ចំនួនអ្នកស្លាប់ដោយសារពុលស្រានៅក្នុងខេត្តបន្ទាយមានជ័យ កើនដល់ចំនួន ៧នាក់ ខណៈចំនួនអ្នកធ្លាក់ខ្លួនឈឺដោយសារតែពុលស្រាដូចគ្នា មានចំនួន ២៧នាក់ កំពុងស្ថិតនៅក្នុងការសង្គ្រោះនៅមន្ទីរពេទ្យបង្អែកខេត្តនេះ។
ក្នុងទំព័រហ្វេសប៊ុករបស់ស្នងការដ្ឋាននគរបាលខេត្តបន្ទាយមានជ័យ ចុះផ្សាយកាលពីថ្ងៃទី១១ ខែមិថុនា ឆ្នាំ២០២០ ឱ្យដឹងថា ករណីពុលដោយសារពិសាស្រាស្លាកយីហោ តាំងគួយ អ្នកស្លាប់កើនដល់ ៧នាក់ និង ធ្លាក់ខ្លួនឈឺ ២៧នាក់។
ស្នងការដ្ឋាននគរបាលខេត្តបន្ទាយមានជ័យ អំពាវនាវទៅប្រជាពលរដ្ឋកុំពិសាស្រាថ្នាំចិនសែដែលមានស្លាកយីហោ តាំងគួយ ដោយសារ បច្ចុប្បន្ន សមត្ថកិច្ចកំពុងធ្វើការស្រាវជ្រាវ និងស៊ើបអង្កេតករណីនេះ។
របាយការណ៍ក្រសួងសុខាភិបាលបង្ហាញដែរថា ក្នុងអំឡុងឆ្នាំ២០១៩ ត្រឹមខែមីនា មានករណីពុលចំណីអាហារសរុបចំនួន ៦លើក ដោយមានអ្នកពុលសរុបចំនួន ២៤៦នាក់ ក្នុងនោះស្លាប់ ២នាក់ ខណៈក្នុងឆ្នាំ២០១៨ ករណីពុលចំណីអាហារ ១៩លើក អ្នកពុល ៨៥២នាក់ ហើយស្លាប់ ១៣នាក់ ក្នុងនោះ ពុលស្រា មាន ៥លើក អ្នកពុល ២០៦នាក់ ស្លាប់ ១២នាក់៕
