អ្នកភូមិអះអាងថា ពលរដ្ឋ ៣នាក់ត្រូវបានអាជ្ញាធរខេត្តក្រចេះចាប់ឃុំខ្លួន និងយកគ្រឿងចក្រមកឈូសឆាយផ្ទះពួកគេ បន្ទាប់ពីពលរដ្ឋទាំងនោះ មិនព្រមលក់ដីឱ្យក្រុមហ៊ុនឯកជនមួយ ស្ថិតក្នុងឃុំស្វាយជ្រះ ស្រុកស្នួល។
អ្នកស្រី សេង ស្រីស្រស់ អាយុ ២៩ឆ្នាំ រៀបរាប់ប្រាប់វីអូឌីតាមទូរសព្ទថា សមត្ថកិច្ចចម្រុះប្រហែល ៥០នាក់ មានទាំងកម្លាំងប៉េអឹម និងនគរបាលប្រដាប់ដោយកាំភ្លើង និងអាជ្ញាធរស្លៀកពាក់ស៊ីវិលផង បានចុះទៅចាប់ខ្លួនឪពុករបស់គាត់ និងអ្នកភូមិ ២នាក់ផ្សេងទៀត បញ្ជូនទៅតុលាការ កាលពីថ្ងៃទី១ ខែមិថុនា។
អ្នកភូមិរូបនេះ បន្តថា កាលពីម្សិលមិញនេះ អាជ្ញាធរទាំងនោះបានចុះមកម្តងទៀត អមដោយគ្រឿងចក្រជាច្រើនគ្រឿងរបស់ក្រុមហ៊ុន ឬទ្ធីក្រានីត (TITHY GRANTE CAMBODIA CO., LTD) របស់លោក ឡេង ឬទ្ធី ចូលទៅឈូសឆាយដី និងផ្ទះរបស់ប្រជាពលរដ្ឋចំនួន ៣ខ្នង ដើម្បីយកដីឱ្យក្រុមហ៊ុនដាក់ថ្មក្រានីត។
អ្នកស្រី ស្រីស្រស់ អះអាងថា មុនចាប់ខ្លួនឪពុក និងអ្នកភូមិ ២នាក់នោះ គឺតំណាងក្រុមហ៊ុនបានព្យាយាមមកសុំទិញដីក្នុងតម្លៃថោកៗ ដោយលើកទី១ ឱ្យតម្លៃ ១ហិកតា ៧០០ដុល្លារ លើកទី២ តម្លៃ ២,៥០០ដុល្លារ ប៉ុន្តែ ឪពុកអ្នកស្រី និងអ្នកភូមិ ២នាក់ទៀត មិនព្រមលក់ ដោយចង់បានតម្លៃខ្ពស់ជាងនេះ ក្រោយមកក៏មានការចាប់ខ្លួនតែម្តង។
អ្នកស្រី ស្រីស្រស់ ប្រាប់ថា៖ «សុំទិញបីដង តែប៉ាខ្ញុំអត់លក់ឱ្យ។ ប៉ាខ្ញុំដើរចេញ គេឱ្យ ២,៥០០ ក៏ប៉ាអត់លក់ឱ្យដែរ។ ក្រោយមក គេឱ្យប៉ាខ្ញុំទូរសព្ទប្រាប់គេថា គាត់លក់ប៉ុន្មានៗ ប៉ុន្តែ ប៉ាខ្ញុំអត់ទូរសព្ទទៅទេ។ ដល់លើកទី៤ គេឱ្យប៉ូលិសមកចាប់ប៉ាខ្ញុំ និងអ្នកជិតផ្ទះខ្ញុំ ២នាក់តែម្ដង ហើយពួកខ្ញុំក៏អត់ដឹងគេមកចាប់ប៉ាខ្ញុំដែរ»។
អ្នកស្រី សេង ស្រីស្រស់ អះអាងថា ដីចំការដែលគ្រួសារអ្នកស្រីកំពុងកាន់កាប់ និងអាស្រ័យផលនោះ គឺបានទិញបន្តពីអ្នកភូមិតាំងពីឆ្នាំ២០១០ ដោយមានអាជ្ញាធរមូលដ្ឋានទទួលស្គាល់ត្រឹមត្រូវ។ អ្នកស្រីថា ដីដែលក្រុមហ៊ុនចង់បាននោះ គឺមានរ៉ែច្រើនប្រភេទ ដូចជា រ៉ែមាស និងថ្មម៉ាប់ជាដើម។
