អង្គភាពប្រឆាំងអំពើពុករលួយ (ACU) ឱ្យប្រធានស្តីទី នៃមន្ទីរបរិស្ថានខេត្តព្រះវិហារ លោក សុខ ច័ន្ទសុជាតិ បំភ្លឺរឿងអំពើពុករលួយជាប្រព័ន្ធ រវាងមន្ត្រីក្រោមបង្គាប់របស់លោកធ្វើសកម្មភាពដោយផ្ទាល់ផង និងបើកដៃឱ្យឈ្មួញកាប់បំផ្លាញព្រៃឈើនៅក្នុងតំបន់ព្រៃឡង់ផង។
ក្នុងលិខិតមួយចុះថ្ងៃទី៨ ខែមិថុនា ឆ្នាំ២០២០ ដែលវីអូឌីទើបទទួលបាននៅថ្ងៃនេះ អង្គភាពប្រឆាំងអំពើពុករលួយបានឱ្យដឹងថា កាលពីថ្ងៃទី២៨ ខែមេសា អង្គភាពមួយនេះ ទទួលបានបណ្តឹងមួយ ដោយចោទប្រកាន់ថា មន្ត្រីមន្ទីរបរិស្ថានខេត្តព្រះវិហារ លោក សោម រដ្ឋា និងសហគមន៍ព្រៃឈើ បានឃុបឃិតគ្នាជាប្រព័ន្ធជាមួយឈ្មួញឈើខុសច្បាប់ និងអ្នកឈូសឆាយដីព្រៃខុសច្បាប់។
ACU បញ្ជាក់ថា ដើមបណ្តឹងបានលើកឡើងថា មន្ត្រីបរិស្ថានខេត្តព្រះវិហារលោក សោម រដ្ឋា និងសហគមន៍ព្រៃឈើបានឃុបឃិតគ្នាជាប្រព័ន្ធ ទារប្រាក់ពីឈ្មួញដឹកឈើចេញពីព្រៃឡង់ ក្នុងមួយគោយន្តចាប់ពី ៨ម៉ឺនរៀល ដល់ ១០ម៉ឺនរៀល រួមទាំងបានសហការយ៉ាងល្អជាមួយឈ្មួញឈើធំម្នាក់ឈ្មោះ ឡេង រស់នៅភូមិពើក ឃុំពុទ្រា ស្រុកជ័យសែន ដើម្បីនាំឈើទៅលក់ឱ្យឈ្មួញរូបនេះ។
លិខិតដដែលនេះ បន្តថា ប្រសិបើគោយន្តណាមិនមែនជាអ្នកដឹកឈើលក់ឱ្យឈ្មួញឈើឈ្មោះ ឡេង នោះទេ គឺមន្ត្រីបរិស្ថានមិនឱ្យដឹកចេញពីភូមិពើកឡើយ ទោះបីជាគោយន្តដឹកឈើនោះ បានបង់ប្រាក់ពេលចេញពីព្រៃរួចហើយក៏ដោយ គឺមន្ត្រីនៅតែចាប់ឱ្យបង់ប្រាក់ ១លានរៀលបន្ថែមទៀតដែរ។
បើតាមលិខិតដដែលនេះ ACU ក៏ទទួលបានព័ត៌មានថា មានបុគ្គលឈ្មោះ ឡេង និងបុគ្គលឈ្មោះ ឌី កំពុងតែត្រូវរ៉ូវគ្នាបើកដៃឱ្យក្រុមគោយន្តចូលទន្ទ្រានបំផ្លិចបំផ្លាញព្រៃឡង់ដោយសេរី ហើយគោយន្តទាំងនោះ បានចូលទៅអារឈើក្នុងមួយថ្ងៃ ៣ ទៅ ៤ជើង ដោយបុគ្គលឈ្មោះ ឌី ឈ្មោះ រឿន ឈ្មោះ ម៉េត និងឈ្មោះ យាយ លែន ជាអ្នកដើរប្រមូលទិញឈើពីអ្នកស្រុកដែលចុះទៅអារឈើក្នុងព្រៃជុំវិញភូមិទ្រា និងភូមិពើក ដោយបានសហការជាមួយមន្ត្រីបរិស្ថាន សហគមន៍ព្រៃឈើ និងមន្ត្រីប៉ុសិ៍្តនគរបាលនៅឃុំទ្រាផងដែរ។
ACU បន្ថែមទៀតថា ពាក់ព័ន្ធបទល្មើសព្រៃឈើនេះ ក៏មានបុគ្គលឈ្មោះ ឆាយ គឹមហូវ ដែលមានប្តីជាមន្ត្រីផ្នែករដ្ឋបាលព្រៃឈើ និងមានឡានសាំយ៉ុងចំនួន ២គ្រឿង និងឡានធំកង់១០ ចំនួន ២គ្រឿងទៀត កំពុងតែប្រតិបត្តិការជួញដូរឈើខុសច្បាប់នៅក្នុងតំបន់ព្រៃឡង់ផងដែរ។
