ពលរដ្ឋ ៣នាក់បងប្អូននៅស្រុកស្រែអំបិល ខេត្តកោះកុង សុំពន្យារពេលចូលបំភ្លឺនៅតុលាការពាក់ព័ន្ធសំណុំរឿងជម្លោះដីធ្លីជាមួយមន្ទីរបរិស្ថាន និងអង្គការការពារសត្វព្រៃមួយនៅខេត្តកោះកុង ក្រោយពីឪពុកបានជាប់ពន្ធនាគារជិត ១ឆ្នាំ ពាក់ព័ន្ធករណីនេះដែរ។
លោក ចេត ប៊ុន អាយុ ៦៥ឆ្នាំ ជាឪពុកបង្កើតរបស់ពលរដ្ឋទាំង ៣នាក់នោះ ត្រូវបានតុលាការកោះកុងសម្រេចឃុំខ្លួនបណ្តោះអាសន្ននៅពន្ធនាគារខេត្ត កាលពីខែសីហា ឆ្នាំ២០១៩ ក្រោមការចោទថា បានរុករានដីព្រៃក្នុងតំបន់ការពារ ដែលធ្វើឡើងតាមបណ្តឹងរបស់មន្ទីរបរិស្ថាន និងអង្គការសម្ព័ន្ធមិត្តសត្វព្រៃ (Wildlife Alliance Cambodia)។
កាលពីថ្ងៃទី២០ ខែឧសភា ឆ្នាំ២០២០ ចៅក្រមស៊ើបសួរនៃសាលាដំបូងខេត្តកោះកុង លោក គង់ ខេមរា បានបង្គាប់ឱ្យពលរដ្ឋបីនាក់បងប្អូន រួមមាន លោក ប៊ុន ឆាន អ្នកស្រី ប៊ុនហៀង និងអ្នកស្រី ប៊ុនឡា ដែលជាកូនរបស់លោក ចេត ប៊ុន រស់នៅភូមិតាធង ឃុំដងពែង ឱ្យចូលបំភ្លឺនៅថ្ងៃស្អែកនេះ ក្រោមការចោទថា បានកាប់រុករានដីព្រៃ និងសាងសង់ផ្ទះថ្មីខុសច្បាប់នៅក្នុងតំបន់ការពារធម្មជាតិ ដើម្បីយកធ្វើជាកម្មសិទ្ធិ ដែលបានប្រព្រឹត្តកាលពីខែតុលា ឆ្នាំ២០១៩។
ប៉ុន្តែ ក្នុងលិខិតមួយចុះថ្ងៃទី៧ ខែមិថុនា ផ្ញើជូនលោក គង់ ខេមរា ចៅក្រមស៊ើបសួរនៃសាលាដំបូងខេត្តកោះកុង គឺពលរដ្ឋទាំងបីនាក់នោះ សុំពន្យារពេលចូលបំភ្លឺតាមកាលកំណត់ ដោយថា ពួកគេមិនបានត្រៀមខ្លួន និងពុំទាន់រកមេធាវីមកការពារបាននៅឡើយ។
លោក ប៊ុន ឆាន ប្រាប់វីអូឌីថា ករណីពួកគាត់សុំពន្យារពេលចូលទៅបំភ្លឺនៅតុលាការនេះ មិនមែនដើម្បីគេចវេះនោះទេ គឺដោយសារគ្រួសារលោកមិនទាន់រកមេធាវីការពារក្តីបាននៅឡើយ។
លោកថា ករណីតុលាការកោះហៅរូបលោក និងបងប្អូនស្រីពីរនាក់ទៀតឱ្យចូលបំភ្លឺនេះ វាជារឿងអយុត្តិធម៌មួយ និងមានចេតនាចង់ធ្វើបាបគ្រួសាររបស់លោក ដោយថា លោកមិនបានទៅរុករានដីព្រៃដូចការចោលប្រកាន់ឡើយ។
លោក ប៊ុន ធាន បន្ថែមថា៖ «គេមានចេតនាធ្វើបាបក្រុមគ្រួសារខ្ញុំតែម្តង ពីព្រោះជាក់ស្តែងបងប្អូនខ្ញុំបីនាក់នេះ អត់បានទៅធ្វើផ្ទះថ្មី អត់បានទៅកាប់ព្រៃដូចគេចោទប្រកាន់ឡើយ។ អង្គការវ៉ាយអេដ បានប្តឹងពួកខ្ញុំទៅតុលាការដំបូង។ តុលាការឱ្យពួកខ្ញុំចូលទៅបំភ្លឺថ្ងៃទី១១នេះ ប៉ុន្តែ ពួកខ្ញុំដាក់ពន្យារ ដើម្បីរកមេធាវីមកជួយការពារ ព្រោះរឿងនេះ វាអយុត្តិធម៌ចំពោះពួកខ្ញុំទាំងបីនាក់ដែលជាកូនរបស់លោក ចេត ប៊ុន ដែលគេបានចាប់ឃុំឃាំងរួចហើយនោះ»៕
