អង្គការឃ្លាំមើលការបោះឆ្នោត ហៅ ខុមហ្វ្រែល រកឃើញថា ឆ្នាំទី១ នីតិកាលទី៦ នៃសភាឯកបក្សរបស់គណបក្សប្រជាជន មានតំណាងរាស្រ្តស្ត្រីតែម្នាក់គត់ ឡើងបញ្ចេញមតិក្នុងកិច្ចប្រជុំសភាពេញអង្គ។
សេចក្តីប្រកាសព័ត៌មាន បង្ហាញពីលទ្ធផលសង្កេត ចុះថ្ងៃទី១១ ខែមិថុនា ខុមហ្វ្រែល អះអាងថា តំណាងរាស្ត្រស្ត្រីដែលបានឡើងបញ្ចេញមតិក្នុងកិច្ចប្រជុំសភាពេញអង្គសម្រាប់ឆ្នាំទី១ នីតិកាលទី៦ ពីខែកញ្ញា ឆ្នាំ២០១៨ ដល់ខែសីហា ឆ្នាំ២០១៩ មានចំនួន ១នាក់ នៃតំណាងរាស្ត្រស្រ្តីសរុប ២៦នាក់។
ខុមហ្វ្រែល អះអាងទៀតថា តំណាងរាស្ត្រដែលបានឡើងបញ្ចេញមតិនោះ គឺលោកស្រី ឡោក ខេង តំណាងរាស្ត្រប្រចាំមណ្ឌលរាជធានីភ្នំពេញ។ ការឡើងបញ្ចេញមតិ១ដងនោះ ធ្វើឡើងក្នុងន័យវិជ្ជមាន ផ្តោតលើការពិភាក្សា និងអនុម័តសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រង ឆ្នាំ២០១៩។ ខុមហ្វ្រែល ក៏បានកត់សម្គាល់ទៀតថា ក្នុងឆ្នាំទី១ នីតិកាលទី៦ នៃរដ្ឋសភាឯកបក្សនេះ បញ្ហាស្ត្រី និងកុមារ មិនត្រូវបានលើកយកមកដាក់ក្នុងរបៀបវារៈនៃកិច្ចប្រជុំសភាពេញអង្គទេ។
តាមលទ្ធផលសង្កេតរបស់អង្គការដដែលនេះ ការឡើងបញ្ចេញមតិរបស់តំណាងដែលជាបុរសក៏នៅមានកម្រិតនៅឡើយផងដែរក្នុងរយៈពេលមួយឆ្នាំកន្លងទៅ ពោលគឺមានតែ ១១នាក់ប៉ុណ្ណោះ ក្នុងចំណោមតំណាងរាស្រ្តបុរសសរុប ៩៩នាក់។ ចំណែកឯការបញ្ចេញមតិ គឺមានតែការគាំទ្រច្បាប់ និងកោតសរសើរសមិទ្ធផល និងការដឹកនាំរបស់រដ្ឋាភិបាល ដោយមិនសូវឃើញតំណាងរាស្រ្តណាម្នាក់ជំទាស់ រិះគន់ និងសួរដេញដោលឱ្យស៊ីជម្រៅឡើយ។
អ្នកនាំពាក្យរដ្ឋសភា លោក ឡេង ប៉េងឡុង ប្រាប់ថា រដ្ឋសភាលើកទឹកចិត្តឱ្យតំណាងរាស្ត្រគ្រប់រូបឡើងបញ្ចេញមតិ ប៉ុន្តែ ថា ការសម្រេចចិត្តបញ្ចេញមតិ ឬក៏អត់ លោកថា ជាសិទ្ធិសម្រេចរបស់តំណាងរាស្ត្រនីមួយៗ។
គណបក្សប្រជាជនកម្ពុជា ដណ្តើមបានអាសនៈទាំងអស់ ១២៥ ក្នុងសភាសម្រាប់អាណត្តិទី៦នេះ ក្រោយពីតុលាការកំពូលចេញសាលដីការំលាយអតីតគណបក្សប្រឆាំងមុនការបោះឆ្នោតថ្នាក់ជាតិឆ្នាំ២០១៨មកដល់៕