បើតាមអ្នកស្រី ស្រីស្រស់ គឺអំឡុងពេលសមត្ថកិច្ចចាប់ឪពុកគាត់ និងពេលអាជ្ញាធរយកគ្រឿងចក្រមកឈូសឆាយផ្ទះពលរដ្ឋម្សិលមិញនេះ ក៏មានទូរសព្ទបង្ខំឱ្យលក់ដីនោះផងដែរ ប៉ុន្តែ ម្តាយអ្នកស្រីនៅតែមិនព្រមលក់។
អ្នកភូមិម្នាក់ដែលដឹងហេតុការណ៍នេះដែរ អ្នកស្រី ឃឹង សុចិត្រា និយាយថា អំឡុងពេលចុះចាប់ពលរដ្ឋ ៣នាក់ និងចុះឈូសឆាយផ្ទះពលរដ្ឋនោះ គឺអាជ្ញាធរមិនឱ្យអ្នកភូមិចូលជិត ឬថតយករូបភាពនោះទេ ដោយគំរាមបាញ់ និងគំរាមចាប់ខ្លួន បើសិនពលរដ្ឋណាហ៊ានចេញមុខតវ៉ា។
អ្នកស្រី សុចិត្រា ប្រាប់ថា៖ «ក្រុមហ៊ុន ឡេង ឬទ្ធី ម្សិលមិញ គាត់បានយកគ្រឿងចក្រទៅដាក់លើដីពលរដ្ឋដែលចាប់ខ្លួនហ្នឹង ឡើងពេញតែម្ដង ហើយអ្នកណាចូលជិតក៏អត់បានដែរ ថតក៏អត់បានដែរ ឈរមើលក៏អត់បានដែរ ព័ទ្ធជុំវិញជិតតែម្ដង សុទ្ធតែប៉េអឹមប្រហែលជាង ៥០នាក់ឡើងលើហើយ។ បើកាំភ្លើងវិញ សុទ្ធតែបើកសោរ ហើយដាក់ឡើងលើទៀត។ តែអ្នកហ៊ានចូល គេគំរាមបាញ់មេជើង ឬក៏បាញ់តែម្ដង ប៉ុន្តែ ពុំមានការបាញ់អីទេ។ គេគ្រាន់តែគំរាម ប៉ុន្តែ គំរាមថា បើអ្នកណាហ៊ានចូល ដឹងតែបាញ់ហើយ គាត់ថាយើងប្រឆាំង»។
អភិបាលស្រុកស្នួល លោក គង់ គីមនី មានប្រសាសន៍ថា លោកមិនទាន់ដឹងអំពីព័ត៌មានចាប់ខ្លួនពលរដ្ឋនោះទេ ដោយថា វិធានការនេះ គឺអភិបាលរងខេត្តក្រចេះ លោក ខាន់ ចំណាន ជាអ្នកដឹកនាំកម្លាំងចុះអនុវត្ត។ ប៉ុន្តែ ករណីឈូសឆាយផ្ទះ និងដីរបស់ពលរដ្ឋ គឺដោយសារពលរដ្ឋធ្វើអាជីវកម្មរ៉ែខុសច្បាប់នៅតំបន់នោះ។
លោក គង់ គីមនី និយាយថា៖ «ក្រុមការងារដឹកនាំដោយឯកឧត្តម ខាន់ ចំណាន គាត់ចុះទៅធ្វើការងារពាក់ព័ន្ធទៅនឹងបញ្ហាតំបន់រ៉ែនៅតំបន់នោះ ពាក់ព័ន្ធក្បាលដីបងប្អូនប្រជាពលរដ្ឋ។ គាត់បានធ្វើអាជីវកម្មជីករ៉ែដោយខុសច្បាប់។ អ៊ីចឹងទេ ក្រុមការងារបានចុះទៅធ្វើការងាររឿងហ្នឹង ដើម្បីហាមគាត់ ឬក៏ណែនាំគាត់»។
វីអូឌីបានព្យាយាមសុំការឆ្លើយតបពីអភិបាលរងខេត្តក្រចេះ លោក ខាន់ ចំណាន ដែរ ប៉ុន្តែ ទូរសព្ទចូលច្រើនដង គ្មានអ្នកទទួល។
