ក្រុមនិស្សិតសាកលវិទ្យាល័យក្នុងប្រទេសថៃមួយ អំពាវនាវឱ្យអាជ្ញាធរប្រទេសពួកគេបើកការស៊ើបអង្កេតលើករណីបាត់ខ្លួនសកម្មជននយោបាយថៃលេចធ្លោមួយរូបឈ្មោះ វ៉ាន់ឆាឡឺម នៅក្នុងប្រទេសកម្ពុជាកាលពីសប្តាហ៍មុន។
ក្រុមនិស្សិតវិទ្យាសាស្រ្តនយោបាយនៃសាកលវិទ្យាល័យ ជូឡាឡុងកន បានស្នើសុំឱ្យអាជ្ញាធរថៃ និងអាជ្ញាធរកម្ពុជា រួមសហការគ្នាបើកការស៊ើបអង្កេតជាបន្ទាន់ លើករណីចាប់ខ្លួនសកម្មជនគាំទ្រប្រជាធិបតេយ្យថៃ ឈ្មោះ វ៉ាន់ឆាឡឺម សត្យសក្តិសិទ្ធិ (Wanchalearm Satsaksit) ដោយអាថ៌កំបាំងកាលពីថ្ងៃទី៤ ខែមិថុនា នៅទីក្រុងភ្នំពេញ។
ក្នុងសេចក្តីថ្លែងការណ៍ចុះថ្ងៃទី៥ ខែមិថុនា ក្រុមនិស្សិតដដែលលើកឡើងថា លោក វ៉ាន់ឆាឡឺម មិនមែនជាជនរងគ្រោះពីការចាប់ខ្លួនហើយបាត់ដំណឹងទី១នោះទេ។ ពួកគេថា ការរកឱ្យឃើញមូលហេតុនៃការបាត់ខ្លួន គឺជាការផ្តល់យុត្តិធម៌ដល់ជនរងគ្រោះ និងលើកតម្កើងសិទ្ធិសេរីភាពបញ្ចេញមតិរបស់ពលរដ្ឋ។
តាមប្រភពដដែល ក្រុមនិស្សិតក៏បានស្នើដល់រដ្ឋាភិបាលត្រូវផ្តល់យុត្តិធម៌ដល់ជនរងគ្រោះ និងក្រុមគ្រួសាររបស់ពួកគេ ហើយបើកការស៊ើបអង្កេតលើរាល់ករណីចាប់ខ្លួនពលរដ្ឋថៃទាំងអស់ និងត្រូវតាមវែកមុនឧក្រិដ្ឋជនមកផ្តន្ទាទោសតាមច្បាប់ឱ្យខានតែបាន។
លោក វ៉ាន់ឆាឡឺម ត្រូវបានអង្គការឃ្លាំមើលសិទ្ធិមនុស្ស HRW អះអាងដោយផ្អែកលើសាក្សី និងវីដេអូកាមេរ៉ាសុវត្ថិភាពកាលពីថ្ងៃសុក្រសប្ដាហ៍មុនថា រូបគេត្រូវជនមួយក្រុមយកកាំភ្លើងភ្ជង់ និងចាប់ញាត់បញ្ចូលក្នុងរថយន្តមួយគ្រឿងនៅល្ងាចថ្ងៃទី៤ ខែមិថុនា ខណៈកំពុងទិញអាហារតាមផ្លូវក្បែរអគារស្នាក់នៅក្នុងក្រុងភ្នំពេញ។
ក្រោយហេតុការណ៍នេះ ក្រុមយុវជនថៃបានធ្វើយុទ្ធនាការទាមទារសេរីភាពដល់ជនរងគ្រោះដោយដាក់បាច់ផ្កាលើរូបថតជនរងគ្រោះ ហើយអំពាវនាវរកយុត្តិធម៌ដល់សកម្មជនដទៃដែលប្រឆាំងរដ្ឋាភិបាលតាមបណ្តាញសង្គម Facebook និង Twitter ដោយប្រើសារ «សង្គ្រោះ វ៉ាន់ឆាឡឺម» ក្នុងនោះក៏មានអតីតបវរកញ្ញាចក្រវាឡថៃឆ្នាំ២០១៧មួយរូបផងដែរ។
បើតាមកាសែត The Standard របស់ថៃនៅថ្ងៃនេះ អតីតបវរកញ្ញាថៃម្នាក់ នាង ម៉ារីយ៉ា ផូនឡឺតឡាប (Mariya Poollertlap) លើកឡើងថា នាងគាំទ្រពលរដ្ឋថៃទាមទាររកការពិតកើតឡើងលើ វ៉ាន់ឆាឡឺម ហើយថា ការបាត់ខ្លួនជាបន្តបន្ទាប់ ដែលក្រោយមករកឃើញស្លាប់របស់សកម្មជនប្រឆាំងដែលភៀសខ្លួនទៅក្រៅប្រទេស គឺជារឿងគួរឱ្យភ័យខ្លាច។
