អាជ្ញាធរវៀតណាមកាលពីថ្ងៃទី៧ ខែមិថុនា បានចាប់ខ្លួនពលរដ្ឋខ្មែរកម្ពុជាក្រោមរស់នៅខេត្តកៀងយ៉ាង អតីតខេត្តរបស់កម្ពុជាឈ្មោះ ក្រមួនស ចំនួន ៥នាក់ ដោយចោទថា បានឈូសឆាយ និងកាន់កាប់ដីជាកម្មសិទ្ធិរបស់រដ្ឋ។
អ្នកស្រី ហ្វិន ធីហៅ អះអាងថា កាលពីថ្ងៃទី៧ ខែមិថុនា អាជ្ញាធរវៀតណាមចំនួន ៦០នាក់ បានសម្រុកចូលក្នុងផ្ទះរបស់គាត់ទាំងយប់ ហើយចាប់ខ្លួនសមាជិកគ្រួសារចំនួន ៥នាក់ បញ្ជូនទៅសាលាស្រុក យ៉ាងថាន់។ អ្នកស្រីបន្តថា ក្រោយពេលបញ្ជូនទៅដល់សាលាស្រុក ២ម៉ោងក្រោយមក អាជ្ញាធរវៀតណាមដោះលែង ៤នាក់មកវិញ ហើយបន្តឃុំខ្លួនបងប្រុសរបស់គាត់ម្នាក់ឈ្មោះ ហ្វិន យ៉ាងដៀប។
អ្នកស្រីថា អាជ្ញាធរវៀតណាមចោទប្រកាន់បងប្រុសគាត់ថា ជាអ្នកដឹកនាំពលរដ្ឋឈូសឆាយ និងកាន់កាប់ដីរដ្ឋដោយខុសច្បាប់។ ប៉ុន្តែ អ្នកស្រីថា បងប្រុសរបស់គាត់គ្រាន់តែជាអ្នកបើកគ្រឿងចក្រស៊ីឈ្នួលឈូសឆាយដីឱ្យពលរដ្ឋតែប៉ុណ្ណោះ។
អ្នកស្រីថា៖ «ខ្ញុំសុំស្នើឱ្យគេជួយរកយុត្តិធម៌បងប្រុសខ្ញុំ ជួយឱ្យដោះលែងបងប្រុសខ្ញុំមានសេរីភាព ហើយអត់មានវាយដំ ធ្វើទុក្ខបុកម្នេញបងប្រុសខ្ញុំ។ ខ្ញុំស្នើទៅថ្នាក់លើ គ្រប់ក្រសួងទាំងអស់អ៊ីចឹង»។
អ្នកស្រីបន្តថា ប្រសិនបើអាជ្ញាធរវៀតណាមមិនព្រមដោះលែងបងប្រុសអ្នកស្រីទេនោះ រូបគាត់ និងអ្នកភូមិផ្សេងទៀត នឹងនាំគ្នាទៅតវ៉ានៅសាលាស្រុកជាថ្មីទៀត។
ពលរដ្ឋខ្មែរម្នាក់ទៀតរស់នៅភូមិប៉ប្រក់ ឃុំភូមី ស្រុកយ៉ាងថាញ់ ខេត្តក្រមួនស សុំមិនបញ្ចេញឈ្មោះ ប្រាប់វីអូឌីនៅថ្ងៃនេះដែរថា កាលពីម្សិលមិញ ប្រជាពលរដ្ឋជាង ១០០នាក់ បាននាំគ្នាតវ៉ានៅមុខសាលាឃុំ ភូមី និងសាលាស្រុក យ៉ាងថាញ់ ដើម្បីទាមទារឱ្យដោះលែងលោក ហ្វិន យ៉ាងដៀប។
លោកអំពាវនាវទៅរដ្ឋាភិបាលកម្ពុជា និងសមាគមខ្មែរកម្ពុជាក្រោមទូទាំងពិភពលោក ជួយអន្តរាគមន៍ទៅរដ្ឋាភិបាលវៀតណាមដោះលែងលោក ហ្វិន យ៉ាងដៀប។
លោកថា៖ «យើងនៅក្រោមការគាបសង្កត់គេ យើងធ្វើមិនឈ្នះគេ មានតែធ្វើតាមច្បាប់ គឺធ្វើក្រដាសស្នាមមេដៃ ដើរប្ដឹងអ៊ីចឹង រកសហគមន៍អន្តរជាតិជួយអ៊ីចឹង គ្រាន់បានសម្រួលពួកខ្ញុំបានខ្លះ។ ឥលូវមានតែសហគមន៍អន្តរជាតិជួយដាក់សម្ពាធទៅប្រទេសវៀតណាមទេ ទៅជួយដោះស្រាយបញ្ហាដីធ្លី ទី២ សុំឱ្យដោះលែងម្នាក់ដែលចាប់ខ្លួនផង ព្រោះគ្នាគ្មានដឹងអីទេ គ្នាទៅស៊ីឈ្នួលពួកខ្ញុំទេ ហើយពួកខ្ញុំមិនមែនទៅយកដីរដ្ឋដែរ ដីជីដូនជីតាខ្ញុំចែកឱ្យ ខ្ញុំកើតមកដឹងដីឪខ្ញុំធ្វើនៅកន្លែងហ្នឹង…»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា បញ្ហាខ្មែរកម្ពុជាក្រោម មិនស្ថិតនៅក្រោមការគ្រប់គ្រងរបស់រដ្ឋាភិបាលកម្ពុជានោះទេ។
លោកថា៖ «ទោះបីបងប្អូនមួយចំនួនជាអតីតខ្មែរកម្ពុជាក្រោមយ៉ាងណាក្ដី ក៏វាស្ថិតនៅក្រោមក្នុងការគ្រប់គ្រងរដ្ឋាភិបាលវៀតណាម អ៊ីចឹងមានបញ្ហាទំនាស់ ឬមួយអនុវត្តច្បាប់អី អាហ្នឹងត្រូវទទួលខុសត្រូវចំពោះមុខការគ្រប់គ្រងវៀតណាម ហើយសួរខ្ញុំម៉េចដឹង! ទាល់តែសួរស្ថានទូតវៀតណាម ឬមួយទៅអាជ្ញាធរវៀតណាម បានត្រូវ!»
