លោកនាយករដ្ឋមន្ត្រី ហ៊ុន សែន បានអះអាងថា អគារដ៏ធំស្កឹមស្កៃស្នាក់ការកណ្តាលគណបក្សប្រជាជនដែលសាងសង់ថ្មី បង្ហាញឱ្យឃើញភាព«រុងរឿងដ៏អស្ចារ្យរបស់គណបក្សប្រជាជនកម្ពុជា»។
នៅព្រឹកថ្ងៃសុក្រនេះ លោក ហ៊ុន សែន និងមន្ត្រីជំនិតមួយចំនួន បានទៅពិនិត្យការដ្ឋានសាងសង់អគារទីស្នាក់ការបក្សប្រជាជនកម្ពុជា (CPP) ស្ថិតនៅតាមបណ្តោយវិថីព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
មេដឹកនាំបក្សកាន់អំណាចរូបនេះ បានសរសេរលើហ្វេសប៊ុករបស់លោកថា អគារនេះ មានក្បូរក្បាច់រចនាបថខ្មែរដ៏ល្អវិចិត្រ ដែលថា នៅប៉ែកខាងក្រៅអគារ រំលេចទៅដោយពណ៌ស ជានិមិត្តរូបនៃភាពស្មោះសបរិសុទ្ធសម្រាប់ជាតិ និងប្រជាជន។
លោកនាយករដ្ឋមន្ត្រីបញ្ជាក់ថា៖ «អគារដ៏ធំស្កឹមស្កៃនេះ បានបង្ហាញឱ្យឃើញពីភាពរឹងមាំ និងជានិមិត្តរូបនៃការរួបរួម សាមគ្គីភាព និងភាពរុងរឿងដ៏អស្ចារ្យរបស់គណបក្សប្រជាជនកម្ពុជា ដែលជាបង្អែកមិនអាចខ្វះបានសម្រាប់ជាតិ និងប្រជាជនកម្ពុជាតាំងពីអតីតកាល បច្ចុប្បន្ន និងទៅអនាគត»។
តាមហ្វេសប៊ុកនាយករដ្ឋមន្ត្រី អគារនេះសាងសង់ឡើងនៅលើផ្ទៃដីទីតាំងអគារចាស់ ដែលមានទំហំប្រមាណ ១,៦ហិកតា និងមានកម្ពស់ចំនួន ៥ជាន់ ចំណែកការសាងសង់ រួចរាល់បានប្រមាណ ៩៥ភាគរយ។
បក្សកាន់អំណាចដែលដឹកនាំដោយលោក ហ៊ុន សែន នៅអាណត្តិទី៦នេះ បណ្តើមបានអាសនៈទាំងអស់ក្នុងសភាចំនួន ១២៥ ក្រោយពីតុលាការកំពូលរំលាយអតីតគណបក្សសង្គ្រោះជាតិចេញពីឆាកនយោបាយមុនការបោះឆ្នោតមកដល់។
អ្នកនាំពាក្យគណបក្សប្រជាជនកម្ពុជា អះអាងថា ស្នាក់ការកណ្តាលបក្សនេះ ចំណាយលុយប្រមាណ ៤០លានដុល្លារអាមេរិក ហើយលុយនោះទទួលបានពីការបរិច្ចាគរបស់សមាជិក។ លោកឱ្យដឹងទៀតថា ស្នាក់ការនេះនឹងសម្ពោធដាក់ឱ្យប្រើប្រាស់ជាផ្លូវការនៅថ្ងៃទី២៨ ខែមិថុនាខាងមុខ៕