សាលារាជធានីភ្នំពេញ ព្រមានផ្សព្វផ្សាយឈ្មោះពលរដ្ឋជាម្ចាស់អាជីវកម្មលើបណ្តាញសង្គម ឬប្រព័ន្ធផ្សព្វផ្សាយផ្សេងៗ ឬបិទអាជីវកម្ម ចំពោះពលរដ្ឋដែលយឺតយ៉ាវក្នុងការបង់ថ្លៃប្រមូលសំរាម។
សាលារាជធានីភ្នំពេញបានចេញសេចក្តីជូនដំណឹងនៅថ្ងៃទី៨ ខែមិថុនា រំលឹកដល់ប្រជាពលរដ្ឋម្ចាស់អាជីវកម្ម សេវាកម្ម និងស្ថាប័នឯកជនផ្សេងទៀត ដែលពុំទាន់បានទូទាត់បំណុលសរុបនៃថ្លៃប្រមូលសំរាម និងសំណល់រឹង ត្រូវប្រញាប់ទៅបង់ជូនរដ្ឋបាលសាលារាជធានីភ្នំពេញ។
សាលារាជធានីភ្នំពេញ ព្រមានថា ប្រសិនបើប្រជាពលរដ្ឋម្ចាស់អាជីវកម្ម សេវាកម្ម និងស្ថាប័នឯកជនទាំងនោះ បន្តខកខានបង់ថ្លៃប្រមូលសំរាមទៀត នឹងត្រូវចាត់វិធានការដូចជា បញ្ចេញឈ្មោះតាមបណ្តាញសង្គម ឬប្រព័ន្ធផ្សព្វផ្សាយនានា និងត្រូវអនុវត្តវិធានការរដ្ឋបាលដោយបិទអាជីវកម្ម ឬសេវាកម្មបណ្តោះអាសន្ន រួមទាំងអនុវត្តវិធានការផ្សេងៗតាមការចាំបាច់៕
