ប្រជាសហគមន៍មួយចំនួននៅឃុំត្រពាំងព្រីង ស្រុកតំបែរ ខេត្តត្បូងឃ្មុំ បានប្រមូលផ្តុំគ្នាតវ៉ារារាំងគ្រឿងចក្ររបស់ក្រុមហ៊ុនចិនមួយមិនឱ្យឈូសឆាយលើដីកំពុងមានជម្លោះរវាងពលរដ្ឋ និងក្រុមហ៊ុន។
លោក សែម ចំណាន ដែលអះអាងថា ជាតំណាងពលរដ្ឋមានជម្លោះដីធ្លីនៅភូមិស្រែប្រាំង ប្រាប់វីអូឌីថា ក្រុមហ៊ុនចិន ហាម៉ឹនី វីន អ៊ិនវេសមេន បានដាក់គ្រឿងចក្រ និងសន្តិសុខ អមដោយកម្លាំងអាជ្ញាធរស្រុកតំបែរប្រដាប់ដោយកាំភ្លើងប្រមាណជាង ១០នាក់ ទៅឈូសឆាយលើដីសហគមន៍ ដែលប្រជាពលរដ្ឋកំពុងអាស្រ័យផល ប៉ុន្តែ ត្រូវបានរារាំងដោយអ្នកភូមិប្រហែលជិត ១០០នាក់។
តំណាងពលរដ្ឋរូបនេះ អះអាងថា តាមលិខិតចុះបញ្ជីដីធ្លីរបស់មន្ទីររៀបចំដែនដីខេត្តត្បូងឃ្មុំទៅឱ្យក្រុមហ៊ុនកាលពីឆ្នាំ២០១២ គឺក្រុមហ៊ុនទទួលបានដីទំហំតែ ៤២១ហិកតាប៉ុណ្ណោះ ប៉ុន្តែ ពេលចេញប្លង់ជាក់ស្តែង គឺក្រុមហ៊ុនទទួលដីរហូតទៅជាង ១,៦០០ហិកតា ដែលចំនួនដ៏ច្រើននេះ លោកថា បានប៉ះពាល់ដល់ដីសហគមន៍ដែលកំពុងអាស្រ័យផល។
លោក សែម ចំណាន បញ្ជាក់ថា ដីសហគមន៍ដែលអ្នកភូមិកំពុងតវ៉ាមានទំហំ ៧៨៥ហិកតា ដែលចូលអាស្រ័យផលធ្វើស្រែធ្វើចម្ការដោយប្រជាពលរដ្ឋចំនួនពីរភូមិ គឺភូមិបុស្សស្នោរ និងស្រែប្រាំង ដែលមានប្រជាពលរដ្ឋ ១២៩គ្រួសារ។
លោកបន្ថែមថា៖ «អាជ្ញាធរធ្វើហ្នឹង គឺរំលោភបំពានប្រជាពលរដ្ឋខ្លួនឯង ទាំងដែលពលរដ្ឋមិនបានខុសអីផង។ អាជ្ញាធរបែរជាមកសម្លុតគំរាមកំហែងចាប់ខ្លួន។ វាអយុត្តិធម៌សម្រាប់ប្រជាពលរដ្ឋក្នុងសហគមន៍ ក៏ដូចរូបខ្ញុំផ្ទាល់ដែរ។ អ៊ីចឹង ខ្ញុំសុំស្នើទៅរដ្ឋាភិបាល ក្រសួងពាក់ព័ន្ធ ជាពិសេសសម្តេច ហ៊ុន សែន សុំឱ្យគាត់ជួយរកដំណោះស្រាយដែលសមស្រប និងអាចទទួលបានទាំងអស់គ្នា។ បើមិនទាន់មានដំណោះស្រាយ ដាច់ខាតគឺមិនឱ្យក្រុមហ៊ុនចូលឈូសឆាយឡើយ»។
ពលរដ្ឋម្នាក់ទៀត លោក វឿន វឺ និយាយថា ក្រុមហ៊ុនចិន ហាម៉ឹនី វីន អ៊ិនវេសមេន មិនត្រឹមតែឈូសឆាយប៉ះពាល់លើដីសហគមន៍ប៉ុណ្ណោះទេ គឺក្រុមហ៊ុនមួយនេះ បានឈូសឆាយផ្តាច់ផ្លូវមិនឱ្យប្រជាពលរដ្ឋចេញចូលទៅប្រមូលផលដំណាំរបស់ខ្លួនក្នុងតំបន់នោះថែមទៀត។
