សមត្ថកិច្ចកំពុងសាកសួរម្ចាស់តូបលក់ស្រាថ្នាំចិនសែមួយកន្លែង បន្ទាប់ពីមនុស្ស ៣នាក់បានស្លាប់ និងមួយចំនួនទៀត ត្រូវបានបញ្ជូនទៅសម្រាកព្យាបាលនៅមន្ទីរពេទ្យ ក្រោយពីពួកគេពិសាស្រាថ្នាំនោះ។
អធិការនគរបាលស្រុកម៉ាឡៃ លោក បេន សំអាន ប្រាប់វីអូឌីនាព្រឹកថ្ងៃនេះថា កាលពីម្សិលមិញ មនុស្ស ៣នាក់ស្លាប់ និង ៣នាក់ទៀតកំពុងសម្រាកព្យាបាលនៅមន្ទីរពេទ្យអង្គបុរី ស្រុកម៉ាឡៃ ខេត្តបន្ទាយមានជ័យ ក្រោយពីពួកគេទាំងនោះ ពិសាស្រាថ្នាំចិនសែ។
លោកបញ្ជាក់ថា នៅព្រឹកថ្ងៃនេះ សមត្ថកិច្ចបានចុះស្រាវជ្រាវរកប្រភពដែលចែកចាយថ្នាំចិនសែ និងកំពុងសាកសួរម្ចាស់តូបលក់ស្រាថ្នាំចិនសែនមួយកន្លែងនៅស្រុកម៉ាឡៃ ខេត្តបន្ទាយមានជ័យ នៅក្បែរកន្លែងកើតហេតុផងដែរ។ លោកបន្តថា ក្រោយពីសាកសួរ លោកនឹងសុំគោលការណ៍ថ្នាក់លើ ដើម្បីបន្តនីតិវិធីទៅមុខទៀត។
លោក បេន សំអាន ប្រាប់ថា៖ «ខ្ញុំកំពុងធ្វើការសាកសួរបានមួយនាក់ សាកសួរទៅអ្នកលក់ដែលជនរងគ្រោះគាត់ទិញហូបបណ្តាលឱ្យពុល ប៉ុន្តែ គាត់លក់នៅតូបតូចតាច គាត់ទិញតពីគេយកមកលក់ដែរ»។
ទោះជាយ៉ាងណា អធិការនគរបាលស្រុកម៉ាឡៃរូបនេះ អះអាងថា សមត្ថកិច្ចមិនទាន់កំណត់មុខសញ្ញានៃប្រភពនាំចូលធំ និងទីតាំងផលិតស្រាថ្នាំចិនសែនោះនៅឡើយទេ ប៉ុន្តែ លោកថា សមត្ថកិច្ចនឹងបន្តស្រាវជ្រាវរកទីតាំងផលិត ដើម្បីចាត់វិធានការច្បាប់៕
