រដ្ឋមន្ត្រីក្រសួងមហាផ្ទៃ លោក ស ខេង ប្រាប់មន្ត្រីក្រោមឱវាទកុំឱ្យមើលស្រាលបញ្ហាអយុត្តិធម៌សង្គម ខណៈលោករកឃើញថា យន្តការដោះស្រាយពាក្យបណ្តឹងនានានៅមានកម្រិតនៅឡើយ។
តាមគេហទំព័រផ្លូវការរបស់ក្រសួង លោក ស ខេង ក្នុងកិច្ចប្រជុំឆ្លងផែនការសកម្មភាពប្រចាំឆ្នាំ២០២០ នៅរាជធានីភ្នំពេញ នាថ្ងៃទី៩ ខែមិថុនា បានប្រាប់មន្ត្រីពាក់ព័ន្ធថា ការដោះស្រាយបណ្តឹង មានបញ្ហាខ្លះត្រូវបានដោះស្រាយ តែខ្លះទៀតដែលថាលោកបញ្ជូនទៅ មិនទាន់បានដោះស្រាយនៅឡើយ។
មេដឹកនាំបក្សកាន់អំណាចរូបនេះ និយាយទៀតថា ដើម្បីតាមដាន និងដោះស្រាយបញ្ហាដែលប្រមូលបានដោយយុត្តិធម៌ មន្ត្រីពាក់ព័ន្ធត្រូវប្រកាន់គោលការណ៍មិនលម្អៀង។
លោក ស ខេង និយាយថា ការស្រាវជ្រាវណាមួយបែបលម្អៀង នឹងមិនអាចរកយុត្តិធម៌បានឡើយ ហើយថា «បញ្ហាអយុត្តិធម៌នេះ គឺមិនអាចមើលស្រាលបានឡើយ ទោះក្នុងសង្គមណាក៏ដោយ»។
លោក ស ខេង ក្រើនរំឭកទៀតថា៖ «តម្កល់ផលប្រយោជន៍ជាតិជាធំ ទើបអាចបញ្ចៀសភាពអសកម្ម ភាពមិនប្រក្រតី និងអយុត្តិធម៌សង្គមបាន»។
នាយករងអង្គការលីកាដូ លោក អំ សំអាត ហៅសារនយោបាយនេះថា មានសារសំខាន់ បើមន្ត្រីអនុវត្តតាម ប៉ុន្តែ លោកថា ប៉ុន្មានឆ្នាំមកនេះ សិទ្ធិមនុស្ស និងសិទ្ធិនយោបាយ បានធ្លាក់ចុះគួរឱ្យព្រួយបារម្ភ។
អ្នកឃ្លាំមើលសិទ្ធិមនុស្សរូបនេះ និយាយថា សារនេះអាចជោគជ័យទៅបាន វាទាល់តែមេដឹកនាំធ្វើជាគំរូ ដើម្បីឱ្យមន្ត្រីមើលឃើញថា ខ្លួនពិតជាមនុស្សឯករាជ្យមិនជ្រកក្រោមឥទ្ធិពលគណបក្សណាមួយ។
លោក អំ សំអាត ប្រាប់ថា៖ «អាជ្ញាធរថ្នាក់ក្រោមជាតិអនុវត្តអនុសាសន៍របស់សម្តេចក្រឡាហោម ស ខេង នេះបាន វាលុះណាតែមានគោលការណ៍រួមរបស់ថ្នាក់ដឹកនាំ បានន័យថាថ្នាក់ដឹកនាំធ្វើជាគំរូ ហើយជំរុញឱ្យមានការអនុវត្ត»។
កាលពីថ្ងៃទី៩ ខែមករាដើមឆ្នាំនេះ ក្នុងពិធីមួយនៅខេត្តបាត់ដំបង លោក ស ខេង ក៏បាននិយាយដែរថា៖ «តាមបទពិសោធន៍ជាប្រវត្តិសាស្ត្រមក សង្គមដែលបែកបាក់នៅស្រុកណាក៏ដោយ គឺកើតចេញពីអយុត្តិធម៌»។
អ្នកវិភាគនយោបាយ លោក ឯម សុវណ្ណរ៉ា និយាយថា ក្នុងក្របខ័ណ្ឌនយោបាយ បើបក្សកាន់អំណាចមិនអាចបំពេញតម្រូវការសង្គមបានទេ វានឹងបាត់បង់ការគាំទ្រ។
លោកថា ក្នុងសង្គមប្រជាធិបតេយ្យ គណបក្សមួយបាត់បង់ការគាំទ្រ វាស្មើនឹងបាត់បង់អំណាច។ លោកថា បក្សកាន់អំណាចទំនងជាបារម្ភពីបញ្ហានេះ ខណៈមិនទាន់ស្តារទំនុកចិត្តម្ចាស់ឆ្នោតជាង ៤០ភាគរយ ដែលគាំទ្របក្សប្រឆាំង ក្រោយមានការរំលាយ។
លោក ឯម សុវណ្ណរ៉ា បង្ហាញការយល់ឃើញថា ជម្រើសជោគជ័យដែលជាយន្តការធានាដល់យុត្តិធម៌សង្គម វាលុះណាតែបក្សកាន់អំណាចវិលទៅស្តារប្រជាធិបតេយ្យឡើងវិញ ដូចដែលសហភាពអឺរ៉ុបកំពុងជំរុញ។
លោក ឯម សុវណ្ណរ៉ា ប្រាប់ថា៖ «បើសិនជាគណបក្សកាន់អំណាចអាចឆ្លើយតបបាន ហាក់ដូចបានឆ្លើយតបទៅនឹងសម្តីដែលលោកឧបនាយករដ្ឋមន្ត្រី ស ខេង លើកឡើងអ៊ីចឹង បានន័យថា វាបានគិតគូពីសេវាពលរដ្ឋ និងបញ្ហាសង្គមដូចគ្នា ប្រសិនបើអត់អាចឆ្លើយតបបានទេ សហគមន៍អឺរ៉ុបដែលគេដាក់សម្ពាធ វាជះឥទ្ធិពលដល់ពលរដ្ឋ ហើយវាជះឥទ្ធិពលទៅរដ្ឋាភិបាលវិញ គឺវាបាត់បង់ជំនឿ និងការគាំទ្រនេះឯង»។
អង្គការគម្រោងយុត្តិធម៌ពិភពលោក (World Justice Project) បានចេញរបាយការណ៍កាលពីឆ្នាំ២០១៩ វាយតម្លៃថា ប្រព័ន្ធយុត្តិធម៌កម្ពុជាស្ថិតនៅជិតបាតតារាងក្នុងចំណោមប្រទេស ១១៣ លើពិភពលោក។ របាយការណ៍ដដែលក៏បានបញ្ជាក់ដែរថា ចំណាត់ថ្នាក់យុត្តិធម៌ធ្លាក់នេះ ដោយសារតែមានការជ្រៀតជ្រែកពីរដ្ឋាភិបាល៕
