សមត្ថកិច្ចខេត្តបន្ទាយមានជ័យ អះអាងថា យ៉ាងហោចណាស់មនុស្ស ៤នាក់ស្លាប់ និងជាង ១០នាក់ទៀត ត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្ត ក្រោយពេលពួកគេពិសាស្រាថ្នាំចិនសែ។
អធិការនគរបាលស្រុកម៉ាឡៃ លោក បេន សំអាន ប្រាប់វីអូឌី នាព្រឹកថ្ងៃនេះថា មនុស្ស ៣នាក់ បានស្លាប់ ហើយ ៣នាក់ទៀតកំពុងសម្រាកព្យាបាលនៅមន្ទីរពេទ្យអង្គបុរី ស្រុកម៉ាឡៃ កាលពីម្សិលមិញ ក្រោយពេលពួកគេទាំងនោះ ពិសាស្រាថ្នាំចិនសែដែលត្រូវបានច្រកដាក់ក្នុងដបដែលបិទស្លាកយីហោថា តាំងគួយ។
ស្នងការនគរបាលខេត្តបន្ទាយមានជ័យ លោក អាត់ ខែម បានឱ្យដឹងនៅថ្ងៃនេះថា តាមការស្រាវជ្រាវបឋម គឺមានកម្មករសំណង់ចំនួន ៦នាក់ នៅស្រុកម៉ាឡៃ និងប្រជាពលរដ្ឋ ១១នាក់ នៅក្រុងប៉ោយប៉ែត បាននាំគ្នាទៅទិញស្រាថ្នាំចិនសែ តាំងគួយ មកពិសាកាលពីល្ងាចថ្ងៃចន្ទ និងថ្ងៃអង្គារម្សិលមិញនេះ។
លោកបន្តថា ក្រោយពេលពិសាស្រាថ្នាំចិនសែនោះ ធ្វើឱ្យមនុស្ស ៤នាក់ស្លាប់ ហើយ ១១នាក់ផ្សេងទៀត ត្រូវបានបញ្ជូនទៅព្យាបាលនៅមន្ទីរពេទ្យខេត្ត។
លោក អាត់ ខែម ប្រាប់ថា៖ «តួលេខរហូតមកដល់ម៉ោងនេះ ឃើញថា ស្លាប់ ៤នាក់។ ក្រៅពីហ្នឹង យើងកំពុងតែជួយសង្គ្រោះអ្នកដែលរបួសធ្ងន់ និងស្រាល ១១នាក់ នៅមន្ទីរពេទ្យ នៅខាងមង្គលបុរីផង និងខាងប៉ោយប៉ែតផង»។
ស្នងការរូបនោះបញ្ជាក់ថា បច្ចុប្បន្ននេះ សមត្ថកិច្ចបានចុះស្រាវជ្រាវសួរនាំម្ចាស់តូបលក់ស្រាថ្នាំ និងរឹបអូសវត្ថុតាង រួមទាំងស្រានោះមកឱ្យមន្ត្រីជំនាញ និងមន្រ្តីមន្ទីរសុខាភិបាលខេត្ត យកទៅធ្វើកោសលវិច័យនៅរាជធានីភ្នំពេញ នាព្រឹកថ្ងៃនេះ ដើម្បីចង់ដឹងថា ស្រានោះមានសារធាតុពុលដែរ ឬយ៉ាងណា។
ទោះជាយ៉ាងណា អធិការនគរបាលស្រុកម៉ាឡៃ និងស្នងការខេត្ត បានអះអាងប្រហាក់ប្រហែលគ្នាថា សមត្ថកិច្ចមិនទាន់កំណត់មុខសញ្ញានៃប្រភពនាំចូលធំ និងទីតាំងផលិតស្រាថ្នាំចិនសែនោះនៅឡើយទេ ប៉ុន្តែ លោកថា សមត្ថកិច្ចនឹងបន្តស្រាវជ្រាវរកទីតាំងផលិត ដើម្បីចាត់វិធានការច្បាប់។
វីអូឌី មិនអាចសុំការបំភ្លឺពីប្រធានមន្ទីរសុខាភិបាលខេត្ត លោក ឡេ ចាន់សង្វាត បានទេនៅព្រឹកថ្ងៃនេះ។
នាយកប្រតិបត្តិនៃអង្គការចលនា ដើម្បីសុខភាពកម្ពុជា លោក មុំ គង់ មានប្រសាសន៍ថា រដ្ឋាភិបាលត្រូវបង្កើតច្បាប់គ្រប់គ្រងគ្រឿងស្រវឹង ទើបកាត់បន្ថយមិនឱ្យមានផលប៉ះពាល់សុខភាពអ្នកប្រើប្រាស់ និងសង្គមជាតិ។
លោក មុំ គង់ មានប្រសាសន៍ថា៖ «គួរតែមានច្បាប់មួយសម្រាប់គ្រប់គ្រងការចរាចរ ការផ្សាយពាណិជ្ជកម្ម ការប្រើប្រាស់គ្រឿងស្រវឹងទាំងអស់តែម្តង ហើយច្បាប់ហ្នឹង ខ្ញុំគិតថា មិនមានគោលបំណងដូចការបំផុសខ្លះថា កាលណាចេញច្បាប់ហ្នឹងហើយ យើងអត់អាចលក់គ្រឿងស្រវឹងបាន ឬក៏មិនអាចប្រើប្រាស់គ្រឿងស្រវឹងបាន មិនអ៊ីចឹងទេ គ្រាន់តែធ្វើឱ្យការលក់ ការផលិត ការប្រើប្រាស់ ស្ថិតនៅក្នុងក្របខ័ណ្ឌមួយដែលផ្តល់ផលប៉ះពាល់តិចតួច ក៏ដូចជាសង្គមទាំងមូល»៕