ចំណែក ប្រធានក្រុមប្រឹក្សាភិបាលក្រុមហ៊ុន ឬទ្ធីក្រានីត លោក ឡេង ឬទ្ធី ក៏មិនអាចសុំការបញ្ជាក់បានដែរ ដោយទូរសព្ទចូលច្រើនដង គ្មានអ្នកទទួល។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់ថា សមាគមរបស់លោកមិនទាន់ដឹងព័ត៌មាននេះទេ ប៉ុន្តែ លោកថា ប្រសិនដូចការលើកឡើងរបស់ពលរដ្ឋ គឺអាជ្ញាធរថ្នាក់ជាតិគួរតែទៅស្រាវជ្រាវ ឬត្រួតពិនិត្យលើការអនុវត្តច្បាប់សមត្ថកិច្ចនៅខេត្តក្រចេះ ដើម្បីរកឱ្យឃើញថា តើការចាប់ខ្លួន និងឈូសឆាយដីពលរដ្ឋនោះ ធ្វើឡើងត្រឹមត្រូវតាមផ្លូវច្បាប់ឬអត់។
លោក ស៊ឹង សែនករុណា ប្រាប់ថា៖ «ហើយប្រសិនបើមានការត្រួតពិនិត្យឃើញថា ករណីទាំងអស់ហ្នឹង ទាំងអាជ្ញាធរ និងក្រុមហ៊ុន បានប្រព្រឹត្តមិនត្រឹមត្រូវតាមច្បាប់ អ៊ីចឹងអាជ្ញាធរជាតិគួរចាត់វិធានការដើម្បីរកយុត្តិធម៌ជូនពលរដ្ឋ ហើយចាត់វិធានការ ត្រូវដាក់ពិន័យ ឬក៏ទោសទណ្ឌតាមផ្លូវច្បាប់ទៅអាជ្ញាធរ និងក្រុមហ៊ុនដែលបានរំលោភបំពានទៅលើច្បាប់ហ្នឹងផងដែរ ដើម្បីឱ្យប្រជាពលរដ្ឋ និងសាធារណជនជឿជាក់ទៅលើប្រព័ន្ធអនុវត្តច្បាប់ ឬក៏មានយុត្តិធម៌សង្គមឡើងវិញ»។
ក្នុងលិខិតមួយចុះថ្ងៃទី១៨ ខែធ្នូ ឆ្នាំមុន ដែលត្រូវបានផ្ញើទៅអភិបាលខេត្តក្រចេះ ក្រុមហ៊ុន ឬទ្ធីក្រានីត បានឱ្យដឹងថា ក្រុមហ៊ុនមួយនេះបានចុះកិច្ចព្រមព្រៀងធ្វើអាជីវកម្មថ្មក្រានីតជាមួយក្រសួងឧស្សាហកម្មរ៉ែ និងថាមពល ក្នុងទំហំដី ១២គីឡូម៉ែត្រក្រឡា ស្ថិតនៅតំបន់ឃុំស្វាយជ្រះ ស្រុកស្នួល ខេត្តក្រចេះ។
លិខិតដដែល ឱ្យដឹងថា ក្រោយមក ក្រុមហ៊ុន ឬទ្ធីក្រានីត បានប្រគល់ការគ្រប់គ្រងផ្ទៃដីមួយផ្នែកទៅឱ្យក្រុមហ៊ុន ខេមបូឌាន យាន ជីង មីនើរ៉ល (Cambodian Yuan Jing Mineral Co., Ltd) និងក្រុមហ៊ុន មឿង សុក (Meoung Sok Co., Ltd) សម្រាប់ធ្វើអាជីវកម្មថ្មក្រានីតបន្ត ដោយបច្ចុប្បន្ន ក្រុមហ៊ុន ឬទ្ធីក្រានីត កាន់កាប់លើដីទំហំ ៥៣៩, ៣៤ហិកតា សម្រាប់ធ្វើអាជីវកម្មថ្មក្រានីត។
លិខិតដដែលនេះ បានចោទប្រកាន់ថា មេឃុំស្វាយជ្រះ លោក ខៀវ សុខា ដែលអះអាងថា ជាតំណាងឱ្យប្រជាពលរដ្ឋ ៩២គ្រួសារ បានធ្វើលិខិតសុំទៅអភិបាលខេត្តកាត់ដីមួយផ្នែករបស់ក្រុមហ៊ុនបែងចែកទៅឱ្យប្រជាពលរដ្ឋនៅតំបន់នោះ ដោយមិនបានពិភាក្សាជាមួយតំណាងក្រុមហ៊ុន ឬភាគីពាក់ព័ន្ធឡើយ និងស្នើទៅអភិបាលខេត្តច្រានចោលសំណើនោះផងដែរ៕
