មន្ត្រីជាន់ខ្ពស់នគរបាលជាតិ អះអាងថា ការរឹតបន្តឹងច្បាប់ចរាចរណ៍តាមរយៈការបង្កើនការផាកពិន័យពី ៣ ទៅ ៥ដងនោះ ទទួលបានជោគជ័យ ដោយកាត់បន្ថយអ្នករងគ្រោះដល់ស្លាប់ និងរបួសក្នុងរយៈមួយខែកន្លងទៅនេះ។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន មានប្រសាសន៍ប្រាប់វីអូឌីថា ក្រោយពីរដ្ឋាភិបាលសម្រេចបង្កើនការផាកពិន័យ ធ្វើឱ្យជោគជ័យច្រើនក្នុងការទប់ស្កាត់កុំឱ្យមានអ្នកគ្រោះថ្នាក់ចរាចរណ៍ បើធៀបនឹងរយៈពេលដូចគ្នានឹងឆ្នាំមុន។
លោកមានប្រសាសន៍ថា៖ «យើងគិតថា មួយខែក្នុងការរឹតបន្តឹងច្បាប់នោះ ជោគជ័យហើយ បើសិនរឿងហ្នឹងបន្តចឹងទៀត យើងធានាថា ថយចុះច្រើនហើយ ព្រោះមួយខែនេះ ប្រៀបធៀបនឹងឆ្នាំមុនដូចគ្នា វាមានជាង ២០នាក់ស្លាប់ ហើយបើធៀបនឹងខែមុន ១៤នាក់ អញ្ចឹងបើមួយខែយើងថយចុះ ១៤នាក់ បើ ១០ខែ ថយចុះ ១៤០នាក់ សរុបទៅ ១៧០ ទៅ១៨០នាក់ដែរ មិនធម្មតាទេ»។
ប្រធានស្តីទីវិទ្យាស្ថានសុវត្ថិភាពចរាចរណ៍ នៃអង្គការជនពិការអន្តរជាតិ (ប៊ែលហ្ស៊ីក) លោក គង់ រតនៈ មានប្រសាសន៍ថា ការថយចុះអ្នកគ្រោះថ្នាក់ចរាចរណ៍នាពេលបច្ចុប្បន្ននេះ ដោយសារកត្តាច្រើនយ៉ាង ដូចជា អំឡុងពេលឆ្លងជំងឺកូវីដ១៩ មិនសូវមានមនុស្សធ្វើដំណើរច្រើន រួមទាំងវិធានការរបស់រដ្ឋាភិបាលក្នុងការបង្កើនការផាកពិន័យធ្ងន់ធ្ងរលើអ្នកល្មើសច្បាប់ចរាចរណ៍ផងដែរ។
ទោះជាបែបនេះក្តី លោក រតនៈ បញ្ជាក់ថា ដើម្បីទប់ស្កាត់បញ្ហាល្មើសច្បាប់ឱ្យមានប្រសិទ្ធភាព លុះត្រាតែអ្នកដំណើរសហការជាមួយអាជ្ញាធរក្នុងការគោរពច្បាប់ ទើបទទួលបានផលវិជ្ជមាន។
លោកបញ្ជាក់ថា ៖ «ត្រូវតែមានការចូលរួមពីប្រជាពលរដ្ឋ ត្រូវមានការគោរពច្បាប់ ហើយយើងតម្រូវឱ្យមានការកែសម្រួលទៅលើហេដ្ឋារចនាសម្ព័ន្ធមួយចំនួន ឧទាហរណ៍ដូចជា ការបំពាក់ភ្លើងសញ្ញា ឬក៏គំនូសសញ្ញា ឬក៏ផ្លាកសញ្ញាចរាចរណ៍ផ្សេងៗ ដើម្បីឱ្យប្រជាពលរដ្ឋ គាត់ងាយក្នុងការមើល រឿងដែលសំខាន់ទាមទារឱ្យមានការរឹតបន្តឹងច្បាប់ជាប់ជាប្រចាំ ពីព្រោះប្រជាពលរដ្ឋប្រចាំថ្ងៃនេះ គាត់ខ្លាចប៉ូលិសជាងការបារម្ភពីសុខភាពរបស់គាត់»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ដើម្បីឱ្យដឹងថា ទប់ស្កាត់គ្រោះថ្នាក់ចរាចរណ៍ឱ្យមានប្រសិទ្ធភាពបាន លុះត្រាតែជំងឺកូវីដ១៩ស្ងប់ស្ងាត់ ហើយប្រជាពលរដ្ឋចេញធ្វើដំណើរដូចដើមវិញ។
ទោះជាបែបនេះក្តី លោក សន ជ័យ សង្កេតឃើញថា បច្ចុប្បន្ននេះ រថយន្តខុសបច្ចេកទេស (រថយន្តតទ្រុង) និងរថយន្តដឹកទំនិញធំៗដែលពាក់ស្លាកលេខរដ្ឋ ខេមរភូមិន្ទ ន.ប ជាដើម នៅតែមានករណីបើកបរបំពានច្បាប់ដោយមិនសូវមានការទប់ស្កាត់។
លោកមានប្រសាសន៍ថា៖ «ការអនុវត្តច្បាប់ត្រូវតែមានស្តង់ដារមួយ ទោះបីជារថយន្តប្រភេទណាក៏ដោយ ឱ្យតែខុសច្បាប់ ឱ្យតែខុសបច្ចេកទេសនៃខ្លឹមសារច្បាប់ ត្រូវអនុវត្តច្បាប់ដោយមិនលើកលែង ដោយមិនយោគយល់ក្នុងករណីណាមួយ»។
រដ្ឋាភិបាលចាប់ផ្តើមបង្កើនការផាកពិន័យចរាចរណ៍ពី ៣ ទៅ ៥ដង ដែលចាប់ផ្តើមពីថ្ងៃទី១ ខែឧសភា ឆ្នាំ២០២០។ ចំនួនលុយដែលផាកបានគឺ ៧០ភាគរយផ្តល់ឱ្យកម្លាំងនគរបាល ២៥ភាគរយប្រគល់ឱ្យអង្គភាពនគរបាល និង ៥ភាគរយដាក់ចូលក្នុងថវិកាជាតិ។
របាយការណ៍នគរបាលជាតិ បង្ហាញថា ក្នុងរយៈពេល ១ខែក្នុងខែឧសភា ផាកពិន័យបានចំនួន ៤៤ ៧៦៥ករណី ទទួលបានទឹកប្រាក់ចំនួន ៣ពាន់លានរៀល ស្មើនឹងជាង ៧០ម៉ឺនដុល្លារអាមេរិក៕