លោក វឿន វឺ បន្តថា បើអាជ្ញាធរស្រុកវិញ បានប្រកាសគំរាមកំហែងចាប់ខ្លួនប្រជាពលរដ្ឋ និងអ្នកដែលអាជ្ញាធរថា បានញុះញង់ឱ្យប្រជាពលរដ្ឋចេញតវ៉ាថែមទៀត។
លោក វឿន វឺ ប្រាប់ថា៖ «អាជ្ញាធរប្រកាសគំរាមកំហែងចាប់ខ្លួនប្រជាពលរដ្ឋដែលតវ៉ា។ គេថា ប្រជាជនកុំជឿតាមការញុះញង់របស់គេមួយចំនួនតូច ដោយគេថា ដីក្រុមហ៊ុនចិនគេមានកម្មសិទ្ធិហើយ ប៉ុន្តែ ប្រជាពលរដ្ឋនៅ ១០០នាក់ជាងហ្នឹង គេមិនជឿតាមអាជ្ញាធរទេ។ គេនៅតែតវ៉ាដាច់ខាត ព្រោះដីនេះជាដីរបស់ប្រជាពលរដ្ឋសម្រាប់បង្កបង្កើនផលចិញ្ចឹមក្រុមគ្រួសាររបស់គេ។ បើសិនជាដីហ្នឹងបានទៅលើក្រុមហ៊ុន ហើយប្រជាពលរដ្ឋអត់មានដីធ្វើស្រែចម្ការ តើប្រជាពលរដ្ឋរស់នៅមានន័យអី»។
អភិបាលស្រុកតំបែរ លោក សុខ សារិទ្ធ មានប្រសាសន៍ថា ប្រជាពលរដ្ឋកំពុងតែធ្វើរឿងខុសច្បាប់ ដោយថា បានចូលទៅរំលោភយកដីរបស់ក្រុមហ៊ុនដែលមានប័ណ្ណកម្មសិទ្ធិត្រឹមត្រូវ។ លោកបន្តថា ជម្លោះដីធ្លីរវាងប្រជាពលរដ្ឋ និងក្រុមហ៊ុន ត្រូវបានដោះស្រាយចប់អស់ហើយ ពុំមានដីសហគមន៍នៅតំបន់នោះទៀតឡើយ ហើយលោកថា អាជ្ញាធរក៏គ្មានគោលការណ៍ដោះស្រាយថ្មីដែរ។
អភិបាលស្រុករូបនេះ លើកឡើងថា ករណីអ្នកភូមិតវ៉ានោះ គឺមានអ្នកញុះញង់នៅពីក្រោយ។ លោកថា សមត្ថកិច្ចកំពុងស្រាវជ្រាវរកចាប់ខ្លួនអ្នកដែលលោកថា បានញុះញង់ឱ្យពលរដ្ឋតវ៉ានោះ។
លោក សុខ សារិទ្ធ បន្ថែមថា៖ «ប្រជាជនយើងមួយចំនួន គាត់មិនទាន់យល់។ គាត់ជឿតាមការឃោសនាតាមជនខិលខូចមួយចំនួននៅតែបន្តសកម្មភាព។ ភាគច្រើនគាត់យល់ហើយ នៅតែប៉ុន្មាននាក់ទេដែលនៅតែតវ៉ា តែអ្នកដែលតវ៉ាហ្នឹង យើងនៅតែផ្តល់ឱកាសពន្យល់គាត់ឱ្យគាត់បានយល់អំពីផ្លូវច្បាប់ ពីព្រោះយើងមិនអាចទៅប៉ះពាល់កម្មសិទ្ធរបស់គេ ប្រឈមមុខនឹងផ្លូវច្បាប់។ ឥលូវ អាជ្ញាធរកំពុងស្រាវជ្រាវចាត់វិធានការចំពោះអ្នកញុះញង់»។