មន្ត្រីមន្ទីរបរិស្ថានខេត្តកោះកុង លោក ម៉ន ផល្លា មានប្រសាសន៍ថា មន្ទីរបរិស្ថានប្តឹងគ្រួសាររបស់លោក ចេត ប៊ុន ទៅតុលាការ ដោយសារតែគ្រួសារលោក ចេត ប៊ុន បានចូលឈូសឆាយដីព្រៃក្នុងតំបន់អភិរក្សដើម្បីចាប់យកជាកម្មសិទ្ធិ។
លោក ម៉ន ផល្លា មានប្រសាសន៍ថា៖ «រឿងផ្តន្ទាទោស វាអាស្រ័យលើតុលាការគាត់ជាអ្នកស្រាវជ្រាវ និងសម្រេច។ ខ្ញុំអស់សមត្ថកិច្ចចាត់ការលើរឿងហ្នឹងទៀតហើយ»។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូប្រចាំខេត្តកោះកុង លោក ប៉ែន វុទ្ធា ប្រាប់ថា អង្គការរបស់លោកមិនទាន់ស្រាវជ្រាវបានច្បាស់លាស់នៅឡើយទេអំពីករណីនេះ។
ប៉ុន្តែ មន្ត្រីសិទ្ធិមនុស្សរូបនេះស្នើឱ្យតុលាការចុះស្រាជ្រាវ ឬស៊ើបអង្កេតឱ្យបានច្បាស់លាស់ ចៀសវាងការសម្រេចខុសណាមួយ ធ្វើឱ្យប៉ះពាល់ដល់សិទ្ធិរបស់ពលរដ្ឋ។
លោក ប៉ែន វុទ្ធា និយាយថា៖ «ព្រោះយើងដឹងហើយថា ក្រុមគ្រួសាររបស់គាត់បានធ្វើការស្នើសុំទៅអាជ្ញាធរ ដើម្បីធ្វើការកាត់ឆ្វៀលកាត់ដីចម្ការរបស់គាត់មួយចំនួនដែលកំពុងមានទំនាស់ជាមួយខាងអង្គការសម្ព័នមិត្តសត្វព្រៃដែលធ្វើការការពារនៅតំបន់នោះ។ អ៊ីចឹងហើយរឿងនេះ តុលាការគួរតែពិចារណាឱ្យបានល្អិតល្អន់ មុនការវិនិច្ឆ័យ ឬការសម្រេចណាមួយ»។
កាលពីខែសីហា ឆ្នាំ២០១៩ មន្ទីរបរិស្ថានខេត្តកោះកុង ចេញសេចក្តីប្រកាសព័ត៌មានមួយ ដោយចោទលោក ចេត ប៊ុន ថាបានរុករាន និងឈូសឆាយចូលដីព្រៃតំបន់ការពារធម្មជាតិទំហំ ០.៣៥ហិកតា មកធ្វើជាកម្មសិទ្ធិ ស្ថិតក្នុងភូមិតាធង ឃុំដងពែង ស្រុកស្រែអំបិល។
មន្ទីរបរិស្ថាន បញ្ជាក់ថា លោក ចេត ប៊ុន ធ្លាប់បានស្នើសុំកាត់ឆ្វៀលដីទំហំ ១០ហិកតាចេញពីតំបន់ការពារ ក្នុងនោះដីទំហំ ៤ហិកតាបានអាស្រ័យផល និងសង់លំនៅដ្ឋាន ដោយពុំមានការហាមឃាត់ពីអាជ្ញាធរឡើយ ខណៈដីទំហំ ៦ហិកតាទៀត ត្រូវបានអាជ្ញាធរហាមឃាត់ជាច្រើនដង ប៉ុន្តែ លោក ចេត ប៊ុន មិនស្តាប់ នៅតែបន្តរុករានទៀត ទើបមានវិធានការបែបនេះ៕