ប្រធានស្តីទីមន្ទីរបរិស្ថានខេត្តព្រះវិហារ លោក សុខ ច័ន្ទសុជាតិ ប្រាប់វីអូឌីថា លោកមិនទាន់ផ្តល់ចម្លើយទៅACUនោះទេ ដោយថា លោកកំពុងរៀបចំឯកសារ ដើម្បីឆ្លើយតបលើករណីនេះ ប៉ុន្តែលោកមិនទាន់អាចបញ្ជាក់ពេលវេលានៃការឆ្លើយតបនៅឡើយទេ។
លោកបន្ថែមថា៖ «យើងកំពុងធ្វើការលើរឿងនេះ។ ចាំខ្ញុំមានចម្លើយហើយ និងធ្វើហើយឯកសារហើយ ខ្ញុំនឹងផ្ញើទៅកាន់ACUហើយ»។
វីអូឌីបានព្យាយាមសុំការបញ្ជាក់បន្ថែមពីអនុប្រធានអង្គភាពប្រឆាំងអំពើពុករលួយ លោក ឃាង សេង ដែរ ដោយទូរសព្ទចូលច្រើនដង គ្មានអ្នកទទួល។
ចំណែក មន្ត្រីមន្ទីរបរិស្ថានខេត្តព្រះវិហារ លោក សោម រដ្ឋា និងអ្នកដែលរងការចោទប្រកាន់ផ្សេងទៀត ក៏មិនទាន់អាចរកការឆ្លើយបំភ្លឺបានដែរពាក់ព័ន្ធករណីនេះ។
ប្រធានអង្គការអភិវឌ្ឍន៍សហគមន៍ដើម្បីសន្តិភាព និងនិរន្តរភាព ដែលធ្វើការជាមួយប្រជាសហគមន៍ជុំវិញព្រៃឡង់ លោក សេង សុខហេង មានប្រសាសន៍ថា ករណីអង្គភាពប្រឆាំងអំពើពុករលួយ ឱ្យមន្ត្រីបរិស្ថានខេត្តព្រះវិហារឆ្លើយបំភ្លឺពាក់ព័ន្ធរឿងពុករលួយពាក់ព័ន្ធបទល្មើសព្រៃឡង់នេះ វាសញ្ញាល្អមួយដើម្បីព្រមានដល់មន្ត្រីខិលខូចផ្សេងទៀត។
លោក សេង សុខហេង លើកឡើងថា តាមការស៊ើបអង្កេត និងស្រាវជ្រាវជាមួយអង្គការដៃគូដែលធ្វើផ្នែកធនធានធម្មជាតិ និងបរិស្ថាន គឺរកឃើញថា អាជ្ញាធរពាក់ព័ន្ធជាច្រើនបានឃុបឃិតគ្នាប្រព្រឹត្តអំពើពុករលួយជាប្រព័ន្ធក្នុងបទល្មើសព្រៃឈើជាយូរឆ្នាំមកហើយ។
លោកបន្ថែមថា៖ «ជារៀងរាល់ថ្ងៃ យើងតែងតែឃើញរថយន្ត គោយន្តកែច្នៃគ្រប់ប្រភេទ បានដឹកឈើចេញពីតំបន់ព្រៃឡង់។ អីចឹង ខ្ញុំគិតប្រសិនជាមិនមានការប្រព្រឹត្តអំពើពុករលួយ មិនមានការបើកភ្លើងខៀវពីអាជ្ញាធរពាក់ព័ន្ធឱ្យបទល្មើសព្រៃឈើក្នុងតំបន់ព្រៃឡង់ទាំងអស់ហ្នឹងទេ ពួកបទល្មើសទាំងអស់ហ្នឹង មិនអាចធ្វើចរាចរណ៍ ឬសកម្មភាពរបស់ខ្លួនដឹកឈើចេះពីតំបន់ព្រៃឡង់បានទេ។ ហើយខ្ញុំគិតថា មានមន្ត្រីជាច្រើនទៀតពាក់ព័ន្ធជាមួយបទល្មើសព្រៃឈើនេះ។ អីចឹងយើងចង់ឃើញACUអនុវត្តក្នុងខេត្តផ្សេងៗ ឬតំបន់ការពារផ្សេងទៀតដូចនៅព្រៃឡង់ដែរ»។
កាលពីខែកុម្ភៈ ឆ្នាំ២០២០ គណៈកម្មការជាតិដើម្បីទប់ស្កាត់ និងបង្រ្កាបបទល្មើសធនធានធម្មជាតិ អះអាងថា ក្នុងឆ្នាំ២០១៩ បានចាប់ និងបញ្ជូនខ្លួនអ្នកប្រព្រឹត្តបទល្មើសព្រៃឈើចំនួន ៥៩នាក់ទៅតុលាការ និងចាប់យកឈើចម្រុះជាង ៩ពាន់ម៉ែត្រគូប រួមទាំងរឹបអូសមធ្យោបាយដឹកជញ្ជូនឈើ ៤៩១គ្រឿង៕