សហមេធាវីការពារក្តីអតីតប្រធានគណបក្សសង្គ្រោះជាតិ គឺលោក ផែង ហេង បង្ហាញការយល់ឃើញថា ដើម្បីស្ថិរភាពសង្គម និងសន្តិភាពពិតប្រាកដ ជម្រើសតែមួយគត់របស់អ្នកច្បាប់ គឺកែប្រែសង្គមឱ្យមានការផ្សះផ្សាជាតិ «ចៀសឆ្ងាយពីឥទ្ធិពលនយោបាយ»។
តាមរយៈសារបង្ហោះលើបណ្តាញសង្គមកាលពីម្សិលមិញ លោក ផែង ហេង បង្ហាញការយល់ឃើញថា ដើម្បីស្ថិរភាពសង្គម និងសន្តិភាពពិត ប្រជាពលរដ្ឋត្រូវមានទស្សនៈជាតិនិយម យុត្តិធម៌និយម ស្រឡាញ់ភាពស្អាតស្អំ និងស្អប់អំពើពុករលួយ។
មេធាវីរូបនេះ អះអាងទៀតថា៖ «ជាពិសេសយុវជនត្រូវធ្វើជាគំរូ អ្នកច្បាប់កុំទោរទន់តាមអ្នកនយោបាយ និងចៀសឆ្ងាយពីឥទ្ធិពលនយោបាយ។ យុវជន និងអ្នកច្បាប់ ជាជម្រើសតែមួយគត់សម្រាប់ការកែប្រែសង្គមឱ្យមានការផ្សះផ្សាជាតិ យុត្តិធម៌សង្គម និងសន្តិភាពពិតប្រាកដ»។
លោក ផែង ហេង ឱ្យដឹងបន្ថែមថា សារនេះជាទស្សនៈផ្ទាល់ខ្លួនរបស់លោក មិនជាប់ពាក់ព័ន្ធទៅនឹងសំណុំរឿងកូនក្តីទេ ប៉ុន្តែ លោកអះអាងថា ភាពមិនឯករាជ្យរបស់អ្នកច្បាប់ វាជំរុញឱ្យមានភាពផុយស្រួយនៃការបែកបាក់ជាតិ។
លោក ផែង ហេង ប្រាប់ថា៖ «អ្នកនយោបាយ គេតែងតែមានមហិច្ឆតា ការពារប្រយោជន៍របស់គេហើយ ប៉ុន្តែ បើយើងជាអ្នកបច្ចេកទេស [អ្នកច្បាប់] […] រក្សាបាននូវអព្យាក្រឹត្យភាពតាមវិជ្ជាជីវៈបាន អាហ្នឹងក៏វាកាត់បន្ថយជម្លោះនៅក្នុងសង្គម»។
ប្រធានគណៈមេធាវីកម្ពុជា លោក សួន វិសាល និយាយថា មេធាវីមិនមែនជាបុគ្គលឯករាជ្យទេ ថ្វីត្បិតការងារពួកគេផ្អែកលើមូលដ្ឋានច្បាប់។ លោកថា គោលដៅមេធាវីស្វែងរកប្រយោជន៍ឱ្យកូនក្តី ទោះអ្នកនោះជាអ្នកនយោបាយក៏ដោយ។
លោក វិសាល អះអាងទៀតថា ប៉ុន្តែ មេធាវីអាចសុំដកខ្លួនមិនការពារក្តីបាន បើសិនខ្លួនមិនពេញចេញចិត្ត ឬមានការគំរាមកំហែងពីអ្នកនយោបាយដែលពឹងខ្លួនឱ្យការពារក្តី។
លោក សួន វិសាល ប្រាប់ថា៖ «ប្រសិនបើគាត់ទៅធ្វើការ ហើយត្រូវបានគេគំរាម អាហ្នឹងជារឿងមួយទៀត ដែលគាត់ត្រូវប្តឹងមកគណៈមេធាវី ដើម្បីស្វែងរកដំណោះស្រាយ។ ប៉ុន្តែ មកដល់ម៉ោងនេះ មិនទាន់ឃើញមេធាវីណាម្នាក់មានគេគំរាមកំហែងអីទេ»។
អ្នកនាំពាក្យក្រសួងយុត្តិធម៌ លោក ជិន ម៉ាលីន ប្រាប់ថា អ្នកច្បាប់ក៏អាចបម្រើនយោបាយបានដែរ ព្រោះពួកគេជាពលរដ្ឋដែលអាចអនុវត្តសិទ្ធិនយោបាយបាន។
អ្នកនាំពាក្យរូបនេះ អះអាងថា សិទ្ធិនេះធានាដោយច្បាប់ជាតិ និងអន្តរជាតិ វាលើកលែងតែប្រព័ន្ធតុលាការប៉ុណ្ណោះ ដែលរដ្ឋធម្មនុញ្ញតម្រូវឱ្យឯករាជ្យពីអំណាចនយោបាយ។
លោក ជិន ម៉ាលីន ប្រាប់ថា៖ «ក្រុមមេធាវីរបស់គាត់ហ្នឹងក៏ជាអ្នកច្បាប់ ហើយធ្វើសកម្មភាពក្រោមឥទ្ធិពលនយោបាយ ព្រោះអីពួកគាត់ជាសកម្មជនយោបាយ ជាសមាជិកនយោបាយដែលធ្វើការការពារក្តីដើម្បីផលប្រយោជន៍នយោបាយ និងប្រធានបក្សរបស់គាត់ដែរ។ បើនិយាយឱ្យត្រឹមត្រូវ អ្នកដែលត្រូវឯករាជ្យពីអំណាចនយោបាយ គឺស្ថាប័នតុលាការ»។
យ៉ាងនេះក្តី អ្នកជំនាញផ្នែកច្បាប់នៅអង្គការសង្គមស៊ីវិល លោកមេធាវី សុក សំអឿន ពន្យល់ថា អ្នកច្បាប់ និងប្រព័ន្ធយុត្តិធម៌ នឹងមិនឯករាជ្យទេ ដរាបណារដ្ឋាភិបាលដែលជាអ្នកធ្វើច្បាប់ បានចងប្រព័ន្ធនេះមិនឱ្យឯករាជ្យរួចទៅហើយនោះ៕