កាលពីឆ្នាំ២០១៩ ក្រសួងរៀបចំដែនដី នគរូបនីយកម្ម និងសំណង់ អះអាងថា ដីទំហំ ៤២,១៧០ហិកតា ស្ថិតក្នុងភូមិស្រែប្រាំង ភូមិត្រពាំងព្រីង នៅស្រុកតំបែរ ដែលក្រុមហ៊ុន ហាម៉ឹនី វីន អ៊ិនវេសមេន ទទួលបានសិទ្ធិវិនិយោគនោះ គឺក្រុមហ៊ុនចិនមួយនេះដោះស្រាយផលប៉ះពាល់ជូនពលរដ្ឋរួចរាល់ហើយ ហើយមន្ទីររៀបចំដែនដីខេត្ត ក៏បានចុះបញ្ជីដីធ្លីជូនក្រុមហ៊ុនផងដែរ។
វីអូឌីមិនអាចសុំការបញ្ជាក់ពីភាគីក្រុមហ៊ុន ហាម៉ឹនី វីន អ៊ិនវេសមេន បានទេ ជុំវិញករណីនេះ។
មន្ត្រីអង្កេតនៅសមាគមអាដហុកប្រចាំខេត្តត្បូងឃ្មុំ លោក ឡេង សេងហាន មានប្រសាសន៍ថា ដើម្បីដោះស្រាយបញ្ចប់វិវាទ និងមានតម្លាភាពចំពោះប្រជាពលរដ្ឋ និងក្រុមហ៊ុន គឺរដ្ឋាភិបាលគួរបង្កើតគណៈកម្មការឯករាជ្យមួយដែលមានគ្រប់ភាគីពាក់ព័ន្ធចូលរួមចុះស្រាវជ្រាវករណីនេះ ជាជាងចោទប្រកាន់ថា មានអ្នកនេះ មានអ្នកនោះញុះញង់ ឬនៅពីក្រោយនៃការតវ៉ារបស់ប្រជាពលរដ្ឋ។
លោក ឡេង សេងហាន បន្ថែមថា៖ «ខ្ញុំថា ដើម្បីឱ្យមានតម្លាភាព ហើយអាចទទួលយកបានទាំងអស់គ្នា គួរតែអាជ្ញាធរពាក់ព័ន្ធហ្នឹងចុះស្រាវជ្រាវឱ្យបានច្បាស់លាស់ថា តើអ្វីដែលប្រជាពលរដ្ឋគាត់លើកឡើងហ្នឹង តើពួកគាត់មានអ្វីយកមកសំអាង។ ហើយពាក់ព័ន្ធនឹងការវិនិយោគរបស់ក្រុមហ៊ុនកន្លងមក តើមានការចុះសិក្សាស្រាវជ្រាវពីផលប៉ះពាល់បរិស្ថាន និងសង្គមត្រឹមត្រូវតាមផ្លូវច្បាប់អត់? ហើយបើប៉ះពាល់ដីប្រជាពលរដ្ឋ តើបានផ្តល់សំណងតាមគោលការណ៍ច្បាប់ហើយនៅ?»
ពាក់ព័ន្ធនឹងជម្លោះដីធ្លីនេះដែរ កាលពីថ្ងៃទី០៣ ខែមិថុនា សាលាដំបូងខេត្តត្បូងឃ្មុំ បានសម្រេចផ្តន្ទាទោសតំណាងសហគមន៍ភូមិស្រែប្រាំង លោក សែម សាង ឱ្យជាប់ពន្ធនាគារ ៧ឆ្នាំ ក្រោមការចោទប្រកាន់ថា បានកំហែងយកដោយមានអាវុធ។
តំណាងសហគមន៍រូបនេះ ត្រូវបានសមត្ថកិច្ចស្ទាក់ចាប់នៅភូមិស្រែប្រាំង កាលពីថ្ងៃទី១៧ ខែតុលា ឆ្នាំ២០១៩ ពាក់ព័ន្ធនឹងរឿងជម្លោះដីធ្លីជាមួយក្រុមហ៊ុនចម្ការកៅស៊ូ ហាម៉ឹនី វីន អ៊ិនវេសមេន៕
