្រែសម្រួលថា៖ «ពលរដ្ឋថៃមិនស្អប់ប្រទេសថៃទេ តែពួកគេស្អប់លោក [ប្រាយុទ្ធ] ដោយសារលោកខ្វះសមត្ថភាពដឹកនាំប្រទេស លោកគួរតែចុះចេញពីតំណែងទៅ ដើម្បីកុំឱ្យប្រទេសជាតិអាប់ឱន»។
ពាក់ព័ន្ធនឹងការចាប់ខ្លួននេះ ក្រុមសហភាពនិសិ្សតថៃ ឬហៅកាត់ SUT បានធ្វើយុទ្ធនាការលើបណ្តាញសង្គម ទាមទារឱ្យមានការដោះលែង Wanchalearm និងផ្តល់យុត្តិធម៌ និងសិទ្ធិដល់ជនភៀសខ្លួននយោបាយទាំងអស់ ហើយពួកគេគ្រោងរួមគ្នាដាក់បាច់ផ្កាទាមទារនៅមជ្ឈមណ្ឌលមួយកន្លែងក្នុងក្រុងបាងកក ថ្ងៃទី៥-៦ ខែមិថុនា។
ក្រុម SUT លើកឡើងលើទំព័រ Facebook ថា លោក Wanchalearm គឺមិនមែនជាជនភៀសខ្លួននយោបាយចុងក្រោយបំផុត និងដំបូងបង្អស់ដែលត្រូវបានចាប់ខ្លួននោះទេ ប៉ុន្តែ នៅមានជនភៀសខ្លួនជាច្រើនទៀតដែលរស់នៅក្រោមជោគវាសនាមិនច្បាស់លាស់។
កាសែត Bangkok Post រាយការណ៍នៅថ្ងៃនេះ ចាប់ពីក្រោយរដ្ឋប្រហារឆ្នាំ២០១៤មក យ៉ាងយោចណាស់ សកម្មជនថៃ ៨នាក់ បានរត់ភៀសខ្លួនទៅកាន់ប្រទេសឡាវ កម្ពុជា និងវៀតណាម ហើយបានបាត់ខ្លួន និងមួយចំនួនត្រូវបានរកឃើញថាស្លាប់។ ប្រភពដដែលបន្ថែមថា លោក Wanchalearm គឺឋិតក្នុងសកម្មជននិរទេសខ្លួន ២៩នាក់ ដែលរងបទចោទប្រមាថមហាក្សត្រថៃ៕