ចំណែក អ្នកនាំពាក្យក្រសួងការបរទេស លោក កុយ គួង មានប្រសាសន៍ដែរថា កម្ពុជាមិនអាចជួយអន្តរាគមន៍បានទេ ។
លោកថា៖ «កាលណានៅលើទឹកដីគេ មានន័យថា យើងមិនអាចធ្វើអីបានទេ វាជាកិច្ចការផ្ទៃក្នុងរបស់ប្រទេសគេ»។
អគ្គលេខាធិការសមាគមខ្មែរកម្ពុជាក្រោម ដើម្បីអភិវឌ្ឍន៍ និងសិទ្ធិមនុស្ស លោក សឺន ជុំជួន មានប្រសាសន៍ថា សមាគមនឹងធ្វើលិខិតដាក់ទៅរដ្ឋាភិបាលកម្ពុជា និងទៅស្ថានទូតវៀតណាមប្រចាំកម្ពុជា ឱ្យដោះលែងពលរដ្ឋខ្មែរម្នាក់ដែលអាជ្ញាធរវៀតណាមបានចាប់ខ្លួន និងឱ្យឈប់ធ្វើទុក្ខបុកម្នេញពលរដ្ឋខ្មែរទៀត។ លោកបន្តថា ប្រសិនបើអាជ្ញាធរវៀតណាមនៅតែមិនព្រមដោះលែងពលរដ្ឋខ្មែរក្រោម សមាគមនឹងប្ដឹងទៅអង្គការសហប្រជាជាតិ ដើម្បីឱ្យជួយអន្តរាគមន៍ចំពោះរឿងនេះ។
លោកថា៖ «ធ្វើជាសេចក្ដីថ្លែងការណ៍រួមមួយក្នុងនាមជាអង្គការសមាគមខ្មែរក្រោម ទី២ យើងអាចចេញជាញតិ្តមួយដាក់ទៅខាងអង្គការសហប្រជាជាតិ ហើយនិងអន្តរាគមន៍ទៅខាងរដ្ឋាភិបាលវៀតណាម»។
វីអូឌីមិនអាចទាក់ទងស្ថានទូតវៀតណាម ដើម្បីឆ្លើយតបនឹងបញ្ហានេះបានទេ នៅថ្ងៃទី០៩ ខែមិថុនានេះ។
កាលពីថ្ងៃទី៥ ខែឧសភា ឆ្នាំ២០២០ ប្រជាពលរដ្ឋខ្មែរកម្ពុជាក្រោម ១៤៥គ្រួសារ ស្ថិតនៅភូមិហ្វក (ប៉ប្រក់) ឃុំភូមី (ប៉ប្រក់) ស្រុកយ៉ាងថាន់ (ព្រៃមេង) ខេត្តកៀងយ៉ាង (ក្រមួនស) ផ្ទុះការតវ៉ាម្តងរួចមកហើយនៅលើដីមានជម្លោះ ហើយប៉ះទង្គិចដោយហិង្សាជាមួយអាជ្ញាធរវៀតណាម ដែលបណ្ដាលឱ្យពលរដ្ឋខ្មែរក្រោម ជាង ១០នាក់ រងរបួសធ្ងន់ និងស្រាល។
បើតាមពលរដ្ឋខ្មែរកម្ពុជាក្រោមអះអាងថា ពួកគេបានអាស្រ័យផលលើដីទំហំជាង ៣០០ហិកតានោះ ដោយពួកគាត់កាន់កាប់ និងអាស្រ័យផល តាំងពីអំឡុងទសវត្សរ៍ឆ្នាំ១៩៧០ ហើយអ្នកខ្លះថា ទទួលបានជាកេរចែកឱ្យពីដូនតាជំនាន់មុន៕