សាររបស់នាង ម៉ារីយ៉ា ដែលត្រូវបានប្រភពដដែលយកចុះផ្សាយថា៖ «ខ្ញុំហត់នឿយក្នុងការរស់នៅជាមួយភាពភ័យខ្លាច អ្នកក៏ដូចខ្ញុំដែរមែនទេ? ខ្ញុំភ័យខ្លាច តែភ្ញាក់ផ្អើលដែលប្រជាជនក្នុងប្រទេសខ្ញុំហ៊ានបញ្ចេញមតិតវ៉ាកាន់តែខ្លាំង។ ពេលវេលាសម្រាប់ផ្លាស់ប្តូរជិតដល់ហើយ»។
ពាក់ព័ន្ធនឹងការបាត់ខ្លួននេះ បងស្រីរបស់ជនរងគ្រោះលើកឡើងក្នុងសេចក្តីថ្លែងមួយកាលពីថ្ងៃអាទិត្យ និងត្រូវបានកាសែតថៃ Coconuts ស្រង់មកចុះផ្សាយនៅថ្ងៃនេះថា នាងនៅមានសង្ឃឹមថា ប្អូនប្រុសខ្លួននៅមានជីវិត និងទទូចដល់ក្រុមឧក្រិដ្ឋជនឱ្យដោះលែងរូបគេត្រឡប់មកផ្ទះវិញដោយសុវត្ថិភាព។
លោក វ៉ាន់ឆាឡឺម គឺជាសកម្មជនគាំទ្រប្រជាធិបតេយ្យសំខាន់ម្នាក់ ដែលជាប់ពាក់ព័ន្ធក្រុមប្រឆាំងរបបផ្តាច់ការ UDD ដែលគេស្គាល់ថា ជាក្រុមអាវក្រហមក្នុងប្រទេសថៃ។ លោកបានភៀសខ្លួនមករស់នៅកម្ពុជា ក្រោយរដ្ឋប្រហារយោធាក្នុងឆ្នាំ២០១៤ រួចបន្តសកម្មភាពនយោបាយរិះគន់រដ្ឋាភិបាលថៃថ្មីតាមបណ្តាញសង្គម។
មុនពេលចាប់ខ្លួន រូបគេបានបង្ហោះវីដេអូឃ្លីបមួយលើបណ្តាញសង្គម Facebook នៅថ្ងៃទី៣ ខែមិថុនា រិះគន់នាយករដ្ឋមន្រ្តីថៃ លោក ប្រាយុទ្ធ ចាន់អូចារ លើការដែលលោកបានអំពាវនាវដល់ពលរដ្ឋថៃកុំឱ្យស្អប់ប្រទេស ហើយស្អប់ត្រឹមរូបលោកបានហើយ។
ក្នុងវីដេអូជិត ១នាទី លោក វ៉ាន់ឆាឡឺម និយាយជាភាសាថៃក្នុងន័យប្រែសម្រួលថា៖ «ពលរដ្ឋថៃមិនស្អប់ប្រទេសថៃទេ តែពួកគេស្អប់លោក [ប្រាយុទ្ធ] ដោយសារលោកខ្វះសមត្ថភាពដឹកនាំប្រទេស លោកគួរតែចុះចេញពីតំណែងទៅ ដើម្បីកុំឱ្យប្រទេសជាតិអាប់ឱន»។
ពាក់ព័ន្ធនឹងការចាប់ខ្លួននេះ ទាំងសមត្ថកិច្ចថៃ និងសមត្ថកិច្ចកម្ពុជា សុទ្ធតែអះអាងដូចគ្នាថា មិនបានដឹង ឬពាក់ព័ន្ធនឹងករណីបុរសថៃឈ្មោះ វ៉ាន់ឆាឡឺម នោះទេ ហើយក៏បដិសេធមិនធ្វើការស៊ើបសង្កេតដែរ ដរាបណាគ្មានពាក្យបណ្តឹង ឬការស្នើសុំពីភាគីម្ខាងៗ។
ចាប់ពីក្រោយរដ្ឋប្រហារឆ្នាំ២០១៤មក យ៉ាងយោចណាស់សកម្មជនថៃ ៨នាក់ បានរត់ភៀសខ្លួនទៅកាន់ប្រទេសឡាវ កម្ពុជា និងវៀតណាម ហើយបានបាត់ខ្លួន និងមួយចំនួនទៀត ត្រូវបានរកឃើញថាស្លាប់។ ប្រភពដដែលបន្ថែមថា លោក វ៉ាន់ឆាឡឺម គឺឋិតក្នុងចំណោមសកម្មជននិរទេសខ្លួន ២៩នាក់ ដែលរងបទចោទថា បានប្រមាថព្រះមហាក្សត្រថៃ៕
